Read Western Panjabi اعمال 19 Bible Online

اعمال 19 - Western Panjabi bible

اعمال 19

¹تے اینج ہویا جدوں اُپلّوس کُرِنتِھس وِچ سی۔ تَد پَولُس اُپرلے علاقیاں وِچوں دی ہو کے اِفِسُس نُوں آیا۔ تے اوتھے کئی شاگِرد مِلے۔

²تے اوس اوہناں نُوں آکھیا۔ جدوں تُساں اِیمان لیاندا۔ تُہانوں پاک رُوح مِلیا؟ اوہناں اوہنوں آکھیا۔ اساں تے اینا سُنیا وی نئیں۔ پئی پاک رُوح وی کُجھ اے۔

³تَد اوس آکھیا۔ فیر تُہانوں کِہدا بپتِسمہ مِلیا اے؟ اوہ آکھن لگّے یُوحنّا دا۔

⁴پَولُس آکھیا پئی یُوحنّا نے تَوبہ دا بپتِسمہ دِتّا۔ تے لوکاں نُوں ایہہ آکھیا۔ پئی تُسی اوہدے اُتّے جیہڑا میرے پِچّھے آؤندا اے یعنی یِسُوع اُتّے اِیمان لیاؤ۔

⁵اوہناں ایہہ سُن کے خُداوند یِسُوع دے ناں اُتّے بپتِسمہ لیا۔

⁶جدوں پَولُس اوہناں اُتّے ہتّھ رکھّے۔ تے پاک رُوح اوہناں اُتّے آیا۔ تے اوہ بولیاں بولن تے نبُوّت کرن لگّے۔

⁷اوہ سارے بندے باراں کُو سن۔

⁸فیر اوہ عبادت خانے وِچ جا کے تِنّاں مہِینیاں تِیکر دلیری نال بولدا۔ تے خُدا دی بادشاہی دِیاں گلّاں دی بابت بحث کر دا تے مناندا رہیا۔

⁹تے جد بعضے سخت دِل تے نافرمان ہو گئے۔ تے ساریاں لوکاں دے اگّے ایس راہ نُوں بُرا آکھن لگّے۔ تَد اوس اوہناں توں وَکھریاں ہو کے شاگِرداں نُوں وَکھ کِیتا۔ تے تُرنّس دے مدرسہ وِچ روز بحث کر دا سی۔

¹⁰ایہہ دو ورھیاں تِیکر ہوندا رہیا۔ ایتھوں توڑی پئی آسِیہ دے سارے رہن والیاں نیں یہُودِیاں تے یُونانِیاں نیں وی خُداوند دا کلام سُنیا۔

¹¹تے پَولُس دے ہتھّوں خُدا عجِیب طاقتاں وکھاؤندا سی۔

¹²ایتھوں تِیکر پئی رُومال تے پٹکے۔ اوہدے پنڈے نُوں چُھوا کے بِیماراں اُتّے پاندے سن تے روگ اوہناں توں ہَٹ جاندے سن۔ تے بُریاں رُوحاں نِکل جاندِیاں سن۔

¹³تے کئی یہُودی جھاڑن پُھوکن والے وی اوہناں لوکاں اُتّے جِنہاں نُوں بُریاں رُوحاں چمبڑیاں سن خُداوند یِسُوع دا ناں ایس طرح آکھ کے پُھوکن لگّے پئی جیہڑے یِسُوع دی منادی پَولُس کر دا اے۔ مَیں اوہدی تُہانوں سَونہہ چُکانا آں۔

¹⁴تے سِکِوا کر کے اِک یہُودی سردار کاہِن دے سَتّ پُتر ایس طرح کر دے سن۔

¹⁵تے بُری رُوح نے اوہناں نُوں آکھیا۔ پئی یِسُوع نُوں مَیں جاننی آں۔ تے پَولُس نُوں وی پہچاننی آں۔ پر تُسی کون ہو؟

¹⁶تے اوہ بندہ جِہدے وِچ بُری رُوح سی اوہناں اُتّے کُد کے چڑھ گیا دوہاں اُتّے دابا پا کے اوہناں نُوں اپنے وَس وِچ کر لیا ایتھوں تائیں پئی اوہ اوس گھروں ننگے تے پھٹّے ہوئے بھج نِکلے۔

¹⁷تے ایہہ گلّ ساریاں یہُودِیاں تے یُونانِیاں نُوں جیہڑے اِفِسُس وِچ رہندے سن معلُوم ہوگئی۔ تے اوہ سبھ ڈر گئے۔ تے خُداوند یِسُوع دے ناں دی وڈیائی ہوئی۔

¹⁸تے اوہناں وِچوں جِنہاں اِیمان لیاندا سی بتھیریاں آ کے مَن لیا۔ تے اپنے کرتوت دس دِتّے۔

¹⁹تے بتھیریاں جیہڑے جادُو کر دے سن اپنیاں کِتاباں کٹھِیاں کر کے سبھناں دے اگّے ساڑ دِتّیاں۔ تے جد اوہناں نیں اوہناں دے مُل دا حِساب کِیتا۔ تاں پنجاہ ہزار رُپئے دا ہویا۔

²⁰ایسے طرح قُدرت نال خُدا دا کلام وَدھدا تے زور پھڑدا گیا۔

²¹جدوں ایہہ گلّاں ہو گِئیاں۔ تَد پَولُس دِل وِچ فیصلہ کِیتا۔ پئی مَکِدُنیہ تے اَخیہ دے وِچوں ہو کے یرُوشلِیم نُوں جاوے۔ تے آکھیا پئی اوتھے جان دے مگروں مَینُوں رُومہ وی ویکھنا پَوے گا۔

²²تے اوس اپنے سیوا کرن والیاں وِچوں دو بندے تِیمُتِھیُس تے اِراستُس نُوں مَکِدُنیہ ولّ ٹور دِتّا۔ پر اوہ آپ آسِیہ وِچ کُجھ چِر رہیا۔

²³تے اوس ویلے ایس راہ دی بابت بڑا رَولا پیا۔

²⁴کیوں جو دیمتیِریُس کر کے اِک سُنیارا سی جیہڑا اَرتمس دیوی دے چاندی دے مَندراں نُوں بناندا سی۔ تے کاریگراں نُوں بڑا کھٹاندا سی۔

²⁵اوس اوہناں نُوں تے ہورناں نُوں جیہڑے ایہو کسب کر دے سن۔ اکٹّھا کر کے آکھیا۔ اَے لوکو تُسی جان دے ہو پئی ایس کمّ نال ساڈا چَنگا گُذارا چلدا اے۔

²⁶تے تُسی ویکھدے تے سُندے ہو۔ پئی نِرا اِفِسُس وِچ نئیں سگوں سارے آسِیہ وِچ۔ ایس پَولُس ایہہ آکھ کے پئی جیہڑے ہتّھاں نال بنائے جاندے نیں۔ اوہ خُدا نئیں۔ بڑی خلقت نُوں سمجھا کے ورغلا یا اے۔

²⁷سو نِرا ایہہ خطرہ نئیں پئی ساڈے کمّ دا قدر جاندا رہے پر وڈّی دیوی اَرتمس دا مندر وی اُڈ جائے۔ تے اوہدی وڈیائی وی جاندی رہے جِہنُوں سارا آسِیہ تے ساری دُنیا پُوجدی اے۔

²⁸ایہہ گلّ سُن کے اوہ غُصّے نال بھر گئے۔ تے ڈنڈ پا کے آکھن لگّے۔ اِفسِیاں دی اَرتمس وڈّی اے۔

²⁹تے سارے شہر وِچ ہُلّڑ مَچ گیا۔ تے سبھ مِل کے گَیُس تے ارِسترخُس نُوں جیہڑے مَکِدُنیہ دے رہن والے تے پَولُس دے سفر وِچ ساتھی سن پَھڑکے تماشے دی تھانویں اِک دِل ہو کے بھج گئے۔

³⁰تے جد پَولُس دی مرضی سی۔ پئی مَیں لوکاں دے وِچ جاواں۔ تَد شاگِرداں اوہنوں جان نا دِتّا۔

³¹تے آسِیہ دے کئی سرداراں جیہڑے اوہدے دوست سن آکھ گھلّیا۔ تے اوہدی مِنّت کِیتی۔ پئی تماشے دی تھانویں جان دی دلیری نا کرے۔

³²کوئی کُجھ رَولا پاندا سی۔ تے کوئی کُجھ۔ تے جماعت وِچ گڑبڑی پَے گئی۔ کیوں جو پَتا نا لگّا۔ پئی اسی کاہدے لئی اکٹّھے ہوئے آں۔

³³فیر اوہناں اِسکندر نُوں جِہنُوں یہُودی پیش کر دے سن بِھیڑ وِچوں کڈھ کے اگّے کر دِتّا۔ تے اِسکندر ہتّھ نال سینت کر کے چاہندا سی پئی لوکاں دے سامھنے عُذر کرے۔

³⁴پر جد اوہناں نیں جانیا پئی ایہہ یہُودی اے تَد دو کُو گھینٹیاں تِیکر اِک اواز ہو کے اُچّی اُچّی آکھدے رہے۔ پئی اِفسِیاں دی اَرتمس وڈّی اے۔

³⁵فیر شہر دے مُحرّر نے جماعت نُوں ٹھنڈا کِیتا۔ تے آکھیا۔ اَے اِفسِیو! اوہ کیہڑا بندہ اے۔ جو نئیں جان دا پئی اِفسِیاں دا شہر وڈّی دیوی اَرتمس دے مندر تے اوس مُورت دا رکھوالا اے۔ جیہڑی زیوس ولّوں ڈِگّ پئی سی؟

³⁶سو جدوں ایہناں گلّاں دے برخلاف کوئی کُجھ نئیں آکھ سکدا۔ تُہانوں چاہیدا اے۔ پئی صبر کرو۔ تے بِن سوچے کُجھ نا کرو۔

³⁷کیوں جو تُسی ایہناں بندیاں نُوں لے آئے ہو جیہڑے نا تے مندر دے چور نے۔ تے نا ساڈی دیوی دی نِندیا کرن والے۔

³⁸جے دیمتیِریُس تے اوہدے نال دے کاریگر کِسے اُتّے دعویٰ رکھدے نیں۔ تاں کچہری کُھلی اے۔ نالے نمائندے موجُود نیں۔ اِک دُوجے اُتّے نالش کرن۔

³⁹پر جے تُہانوں کوئی ہور گلّ پُچھنی ہوئے۔ تاں اوہ قانُونی مجلس وِچ فیصلہ ہوئے گا۔

⁴⁰کیوں جو اَج دے فسادی دی بابت ڈر اے۔ پئی ساتھوں پُچھیا جائے۔ اوہدا کوئی سبّب جو نئیں ہویا۔ اوہدی بابت اسی جواب نا دے سَکاں گے۔ پئی ایہہ شور کاہِنُوں ہویا۔

⁴¹تے ایہہ آکھ کے اوس جماعت نُوں برخواست کِیتا۔