Read Western Panjabi اعمال 20 Bible Online

اعمال 20 - Western Panjabi bible

اعمال 20

¹جد رَولا ٹل گیا۔ تَد پَولُس شاگِرداں نُوں سدّیا تے نصِیحت دِتّی تے اوہناں توں وِداع ہو کے مَکِدُنیہ ولّ ٹُر پیا۔

²تے اوہناں علاقیاں وِچ پھیرا کر کے تے بُہت نصِیحت دے کے۔ یُونان وِچ آیا۔

³جد تِنّ مہینے رہ کے جہاز اُتّے چڑھ کے سُوریہ ولّ جان نُوں تیار سی۔ تَد یہُودِیاں اوہدے اُتّے مَتا پکائیا۔ فیر اوس ایہہ اِرادہ کِیتا۔ پئی مَیں مَکِدُنیہ دے راہ ہو کے پرت جاواں۔

⁴تے پُرُس دا پُتر سوپَترُس جیہڑا بِیرِیّہ دا سی تے تھِسّلُنِیکیاں وِچوں ارِسترخُس تے سِکُندُس تے دِربے دا گَیُس تے تِیمُتِھیُس تے آسِیہ دا تُخِکس تے ترُفِمُس اوہدے نال آسِیہ تِیکر گئے۔

⁵ایہہ اگّے جا کے تروآس وِچ سانُوں اُڈِیکدے سن۔

⁶تے فطِیری روٹی دے دِناں پِچّھوں اسی جہاز اُتّے فِلپّی توں ٹُر گئے۔ تے پن جیویں دِن تروآس وِچ اوہناں کول اَپڑے۔ تے اوتھے سَتّ دِن رہے۔

⁷تے ہفتے دے پہلے دِن جِس ویلے اسی روٹی توڑن لئی اکٹّھے ہوئے۔ پَولُس دُوجے دِن ٹُرن دا اِرادہ کر کے اوہناں نال کلام کِیتا۔ تے اَدھی رات تِیکر اپنا وعظ کر دا رہیا۔

⁸تے اوس چوبارے وِچ جِتّھے اسی اکٹّھے ہوئے ساں۔ بتھیرے دِیوے بَلدے سن۔

⁹تے اِک جوان یُوتخُس کر کے کھِڑکی اُتّے بَیٹھا ہویا نِیندر نال بڑا دَبّیا ہویا سی۔ تے پَولُس دے وعظ کر دیاں کر دیاں اوہ اپنی نِیندر دا ماریا ہویا ترِیجی منزلوں ہیٹھاں ڈِگّ پیا۔ تے مُردہ چُکیا گیا۔

¹⁰تَد پَولُس ہیٹھاں لَہہ کے اوہدے اُتّے ڈھیہ پیا تے اوہنوں جَپھّے وِچ لے لیا۔ تے گلّ لا کے آکھن لگّا۔ تُسی گھابرو نا کیوں جو اوہدی جان اوہدے وِچ ای اے۔

¹¹تے اُتانہہ جا کے جد اوس روٹی توڑی تے کھادِی۔ بڑے چِر تِیکر سگوں دِن چڑھے تِیکر اوہناں نال گلّاں کِیتیاں فیر اوہ ٹُر پیا۔

¹²تے اوہ اوس مُنڈے نُوں جِیوندا لیائے تے حدّوں وڈّی تسلّی پائی۔

¹³تے اسی اگیترے جہاز اُتّے چڑھ گئے۔ تے اسُّس نُوں ایس دلیل نال گئے۔ پئی پَولُس نُوں وی اوتھوں چڑھا لئیے۔ کیوں جو اوہ پَیدل جان دا اِرادہ کر کے ایسے طرح آکھ گیا سی۔

¹⁴جدوں اوہ اسُّس وِچ سانُوں مِلیا۔ اساں اوہنوں چڑھا لیا۔ تے مِتُلینے نُوں آئے۔

¹⁵تے اوتھوں جہاز کھول کے دُوجے دِن خِیُس دے سامھنے آئے۔ تے ترِیجے دِن سامُس وِچ جا لگّے۔ تے اگلے دِن مِیلیتُس اَپڑے۔

¹⁶کیوں جو پَولُس دی صلاح سی پئی اِفِسُس توں لانبھے ہو کے جاواں کِتے اجیہا نا ہوئے پئی آسِیہ وِچ چِر لانا پَوے۔ ایس لئی پئی اوہ چھیتی کر دا سی۔ پئی جے ہو سکے تے پِنتیکُست دا دِن یرُوشلِیم وِچ کٹّے۔

¹⁷تے مِیلیتُس توں اوس اِفِسُس وِچ سنیہا گھل کے کلِیسیا دے بزُرگاں نُوں سدّیا۔

¹⁸تے جد اوہ اوہدے کول آئے۔ اوس اوہناں نُوں آکھیا۔ تُسی جان دے اوہ۔ پئی مَیں جدوں آسِیہ وِچ آیا پہلے دِن توں کِس طرح ہر ویلے تُہاڈے کول رہیا۔

¹⁹پئی بڑی حلِیمی نال تے اتھرُو وَہا وَہا کے اوہناں ازمایشاں وِچ جیہڑیاں یہُودِیاں دے مَتے پکان نال میرے اُتّے آ پئیاں مَیں خُداوند دی خِدمت کر دا رہیا۔

²⁰نالے تُسی جان دے ہو۔ پئی تُہانوں کوئی فائدے دی گلّ دسن وِچ تے تُہانوں کُھلی طرح تے گھر گھر جا کے وی مَیں تعلِیم دین توں نئیں جھکّیا۔

²¹تے مَیں یہُودِیاں تے یُونانِیاں دے اگّے گواہی دیندا رہیا پئی خُدا اگّے تَوبہ کرن۔ تے ساڈے خُداوند یِسُوع مسِیح اُتّے اِیمان لیاؤن۔

²²تے ہُن ویکھو۔ مَیں رُوح وِچ قیدی ہو کے یرُوشلِیم نُوں جاناں آں۔ تے نئیں جان دا پئی اوس تھاں میرے نال کِیہ ہوئے گا۔

²³پر اینا ای معلُوم اے۔ پئی ہر شہر وِچ پاک رُوح مَینُوں صاف گواہی دے کے ایہہ آکھدا اے۔ پئی مَینُوں بیڑیاں تے مُصِیبتاں پیّاں اُڈِیکدیاں نیں۔

²⁴پر مَیں اپنی جان دا خیال بالکل نئیں کر دا۔ پئی اوہ مَینُوں پیاری لگدی اے۔ تاں جو مَیں اپنی دَوڑ نُوں تے اوس خِدمت نُوں جیہڑی خُداوند یِسُوع توں مَینُوں سپُرد ہوئی۔ پُورا کراں۔ تے خُدا دے کرم دی خُوشخبری اُتّے گواہی دیاں۔

²⁵تے ہُن ویکھو مَینُوں پتا اے۔ پئی تُسی سارے جِنہاں دے وِچ مَیں بادشاہی دی منادی کر دا رہیا۔ میرا مُنھ فیر کدی نا ویکھو گے۔

²⁶ایس کر کے مَیں اَج دے دِن تُہانوں گواہ رکھنا آں۔ پئی مَیں سبھناں دے خُون توں پاک آں۔

²⁷کیوں جو تُہانوں خُدا دی ساری صلاح دسن توں مَیں نئیں جھکّیا۔

²⁸تُسی اپنی اوس سارے اِجّڑ دی خبرداری کرو۔ جِہدا پاک رُوح نے تُہانوں نِگہبان بنایا۔ پئی خُدا دی کلِیسیا نُوں چارو جِہنُوں اوس اپنے ای لہو نال مُل لیا۔

²⁹مَیں جاننا آں پئی میرے کُوچ کرن دے مگروں بُرے بگھیاڑ تُہاڈے وِچ آ وڑن گے جیہڑے اِجّڑ نُوں نئیں چھڈن گے۔

³⁰نالے تُہاڈے اپنے ای وِچوں بندے اُٹھ کھلون گے جیہڑے اُلٹِیاں گلّاں شاگِرداں نُوں اپنے مگر کھِچّ لیجان لئی آکھن گے۔

³¹سو جاگدے رہو۔ تے یاد رکھو۔ پئی مَیں تِنّ ورھے رات تے دِن رو رو کے ہر اِک نُوں دسن توں نئیں رُکیا۔

³²تے ہُن مَیں تُہانوں خُدا تے اوہدے کرم دے کلام دے سپُرد کرنا آں۔ کیوں جو اوہدے وِچ طاقت اے۔ پئی تُہانوں وَدھاوے تے سارے پاک لوکاں دے وِچ وِرثہ بخشے۔

³³مَیں تے کِسے دی چاندی یا سونے یا کپڑے دا لالچ نئیں کِیتا۔

³⁴تُسی آپ ای جان دے ہو۔ پئی ایہو ہتّھ میرِیاں تے میرے نالدیاں دِیاں لوڑاں نُوں پُورا کر دے رہے۔

³⁵مَیں سارِیاں گلّاں وِچ تُہانوں نمونہ وکھالیا۔ پئی ایس طرح محنت کر کے کمزوراں دی مدد کرنی تے خُداوند یِسُوع دی گلّ یاد کرنی چاہیدی اے۔ جیہڑی اوس آپے آکھی۔ پئی دینا لین نالوں مُبارک اے۔

³⁶تے ایویں آکھ کے اوس گوڈے نوائے۔ تے اوہناں سبھناں نال دُعا منگی۔

³⁷تے سبھو وَاہوَا روئے۔ تے پَولُس دے گلّ نال جَپھّی پا کے اوہنوں چُمّیا۔

³⁸تے ساریاں توں وَدّھ ایس گلّ دا اوہناں نُوں غم ہویا۔ جیہڑی گلّ اوس آکھی۔ پئی تُسی میرا مُنھ فیر کدی نا ویکھو گے۔ تے اوہناں جہاز تِیکر اوہنوں اَپڑایا۔