Read Western Panjabi اعمال 22 Bible Online

اعمال 22 - Western Panjabi bible

اعمال 22

¹میرے بھراؤ تے بزُرگو! میرا عُذر سُنو۔ جیہڑا ایس ویلے مَیں تُہاڈے اگّے کرنا آں۔

²تے اوہناں جد سُنیا۔ پئی اوہ عِبرانی بولی وِچ ساڈے نال گلّاں کر دا اے۔ تے ہور وی چُپ کر گئے۔ تَد اوس آکھیا۔

³مَیں یہُودی بندے آں۔ مَیں کِلِکیہ دے تَرسُس وِچ جمّیا۔ پر ایس شہر وِچ گملی ایل دے پیراں وِچ پلیا تے پئیو دادیاں دی شریعت پُورے چج نال سِکھی۔ تے خُدا دے لئی اجیہا سرگرم ساں جیہے تُسی سارے اَج دے دِن ہو۔

⁴مَیں بندیاں تے زنانِیاں نُوں بَنّھ بَنّھ کے قیدخانے وِچ پا پا کے ایس راہ والیاں نُوں مَوت تِیکر ستایا۔

⁵تے ایس گلّ دا سردار کاہِن میرا گواہ اے۔ تے بزُرگاں دی ساری جماعت وی۔ جِنہاں توں مَیں بھراواں دے لئی چِٹّھیاں وی لے کے دمِشق نُوں ایس واسطے گیا۔ پئی جیہڑے اوتھے سن۔ اوہناں نُوں وی بَنّھ کے یرُوشلِیم وِچ سزا پان نُوں لیاواں۔

⁶تے جد مَیں جاندِیاں جاندِیاں دمِشق دے نیڑے اَپڑیا۔ تاں دوپہر دے ویلے اینج ہویا۔ پئی میرے چَوفیرے اِک دم بڑا نُور اسمانوں چمکیا۔

⁷تے مَیں زمین اُتّے ڈِگّ پیا۔ تے اواز سُنی جیہڑی مَینُوں آکھدی سی۔ اَے ساؤُل اَے ساؤُل تُوں مَینُوں کیوں ستانا ایں؟

⁸تے مَیں جواب دِتّا۔ اَے خُداوند تُوں کون ایں؟ تے اوس مَینُوں آکھیا۔ مَیں یِسُوع ناصری آں جِہنُوں تُوں ستانا ایں۔

⁹تے میرے نالدیاں نُور تے ویکھیا پر اوہدی اواز جیہڑا میرے نال بولدا سی اوہناں نا سُنی۔

¹⁰مَیں آکھیا اَے خُداوند۔ مَیں کِیہ کراں؟ خُداوند مَینُوں آکھیا۔ اُٹھ دمِشق نُوں جا۔ تے سبھو کُجھ جو تیرے کرن لئی مُقرّر ہویا اے۔ اوتھے ای تینُوں دسیا جائے گا۔

¹¹تے جد مَیں اوس نُور دے تیز ہون دے صدقہ ویکھ نا سکیا۔ تَد میرے ساتھی میرا ہتّھ پھڑ کے دمِشق وِچ لے آئے۔

¹²تے حننیاہ کر کے اِک بندہ سی۔ شریعت دے سببّوں دِیندار تے اوتھے وَسّن والے سارے یہُودِیاں وِچ نیک نام۔

¹³اوہ میرے کول آیا۔ تے کول کھلو کے مَینُوں آکھن لگّا۔ بھرا ساؤُل سُجاکھا ہو اوسے گھڑی مَیں اوہدے اُتّے نظر کِیتی۔

¹⁴تے اوس آکھیا۔ ساڈے پئیو دادیاں دے خُدا تینُوں مُقرّر کِیتا اے پئی تُوں اوہدی مرضی نُوں جانیں۔ تے اوس نیک نُوں ویکھیں تے اوہدے مُنھ دی اواز سُنیں۔

¹⁵کیوں جو تُوں سارے بندیاں دے اگّے اوہدے ولّوں اوہناں گلّاں دا گواہ ہوویں گا۔ جیہڑیاں تُوں ویکھیاں تے سُنیاں نیں۔

¹⁶تے ہُن تُوں کیوں چِر لانا ایں؟ اُٹھ کھلو تے بپتِسمہ لے۔ تے اوہدا ناں لے کے اپنے گُناہاں نُوں دھو دے۔

¹⁷تے جد مَیں یرُوشلِیم نُوں مُڑ آیا۔ تے ہیکل وِچ دُعا پیا منگدا ساں۔ ایویں ہویا پئی مَینُوں ہول پَے گیا۔

¹⁸تے اوہ مَینُوں آکھدا سی۔ پئی چھیتی کر۔ یرُوشلِیم توں فٹافٹ نِکل جا۔ کیوں جو تیری گواہی نُوں میری بابت اوہ قبول نا کرن گے۔

¹⁹تے مَیں آکھیا اَے خُداوند اوہ آپ جان دے نیں پئی مَیں اوہناں لوکاں نُوں جِنہاں تیرے ناں اُتّے اِیمان لیاندا اے قید وِچ پاندا ساں تے ہر اِک عبادت خانے وِچ کولڑے مرواؤندا ساں۔

²⁰تے جِس ویلے تیرے شہید ستِفنُس دا لہو وگایا گیا۔ مَیں وی آپ کول کھلوتا ہویا تے حامی بھردا ساں۔ تے اوہدے خُونِیاں دے کپڑیاں دی راکھی کر دا ساں۔

²¹تَد اوس مَینُوں آکھیا۔ ٹُرپَو۔ کیوں جو مَیں تینُوں دُراڈے سارے غیر قوماں ولّ گھلاں گا۔

²²ایس گلّ توڑی اوہ اوہدی سُندے رہے تَد اُچّی اواز نال آکھن لگّے پئی اجیہے بندے نُوں زمین اُتّوں دُور کر۔ کیوں جو اوہدا جِیوندیاں رہناں چَنگا نئیں اے۔

²³تے جد اوہ رَولا پان تے کپڑے لاہن تے مِٹّی اُڈان لگّے۔

²⁴تاں پلٹن دے سردار حُکم دِتّا۔ پئی اوہنوں قِلعے دے اندر لے آؤن تے آکھیا پئی اوہنوں کولڑے مار کے اوہدا بیان لوؤ۔ تاں جو مَینُوں معلُوم ہوئے پئی کِیہ سبّب اے جو اوہ اوہدی ضِد وِچ اِنج ڈنڈ پاندے نیں۔

²⁵تے جد اوہناں اوہنوں وَدّھراں نال بَدّھا۔ تَد پَولُس اِک صُوبیدار نُوں جیہڑا کول کھلوتا سی آکھیا۔ تُہانوں حُکم اے۔ پئی رُومی بندے نُوں کولڑے مارو۔ تے اوہ وی ڈنڈ لائے بِناں؟

²⁶صُوبیدار ایہہ سُن کے سردار کول جا کے خبر دِتّی۔ تے آکھیا۔ تُوں کِیہ کرن لگّا ایں؟ ایہہ بندہ تے رُومی اے۔

²⁷تے سردار اوہدے کول آ کے اوہنوں آکھیا۔ مَینُوں دس۔ تُوں رُومی ایں؟ اوس آکھیا آہو۔

²⁸سردار جواب دِتّا۔ مَیں بُہت خرچ کر کے رُومی ہون دا حق مُل لیا۔ پَولُس آکھیا۔ مَیں جمّیا ای ایسے طرح ساں۔

²⁹اوہدا بیان لین والے اونویں اوہدے توں ہَٹ گئے۔ تے سردار وی ڈر گیا۔ جدوں جانیا پئی ایہہ بندے رُومی اے تے مَیں اوہنوں بَدّھا اے۔

³⁰سویر نُوں ایس اِرادے نال پئی پَکّا پَتا لگ جائے پئی یہُودی اوہدے اُتّے کِیہ دعویٰ کر دے نیں اوس اوہنوں چھڈ دِتّا۔ تے حُکم کِیتا پئی سردار کاہِن تے سارے صدرِ مجلس اکٹّھے ہون۔ تے اوس پَولُس نُوں لیا کے اوہناں دے سامھنے کھلا کِیتا۔