Read Western Panjabi اعمال 24 Bible Online

اعمال 24 - Western Panjabi bible

اعمال 24

¹تے پنج دِناں پِچّھوں سردار کاہِن حننیاہ بعضے بزُرگاں تے اِک وکِیل تِرطُلُس نُوں لے کے آیا۔ اوہناں پَولُس دے برخلاف حاکم نُوں سمجھایا۔

²تے جد اوہ سدّیا گیا۔ تَد تِرطُلُس الزام لاکے ایہہ آکھن لگّا۔ پئی اَے فیلِکس بہادر ایس واسطے پئی اسی لوک تیری راہِیں بڑا سُکھ پانے آں۔ تے ایس قوم لئی تیری دُور اندیشی توں چنگے چنگے انتظام کِیتے جاندے نیں۔

³اسی ہر گلّ تے ہر تھاں وِچ ایہناں گلّاں توں بڑی شُکر گُزاری نال تیرا احسان مَنّنے آں۔

⁴پر ایس واسطے پئی مَیں تینُوں بُہتی تکلیف نا دیاں۔ تیری مِنّت کرنا آں پئی مِہربانی کر کے ساڈیاں تھوڑیاں جِہیاں گلّاں سُن۔

⁵کیوں جو اساں ایس بندے نُوں اِک بلا۔ تے دُنیا دے سارے یہُودِیاں وِچوں فسادی۔ تے ناصریاں دے بِدعتی فِرقے دا موہر لا ویکھیا اے۔

⁶اوس کوشش وی کِیتی پئی ہیکل نُوں پلِیت کرے۔ تے اوہنوں اساں قابُو کِیتا۔ [تے اسی چاہندے ساں کہ اپنی شریعت دے مطابق اوہدی عدالت کرئیے۔

⁷پر سردار لُوسِیاس آ کے بڑا زور پا کے اوہنوں ساڈے ہتھّوں کھو لیا۔

⁸تے اوہدے مُدّعیاں نُوں حُکم کِیتا پئی تیرے کول جان] ایہناں سارِیاں گلّاں دی بابت جِنہاں دا الزام اسی اوہدے اُتّے لانے آں تُوں آپ جاچ کے اوہدے توں معلُوم کر سکیں گا۔

⁹تے یہُودِیاں وی رَل کے دعویٰ کِیتا پئی ایہہ گلّاں ایسے طرح نیں۔

¹⁰تے جد حاکم اوہنوں بولن دی سینت کِیتی تاں پَولُس جواب دِتّا۔ ایس کر کے پئی مَیں جاننا آں پئی تُوں بُہت ورھیاں توں ایس قوم دا مُنصف ایں۔ مَیں خُوشی نال اپنی بابت عُذر کرنا آں۔

¹¹کیوں جو تُوں معلُوم کر سکنا ایں پئی باراں دِناں توں وَدّھ نئیں ہوئے۔ جدوں مَیں عبادت کرن لئی یرُوشلِیم نُوں گیا۔

¹²تے اوہناں مَینُوں نا ہیکل وِچ کِسے دے نال جھگڑ دیاں تے نا لوکاں وِچ فساد کر دیاں ویکھیا نا عبادت خانیاں وِچ تے نا شہر وِچ۔

¹³تے نا ایہناں گلّاں نُوں جِنہاں دی بابت ہُن میرے اُتّے الزام لاندے نیں۔ تیرے سامھنے اوہ ثابت کر سکدے نیں۔

¹⁴پر ایہہ مَیں تیرے اگّے مَن لینا آں۔ پئی جِس راہ نُوں اوہ بِدعت آکھدے نیں۔ مَیں اوسے دے مطابق اپنے پئیو دادیاں دے خُدا دی سیوا کرنا آں۔ تے جو کُجھ توریت تے نبیاں دِیاں کِتاباں وِچ لِکھیا ہویا اے۔ اوس سارے اُتّے میرا اِیمان اے۔

¹⁵تے مَیں خُدا کولوں آس رکھنا آں پئی نیکاں تے بداں دی قیامت ہوئے گی جِہنُوں ایہہ آپ وی پئے اُڈِیکدے نیں۔

¹⁶مَیں وی ایہدے وِچ کوشش کرنا آں۔ پئی خُدا تے بندیاں دے اگّے میرا دِل کَدے مَینُوں ملامت نا کرے۔

¹⁷تے بُہت ورھیاں پِچّھوں مَیں اپنی قوم نُوں خَیرات پُہنچان تے چڑھاوے چڑھان آیا۔

¹⁸اوہناں مَینُوں پاک ہویاں ہویاں بِھیڑ تے شور شرابے بِناں ایہہ کمّ کر دیاں ہویاں ہیکل وِچ ویکھیا نا بِھیڑ نال نا شور شرابے نال۔ ہاں آسِیہ دے کُجھ یہُودی ہے سن۔

¹⁹تے اوہناں نُوں چاہیدا سی پئی تیرے اگّے حاضر ہوندے۔ تے جے میرے اُتّے کوئی گلّ ہوندی تے اوہ نالش کر دے۔

²⁰یا ایہہ آپی دسن۔ پئی جد مَیں صدرِ مجلس دے اگّے کھلوتا ساں اوہناں میرے وِچ کِیہ بُریائی ویکھی۔

²¹سِوا اِک گلّ دے جیہڑی اوہناں دے وِچکار کھلوتیاں ہویاں مَیں اُچّی اواز نال آکھی۔ پئی مُردیاں دے جی اُٹھن دی بابت اَج تُہاڈے سامھنے میرے اُتّے مُقدّمہ پیا ہوندا اے۔

²²پر فیلِکس جیہڑا ایس راہ دے حال توں بُہتا واقف سی۔ اوہناں نُوں دِتّا۔ تے ایہہ آکھیا پئی جدوں پلٹن دا سردار لُوسِیاس آوے گا تَد مَیں تُہاڈیاں گلّاں نبیڑاں گا۔

²³تے اوس صُوبیدار نُوں حُکم دِتّا۔ پئی پَولُس دی راکھی کر۔ تے اوہنوں سُکھ نال رکھ۔ تے اوہدے دوستاں وِچوں کِسے نُوں اوہدی سیوا کرن توں نا روک۔

²⁴پر کُجھ دِناں پِچّھوں فیلِکس اپنی بیوی درُوسِلّہ دے نال جیہڑی یہُودن سی آگیا تے پَولُس نُوں سَدّ گھلّیا تے اوہدے کولوں مسِیح یِسُوع دے دِین دی بابت سُنیا۔

²⁵تے جد اوہ نیکی تے پرہیزگاری تے آؤن والی عدالت دی بابت بیان پیا کر دا سی۔ تَد فیلِکس نے خَوف کھا کے جواب دِتّا۔ ایس ویلے تُوں جا۔ موقع ویکھ کے مَیں تینُوں سدّاں گا۔

²⁶نالے اوہنوں آس سی پئی پَولُس کولوں مَینُوں کُجھ رُپئے مِلن گے۔ ایسے گلّے اوہ اوہنوں گھڑی مُڑی سَدّ کے اوہدے نال گلّاں کر دا رہندا سی۔

²⁷پر جد دو ورھے پُورے ہوئے فیلِکس دے تھاں پُرکِیُس فیستُس مُقرّر ہویا تَد فیلِکس ایس نِیّت اُتّے پئی یہُودِیاں نُوں احسان مند رکھّے۔ پَولُس نُوں قید وِچ ای چھڈ گیا۔