Read Western Panjabi اعمال 25 Bible Online

اعمال 25 - Western Panjabi bible

اعمال 25

¹سو فیستُس ضِلعے وِچ اَپڑ کے تِنّاں دِناں دے پِچّھوں قَیصریہ توں یرُوشلِیم نُوں گیا۔

²تے سردار کاہِناں تے یہُودِیاں دے وڈّے وڈّے بندیاں پَولُس دے برخلاف اوہدے اگّے فریاد کِیتی تے اوہدی مِنّت کِیتی۔

³تے اوہدی بابت ایہہ رعایت منگی پئی فیستُس اوہنوں یرُوشلِیم وِچ سَدّ گھلّے تے ایہہ مَتا پکائیا ہویا سی پئی راہ وِچ اوہنوں مار سُٹّن۔

⁴فیستُس جواب دِتّا پئی پَولُس قَیصریہ وِچ قید اے۔ تے مَیں آپ وی چھیتی اوتھے جاواں گا۔

⁵تے آکھن لگّا پئی تُہاڈے وِچوں جیہڑے اختیار والے ہون سو میرے نال چَلّن۔ جے اوس بندے وِچ کوئی بُھل ہوئے تاں الزام دین۔

⁶تے کوئی اَٹھ دَس دِن اوہناں دے نال رہ کے قَیصریہ نُوں ٹُر گیا تے دُوجے دِن عدالت دی گدّی اُتّے بَیہہ کے پَولُس نُوں لیاؤن دا حُکم دِتّا۔

⁷جدوں اوہ حاضر ہویا۔ یہُودی جیہڑے یرُوشلِیم توں آئے ہوئے سن اوہدے آلے دوالے کھلو گئے تے بتھیرے بھارے بھارے الزام اوہدے اُتّے لان لگّے۔ جِنہاں نُوں اوہ ثابت نا کر سکے۔

⁸پَولُس عُذر کِیتا پئی نا تے یہُودِیاں دی شریعت دا نا ہیکل دا نا قَیصر دا مَیں کُجھ گُناہ کِیتا اے۔

⁹پر فیستُس ایس اِرادے نال پئی یہُودِیاں اُتّے احسان چڑھاوے پَولُس نُوں جواب دِتّا۔ تُوں یرُوشلِیم جاناں چاہنا ایں پئی اوتھے میرے سامھنے ایہناں گلّاں دی بابت تیرا فیصلہ کِیتا جائے؟

¹⁰پر پَولُس آکھیا پئی مَیں قَیصر دی عدالت وِچ حاضر آں۔ چاہیدا اے پئی میرا فیصلہ ایتھے ای ہوئے یہُودِیاں دا جیویں تُوں آپ وی چنگی طرح جاننا ایں مَیں کُجھ گُناہ نئیں کِیتا۔

¹¹سو جے مَیں تقصِیری آں۔ تے مَوت دے لائق کُجھ کِیتا ہوئے۔ تاں مَیں مرن توں عُذر نئیں کر دا۔ پر جے ایہناں گلّاں وِچ جِنہاں دا ایہہ میرے اُتّے الزام لاؤندے نیں کُجھ اصل نئیں اے تَد کِسے دا حق نئیں پئی مَینُوں اوہناں دی رَئی نال اوہناں دے ہتّھ دے چھڈے مَیں قَیصر اگّے دوہائی دینا آں۔

¹²تَد فیستُس نے کونسل نال صلاح کر کے جواب دِتّا تُوں قَیصر دی دوہائی دِتّی اے تُوں قَیصر کول ای جائیں گا۔

¹³تے کُجھ دِناں پِچّھوں اگرِپّا بادشاہ تے برنِیکے نے قَیصریہ وِچ آ کے فیستُس نُوں سلام کِیتا۔

¹⁴جد اوتھے بُہت دِن رہ پئے فیستُس بادشاہ نُوں پَولُس دا حال دس دِتّا تے آکھیا پئی اِک بندہ اے جِہنُوں فیلِکس قید وِچ چھڈ گیا۔

¹⁵جدوں مَیں یرُوشلِیم وِچ ساں سردار کاہِناں تے یہُودِیاں دیاں بزُرگاں نیں اوہدی بابت شکایت کِیتی۔ تے اوہدے لئی سزا دا حُکم منگیا۔

¹⁶مَیں اوہناں نُوں ایہہ جواب دِتّا۔ پئی رُومِیاں دا دستُور نئیں اے۔ پئی کِسے بندے نُوں رَئی نال سزا واسطے دے چھڈن۔ جِنّاں چِر مُلزم نُوں اپنے الزام دین والیاں دے آمھے سامھنے دعویٰ دے جواب دین دا موقع نا مِلے۔

¹⁷سو جد اوہ ایتھے اکٹّھے ہوئے۔ مَیں کِسے طرح چِر نا لایا سگوں دُوجے دِن ای عدالت دی گدّی اُتّے بَیہہ کے حُکم دِتّا پئی اوس بندے نُوں لیاؤن۔

¹⁸جد اوہدے الزام دین والے کھلو گئے تے اوہناں نیں اوہناں بُرائیاں دا جیہڑیاں مَیں سمجھدا ساں اوہدے اُتّے کوئی الزام نئیں لایا۔

¹⁹پر اپنے دِین دی بابت بحث کر دے سن۔ تے کِسے بندے یِسُوع دی بابت جیہڑا مر گیا سی تے پَولُس اوہنوں جِیوندیاں آکھدا اے۔

²⁰تے جد مَیں شک وِچ پیا پئی ایہناں گلّاں دی کِس طرح تحقیقات کراں تَد مَیں اوہنوں پُچھیا پئی یرُوشلِیم نُوں جان دی تیری صلاح اے؟ پئی ایہناں گلّاں دی بابت تیرا فیصلہ ہوئے؟

²¹پر پَولُس نے جد دوہائی دِتّی پئی شہنشاہ دی عدالت وِچ میرا فیصلہ ہوئے تاں مَیں حُکم دِتّا پئی جد تِیکر مَیں اوہنوں قَیصر کول نا گھلاں قید وِچ رکھیا جائے۔

²²تے اگرِپّا فیستُس نُوں آکھیا میری مرضی اے۔ پئی مَیں آپ وی ایس بندے دِیاں گلّاں سُناں۔ اوس آکھیا تُوں بھلکے اوہدیاں سُن لئیں۔

²³سو دُوجے دِن جدوں اگرِپّا تے برنِیکے وی بڑے بن پھّب کے آئے۔ تے فَوج دے سرداراں تے شہر دے رئیساں سَنے اوہ دیوان خانے وِچ گئے۔ تاں فیستُس دے حُکم نال پَولُس حاضر کِیتا گیا۔

²⁴تَد فیستُس آکھن لگّا۔ اے اگرِپّا بادشاہ تے سارے جیہڑے حاضر ہو تُسی ایس بندے نُوں ویکھدے ہو جِہدی بابت سارے یہُودی یرُوشلِیم وِچ تے ایتھے وی میرے مگر پئے تے رَولا پا کے آکھدے سن پئی اگّے نُوں اوہدا جِیوندیاں رہنا مناسب نئیں۔

²⁵پر مَیں سمجھیا اوس مَوت دے لائق کوئی کمّ نئیں کِیتا تے جِس حالت وِچ اوس آپی شہنشاہ دی دوہائی دِتّی۔ مَیں اوہنوں گھل دین دا اِرادہ کِیتا۔

²⁶اوہدی بابت میرے کول کوئی پَکّی گلّ اے نئیں پئی اپنے مالک نُوں لِکھاں۔ ایس کر کے مَیں اوہنوں تُہاڈے اگّے خاص کر کے اگرِپّا بادشاہ تیرے اگّے لے آیا تاں جو تحقیقات کر کے میرے کول کُجھ لِکھن جوگا ہو جائے۔

²⁷کیوں جو مَینُوں ایہہ عقل دی گلّ نئیں جاپدی پئی قیدی نُوں گھلاں۔ تے نال ای ایہہ نا دساں پئی کیہڑے کیہڑے الزام اوہدے اُتّے لائے نیں۔