Read Western Panjabi اعمال 26 Bible Online

اعمال 26 - Western Panjabi bible

اعمال 26

¹تے اگرِپّا پَولُس نُوں آکھیا۔ تینُوں اپنی بابت بولن دی اجازت اے۔ تَد پَولُس اپنا ہتّھ وَدّھا کے جواب دین لگّا۔

²اَے اگرِپّا بادشاہ۔ مَیں اپنی نیک بختی سمجھنا آں۔ پئی اوہناں سبھناں گلّاں دا جیہڑیاں یہُودی میرے اُتّے لاندے نیں اَج تیرے اگّے جواب دیاں۔

³خاص ایس لئی پئی یہُودِیاں دِیاں سارِیاں رسماں۔ تے مسئلیاں توں تُوں واقف ایں۔ ایس واسطے میری عرض اے۔ پئی تُوں صبر نال میری گلّ سُن۔

⁴سارے یہُودی جان دے نیں پئی میری قوم دے وِچ تے یرُوشلِیم وِچ جوانی توں لے کے ہُن تِیکر میرا چال چَلّن کیہو جِہیا رہیا اے۔

⁵شُروع توں اوہناں نُوں میری بابت معلُوم اے جے گواہی دینی چاہن پئی اپنے پَرلے درجے دے دِیندار فِرقے وانگر مَیں فریسی ہو کے رہندا ساں۔

⁶تے ہُن اوس وعدے دی آس پِچّھے جیہڑا خُدا ولّوں۔ ساڈے پئیو دادیاں دے نال کِیتا گیا سی۔ مَیں عدالت وِچ کھلوتا آں۔

⁷اوسے وعدے دے پُورے ہون دی آس اُتّے ساڈے باراں گھرانے دِلوں جانوں رات دِن بندگی کر دے نیں۔ اَے بادشاہ ایسے آس دے سبّب یہُودی مَینُوں الزام دیندے نیں۔

⁸جد خُدا مُردیاں نُوں جوالدا اے تے تُسی ایس گلّ نُوں کیوں مَنّن والی نئیں سمجھدے۔

⁹مَیں وی سمجھدا ساں پئی یِسُوع ناصری دے ناں دے برخلاف بُہت کُجھ کرنا چاہیدا اے۔

¹⁰سو ایہو ای مَیں یرُوشلِیم وِچ کِیتا۔ تے سردار کاہِناں توں اختیار لے کے بتھیریاں پاک لوکاں نُوں قید وِچ پایا۔ تے جد اوہ مارے جاندے سن اوہناں دے برخلاف مَیں رائے دیندا ساں۔

¹¹تے سارے عبادت خانیاں وِچ اوہناں نُوں کئی واری سزا دے کے مَیں اوہناں توں کُفر اکھواؤندا ساں۔ تے اوہناں اُتّے بڑا سَودائی ہو کے مَیں اوہناں نُوں اوپریاں شہراں تِیکر وی تنگ کِیتا۔

¹²جِس ویلے سردار کاہِناں توں وَس تے سونپنا لے کے مَیں ایسے حال وِچ دمِشق ولّ پیا جاندا ساں۔

¹³تاں اَے بادشاہ۔ مَیں راہ وِچ دوپہر ویلے اِک چانن ویکھیا۔ جیہڑا سُورج دے چانن نالوں بوہتا سی تے اوہ میرے تے میرے نال دیاں دے چَوفیرے چمکیا۔

¹⁴تے جد اسی سارے زمین اُتّے ڈِگّ پئے مَیں اِک اواز سُنی جیہڑی عِبرانی بولی وِچ آکھدی سی۔ اَے ساؤُل اَے ساؤُل تُوں مَینُوں کیوں ستانا ایں؟ پرانی اُتّے چھڑ مارنا تیرے لئی اَوکھا اے۔

¹⁵تے مَیں آکھیا اے خُداوند تُوں کون ایں؟ تے خُداوند آکھیا۔ مَیں یِسُوع آں۔ جِہنُوں تُوں ستانا ایں۔

¹⁶اُٹھ تے اپنے پیراں اُتّے کھلو جا۔ کیوں جو مَیں ایس لئی تینُوں وکھالی دِتّی اے۔ پئی تینُوں اوہناں گلّاں دا جِنہاں وِچ تُوں مَینُوں ویکھیا اے۔ تے جِنہاں وِچ مَیں تینُوں وکھالی دیاں گا۔ مَیں تینُوں خادم تے گواہ بناواں۔

¹⁷تینُوں ایس قوم تے غیر قوماں توں بچا کے اوہناں دے کول مَیں تینُوں ایس لئی گھلّنا آں۔

¹⁸پئی تُوں اوہناں دِیاں اَکھّیاں کھولیں۔ تاں جو اوہ ہنیریوں چانن ولّ۔ تے شیطان دے وَس توں خُدا ولّ مُڑن پئی گُناہاں دی مُعافی لین۔ تے اوہناں لوکاں وِچ جیہڑے میرے اُتّے اِیمان رکھن نال پاک ہوئے نیں وِرثہ لین۔

¹⁹ایس کر کے اَے اگرِپّا بادشاہ مَیں اوس اسمانی رویا دی نافرمانی نئیں کِیتی۔

²⁰پر پہلاں دمِشق تے یرُوشلِیم دے رہن والیاں نُوں تے یہُودیہ دے سارے دیس وِچ تے غیر قوماں نُوں وی دسدا رہیا۔ پئی تَوبہ کرو تے خُدا ولّ پھر کے تَوبہ دے لائق کمّ کرو۔

²¹ایس سبّب کر کے یہُودِیاں مَینُوں ہیکل وِچ پَھڑکے میرے مار سُٹّن دی کوشش کِیتی۔

²²پر خُدا دی مدد نال مَیں اَج دے دِن تِیکر کھلوتا ہویا آں۔ تے نِکّیاں وڈّیاں اگّے گواہی دینا آں تے جیہڑیاں گلّاں نبیاں تے مُوسیٰ نے دسیاں سن پئی ہون والیاں نیں۔ اوہناں دے بِناں ہور کُجھ مَیں نئیں آکھدا۔

²³پئی مسِیح ضرُور دُکھ سہے گا۔ تے مُردیاں وِچوں اُٹھ کے ایس قوم نُوں تے غیر قوماں نُوں وی پہلاں اوہ ای چانن دی خبر دے گا۔

²⁴تے جد اوہ اینج اجے اپنا جواب پیا دیندا سی فیستُس اُچّی اواز نال آکھن لگّا۔ پَولُس تُوں تے پاگل ایں۔ بُہتے عِلم تیری عقل مار چھڈی اے۔

²⁵پَولُس آکھیا اَے فیستُس بہادر مَیں تاں پاگل نئیں آں۔ سگوں سچیائی تے سُرت والیاں گلّاں صاف سُناناں آں۔

²⁶کیوں جو بادشاہ جِہدے حضُور مَیں دلیری نال بولنا آں ایہناں گلّاں دی بابت جان دا اے مَینُوں یقِین اے پئی ایہناں گلّاں وِچوں کوئی وی اوہدے توں لُکی ہوئی نئیں ایس لئی پئی ایہہ کمّ کِسے گُٹّھے نئیں ہویا۔

²⁷اَے اگرِپّا بادشاہ تُوں نبیاں نُوں مَنّنا ایں؟ مَیں جاننا آں پئی تُوں مَنّنا ایں۔

²⁸اگرِپّا پَولُس نُوں آکھیا۔ تُوں تے چاہنا ایں پئی تھوڑی جِہی نصِیحت نال مَینُوں مسِیحی کر لئیں۔

²⁹پَولُس آکھیا مَیں تے خُدا توں چاہناں آں پئی بھانویں تھوڑی نصِیحت نال بھانویں بُہتی نصِیحت نال نا نِرا تُوں سگوں جِنّے اَج میری پئے سُندے نیں ایہناں بیڑیاں نُوں چھڈ کے میرے جیہے ہو جان۔

³⁰تے بادشاہ تے حاکم تے برنِیکے تے جیہڑے اوہناں دے نال بَیٹھے ہوئے سن اُٹھ کھلوتے۔

³¹تے وکھرے ہو کے آپو وِچ گلّاں کرن لگّے۔ پئی ایہہ جِنہاں قتل یا قید دے لائق کُجھ نئیں کر دا۔

³²تے اگرِپّا نے فیستُس نُوں آکھیا۔ پئی ایہہ بندے جے قَیصر دی دوہائی نا دیندا تاں چُھٹ سکدا سی۔