Read Western Panjabi اعمال 5 Bible Online

اعمال 5 - Western Panjabi bible

اعمال 5

¹تے حننیاہ کر کے اِک بندے نے اپنی گھرالی سفِیرہ نال رَل کے ملکیّت ویچی۔

²تے گھر والی نال صلاح رَلا کے مُل وِچوں کُجھ رکھ لیا۔ تے کُجھ حِصّہ لے کے رسُولاں دے پیراں وِچ لیا رکھیا۔

³پر پطرس آکھیا۔ اَے حننیاہ شیطان تیرے دِل وِچ ایہہ گلّ کیوں پائی پئی تُوں پاک رُوح نُوں فریب دیویں تے زمین دے مُل وِچوں کُجھ رکھ چھڈیں؟

⁴جد تِیکر اوہ رہی تے تیری ای نئیں سی۔ تے جد وِک گئی۔ تے تیرے اختیار وِچ نا رہی؟ تُوں کیوں ایس گلّ نُوں دِل وِچ رکھیا؟ تُوں بندیاں نال فریب نئیں کِیتا پر خُدا نال۔

⁵ایہہ گلّاں سُندیاں ای حننیاہ ڈِگّ پیا۔ تے اوہدا دَم نِکل گیا تے جِنّیاں سُنیا ساریاں نُوں بڑا ڈر لگّا۔

⁶تے جواناں اُٹھ کے اوہنوں کفنایا تے باہر لے جا کے دفنایا۔

⁷تے تِنّ کُو گھنٹیاں دے پِچّھوں اوہدی گھر والی ایس حال توں بے خبر ہو کے اندر آئی۔

⁸تَد پطرس اوہنوں آکھیا مَینُوں دس تُساں پَیلی نُوں اینے توں ویچیا؟ اوہ آکھن لگّی آہو۔ اینے ای توں۔

⁹فیر پطرس اوہنوں آکھیا۔ تُساں کاہِنُوں صلاح کِیتی پئی خُداوند دے رُوح نُوں ازماؤ۔ ویکھ تیرے گھر والے دے دفنان والیاں دے پَیر بُوہے اُتّے نیں تے تینُوں وی باہر لے جان گے۔

¹⁰اوسے ویلے اوہ اوہدے پیراں کول ڈِگّی۔ تے اوہدا دَم نِکل گیا۔ تے جواناں اندر آ کے اوہنوں مُردہ ویکھیا۔ تے باہر لیجا کے اوہدے گھر والے دے کول دفنایا۔

¹¹تے ساری کلِیسیا نُوں تے جِنہاں ایہہ گلّ سُنی ساریاں نُوں بڑا ڈر لگّا۔

¹²تے رسُولاں دے ہتھّوں بُہت کراماتاں تے مُعجزے لوکاں وِچ ظاہر ہوئے تے سبھ اِک دِل ہو کے سُلیمان دے برانڈے وِچ اکٹّھے سن۔

¹³پر ہورناں وِچوں کِسے دا حَوصلہ نا پیا پئی اوہناں وِچ رَل جائے۔ تَد وی لوک اوہناں دی تعرِیف کر دے سن۔

¹⁴تے ہور وی وَدّھ بندے تے زنانِیاں سگوں جماعتاں دِیاں جماعتاں اِیمان لیا کے خُداوند دے نال مِلدے جاندے سن۔

¹⁵ایتھوں تِیکر پئی لوک اپنیاں روگِیاں نُوں لیاؤندے۔ تے پلنگاں تے مَنجِیاں اُتّے رکھدے سن ایس لئی پئی پطرس جد آوے اوہدا پر چھاواں ای اوہناں وِچوں کِسے اُتّے پَے جاوے۔

¹⁶تے یرُوشلِیم دے آلے دوالے دیاں نگراں توں وی بڑا مُلکھ اکٹّھا ہویا تے اوہ اپنیاں روگِیاں نُوں تے اوہناں نُوں جیہڑے پلِیت رُوحاں توں اَوکھے سن لیاؤندے رہے تے اوہناں وِچوں اِک اِک چَنگا ہوگیا۔

¹⁷تَد سردار کاہِن اُٹھیا۔ تے اوہدے سارے جوٹی دار وی جیہڑے صدوقیاں دے فِرقے دے نیں ساڑے نال بھرے ہوئے سن۔

¹⁸تے رسُولاں اُتّے ہتّھ چُکے۔ تے اوہناں نُوں عام قیدخانے دے وِچ سُٹ دِتّا۔

¹⁹پر خُداوند دے فرِشتے رات نُوں قیدخانے دا بُوہا کھو لیا۔ تے اوہناں نُوں باہر لیا کے آکھیا۔

²⁰جاؤ تے ہیکل وِچ کھلو کے ایس زِندگی دِیاں سارِیاں گلّاں لوکاں نُوں سُناؤ۔

²¹سو ایہہ سُن کے اوہ سویرے ہیکل وِچ گئے۔ تے سکھالن لگّے۔ جدوں سردار کاہِن اپنے جوٹی داراں دے نال آیا۔ اوہناں صدرِ مجلس نُوں تے بنی اِسرائیل دے بزُرگاں نُوں جمع کِیتا تے قیدخانے وِچ اکھوا گھلّیا پئی اوہناں نُوں لے آؤن۔

²²جدوں سپاہی اوتھے اَپڑے اوہناں نُوں قیدخانے وِچ نا ویکھیا۔

²³تے مُڑ کے اوہناں نُوں خبر دِتّی۔ پئی اساں قیدخانے نُوں بڑا ٹکاؤ بند کِیتا ہویا ویکھیا تے پہرے والے بُوہیاں اُتّے کھلوتے ہوئے سن۔ تے جد کھو لیا تے کِسے نُوں اندر نا ویکھیا۔

²⁴جد ہیکل دے سردار تے سردار کاہِناں ایہہ گلّاں سُنیاں اوہناں دی بابت بُہت گھبرا گئے۔ پئی ایہہ گلّ کِتّھوں تِیکر وَدھے گی۔

²⁵تے کِسے آ کے اوہناں نُوں خبر دِتّی۔ پئی ویکھو اوہ بندے جِنہاں نُوں تُساں قیدخانے وِچ پا دِتّا۔ اوہ ہیکل وِچ کھلو کے لوکاں نُوں سکھالدے نیں۔

²⁶تَد سردار سپاہیاں سَنے گیا۔ تے اوہناں نُوں لے آیا۔ پر زبردستی نال نئیں کیوں جو اوہ لوکاں توں ڈر دے سن۔ کِتے اوہ سانُوں پتّھر نا مارن۔

²⁷تے اوہناں نُوں لیا کے پنچایت وِچ کھلار دِتّا تے سردار کاہِن اوہناں نُوں پچُھّن لگّا۔

²⁸پئی اساں تُہانوں تاکِید نال حُکم دِتّا سی پئی ایس ناں اُتّے نا سکھالو؟ تے تُساں یرُوشلِیم نُوں اپنی تعلِیم نال بھر دِتّا اے۔ تے ایس بندے دا خُون ساڈے اُتّے لیاؤنا چاہندے ہو۔

²⁹پر پطرس تے رسُولاں آکھیا سانُوں خُدا دا حُکم بندیاں دے حُکم نالوں وَدّھ مَنّنا چاہیدا اے۔

³⁰ساڈے پئیو دادیاں دے خُدا نے یِسُوع نُوں جوالیا۔ جِہنُوں تُساں لکڑی اُتّے ٹنگ کے مار سُٹّیا۔

³¹اوسے نُوں خُدا مالک تے نجات دین والا مُقرّر کر کے اپنے سَجّے ہتّھ نال اُچیاں کِیتا پئی اِسرائیل نُوں تَوبہ تے گُناہاں دی مُعافی بخشے۔

³²تے اسی ایہناں گلّاں دے گواہ آں۔ تے پاک رُوح وی گواہ اے۔ جیہڑا خُدا اپنے مَنّن والیاں نُوں دِتّا۔

³³پر اوہ ایہہ سُن کے اپنے دِل وِچ سڑ گئے۔ تے صلاح کِیتی پئی اوہناں نُوں مار سُٹّیئے۔

³⁴تَد گملی ایل ناں دے اِک فریسی نے جیہڑا شریعت دا مُعلّم تے سبھناں لوکاں وِچ عِزّت والا سی۔ صدرِ مجلس وِچ کھلو کے حُکم دِتّا۔ پئی ایہناں بندیاں نُوں ذرا کُو باہر کر دئیو۔

³⁵تے اوہناں نُوں آکھیا۔ اے اِسرائیلیو ہوش کرو پئی تُسی ایہناں بندیاں نال کِیہ کرنا چاہندے ہو۔

³⁶کیوں جو ایہناں دِناں توں پہلاں تھیُوداس نے اُٹھ کے آکھیا پئی مَیں وی کُجھ آں۔ اوہدے نال چار کُو سو بندے رَل گئے اوہ تاں مار یا گیا تے جِنّے اوہنوں مَن دے سن سارے کھِلرپُلر گئے۔ تے اوہناں دا ککّھ نئیں رہیا۔

³⁷اوہدے پِچّھوں مردم شُماری دے دِناں وِچ گلِیل دا یہُوداہ اُٹھیا تے لوکاں نُوں ورغلا کے اپنے مگر کھِچّ لیا۔ اوہ وی ہلاک ہویا تے جِنّے اوہنوں مَن دے سن سبھ کھِلّرپُلّڑ گئے۔

³⁸سو ہُن مَیں تُہانوں آکھنا آں۔ پئی ایہناں بندیاں توں ہٹے رہو۔ تے اوہناں نُوں جان دیو۔ کیوں جو جے ایہہ ہدایت تے ایہہ کمّ بندیاں ولّوں اے۔ تاں اوہ برباد کِیتا جائے گا۔

³⁹پر جے خُدا ولّوں اے۔ تاں تُسی اوہناں نُوں برباد کر نئیں سکو گے۔ کِتے تُسی خُدا نال وی سامنا کرن والے نا بنو۔

⁴⁰تے اوہناں اوہدی مَن لئی۔ تے جد اوہناں رسُولاں نُوں سدّیا تے مار پَوا کے حُکم کِیتا۔ پئی یِسُوع دے ناں اُتّے گلّ نا کرو۔ تَد اوہناں نُوں چھڈ دِتّا۔

⁴¹سو اوہ صدرِ مجلس دے اگّوں خُوش ہو کے ٹُر گئے پئی اسی ایس ناں دی خاطر بے عِزّت ہون دے لائق تاں سمجھے گئے۔

⁴²تے روز دِہاڑے ہیکل وِچ تے گھر وِچ تعلِیم دین توں تے مسِیح یِسُوع دی اِنجِیل سُنان توں نا مُڑے۔