Read Western Panjabi رُومِیوں 12 Bible Online

رُومِیوں 12 - Western Panjabi bible

رُومِیوں 12

¹سو بھراؤ۔ مَیں خُدا دِیاں مہربانِیاں دے سببّوں تُہاڈی مِنّت کرنا آں۔ پئی تُسی اپنے بدناں نُوں جیوندی پاک قُربانی چڑھاؤ۔ جیہڑی خُدا نُوں چنگی لگّے۔ پئی ایہو تُہاڈی رُوحانی بندگی اے۔

²تے ایس جہان دی شکل ورگے نا بنو۔ سگوں نَوِیں عقل ہون نال اپنی صُورت بدل دے جاؤ۔ تاں جو خُدا دی نیک تے چنگی لگّن والی تے کامِل مرضی تجربے نال معلُوم کر دے رہو۔

³کیوں جو اوس فضل نال جیہڑا مَینُوں بخشیا گیا اے۔ مَیں تُہاڈے وِچوں ہر اِک نُوں آکھنا آں۔ پئی جیہڑا اپنی بابت تُہانوں خیال کرنا چاہیدا اے۔ اوہدے توں وَدّھ نا کرو۔ پر سُرت نال اوسے طرح خیال کرو۔ جیویں خُدا نے ہر اِک نُوں اِیمان دا حِصّہ ونڈ دِتّا۔

⁴کیوں جو جیویں اِک بدن وِچ ساڈے بتھیرے انگ نیں تے سارے انگاں دا اِکّو کمّ نئیں۔

⁵اوسے طرح اسی جیہڑے بتھیرے آں پر مسِیح وِچ اِک بدن آں۔ تے اِک اِک کر کے اِک دُوجے دے انگ آں۔

⁶سو اوس فضل دے سببّوں جیہڑا سانُوں بخشیا گیا۔ سانُوں وَکھو وَکھریاں برکتاں مِلیاں۔ جے نبُوّت اے تے اِیمان دے اندازے نال نبُوّت کریئے۔

⁷جے خِدمت اے تے خِدمت وِچ لگّے رہیئے۔ جے کوئی سکھان والا ہوئے تے سکھان وِچ۔

⁸تے جے وعظ نصِیحت کرن والا ہوئے۔ تے وعظ نصِیحت وِچ لگّا رہے۔ خَیرات کرن والا کُھلِّیں ہتّھِیں کرے۔ پیشوا کوشش نال پیشوائی کرے۔ رَحم کرن والا خُوشی نال کرے۔

⁹مُحبّت بِناں مکّارِیوں ہوئے۔ بُریائی توں نفرت کرو۔ بھلیائی نال چمبڑے رہو۔

¹⁰بھراواں وَرگی مُحبّت نال آپو وِچ بڑا پیار رکھو۔ عِزّت ولّوں اِک دُوجے نُوں چَنگا سمجھو۔

¹¹کمّ کرن وِچ سُستی نا کرو۔ رُوح وِچ سرگرم ہوؤو۔ خُداوند دی سیوا کر دے رہو۔

¹²آس وِچ خُوش رہو۔ تنگی وِچ صبر کرو۔ دُعا منگن وِچ لگّے رہو۔

¹³پاک لوکاں دِیاں لوڑاں پُوریاں کرو۔ مُسافراں دی سیوا وِچ لگے رہو۔

¹⁴اپنے ستان والیاں نُوں دُعا دیو۔ دُعا دیو۔ تے بددُعا نا دیو۔

¹⁵خُوشی کرن والیاں نال خُوشی کرو۔ رون والیاں نال روؤ۔

¹⁶آپو وِچ اِکّو جِہیا خیال رکھو۔ اُچّے اُچّے خیال نا بنھنو۔ سگوں نِیویاں ولّ دھیان کرو۔ اپنے ولّوں سِیانے نا بن بَیٹھو۔

¹⁷بدی دے بدلے کِسے نال بدی نا کرو۔ جیہڑیاں گلّاں سبھناں نُوں چَنگیاں لگدِیاں نیں اوہناں نُوں سوچو۔

¹⁸جِتّھوں تِیکر ہو سکے۔ ساریاں لوکاں نال صُلح رکھو۔

¹⁹پیاریو! آپے اپنا بدلہ نا لوؤ۔ سگوں غُصّے نُوں جان دیو۔ کیوں جو لِکھیا ہویا اے پئی خُداوند آکھدا اے۔ بدلہ لینا میرا کمّ اے۔ مَیں ای بدلہ لَواں گا۔

²⁰پر جے تیرا وَیری بُھکھا ہوئے اوہنوں کھوال۔ جے تریہایا ہوئے اوہنوں پیال کیوں جو جے ایہہ کریں تے تُوں اوہدے سِر اُتّے اَنگیاراں دا ڈھیر لا دیں گا۔

²¹بُریائی کولوں ہار نا جا سگوں بھلیائی نال بُریائی نُوں ہرا دے۔