Read Western Panjabi رُومِیوں 13 Bible Online

رُومِیوں 13 - Western Panjabi bible

رُومِیوں 13

¹ہر اِک بندہ اعلیٰ حکُومتاں دے تابعیاں رہے۔ کیوں جو کوئی حکُومت نئیں جیہڑی خُدا ولّوں نا ہوئے۔ تے جِنّیاں ہَین سو خُدا ولّوں ٹھہرائیاں ہویاں نیں۔

²ایس لئی جیہڑا حکُومت دی مخالفت کر دا اے سو خُدا دے بندوبست دا سامنا کر دا اے تے سامنا کرن والیاں نُوں آپ ای سزا مِلے گی۔

³کیوں جو حاکم چنگے کمّ لئی نئیں پر بُرے کمّ لئی ڈراوا نیں۔ جے تُوں چاہنا ایں پئی حکُومت توں نا ڈریں تاں بھلا کر اوہدے ولّوں تینُوں شاواشے مِلے گی۔

⁴کیوں جو اوہ تیرے بھلے لئی خُدا دا نوکر اے۔ پر جے تُوں بُرا کریں تے ڈر۔ ایس لئی پئی اوہ تلوار ایویں نئیں لئی پھر دا کیوں جو اوہ خُدا دا نوکر اے۔ تے اوہدے قَہر دے سببّوں بدکار نُوں سزا دیندا اے۔

⁵ایس لئی تابعیاں رہنا ضرُور چاہیدا اے۔ نِرا غضب دے ڈر دے مارِیاں نئیں پر خُدا دا خَوف کر کے وی۔

⁶کیوں جو تُسی ایسے سببّوں چُنگی وی بھر دے اوہ۔ پئی اوہ خُدا دے ٹہلئے نیں جیہڑے ایسے کمّ وِچ رُجھّے رہندے نیں۔

⁷سبھناں دا حق دے چھڈو۔ جِہنُوں چُنگی چاہیدی اے۔ چُنگی دیو جِہنُوں محصُول چاہیدا اے۔ اوہنوں محصُول دیو۔ جِہدے کولوں ڈرنا چاہیدا اے ڈرو۔ جِہدی عِزّت کرنی چاہیدی اے۔ عِزّت کرو۔

⁸اِک دُوجے نال پیار کرن توں بِناں کِسے گلّے کِسے دے دیندار نا رہو۔ کیوں جو جیہڑا دُوجے نال پیار کر دا اے۔ اوہنے شریعت نُوں پُورا کِیتا اے۔

⁹کیوں جو ایہہ پئی تُوں زنا نا کر۔ خُون نا کر۔ چوری نا کر۔ لالچ نا کر۔ تے جے کوئی ہور حُکم وی ہوئے۔ اوہ ایس گلّ وِچ ای آ جاندا اے پئی تُوں اپنے گواہنڈی نُوں اپنے جِہیا پیار کر۔

¹⁰مُحبّت گواہنڈی دا بُرا نئیں کر دی۔ ایس کر کے مُحبّت رکھنا شریعت دا پُورا کرنا اے۔

¹¹تے زمانے نُوں جان کے پئی ہُنے ای نِیندر توں تُہاڈے جاگن دا ویلا اے۔ ایس طرح کریا کرو۔ کیوں جو اوس ویلے نالوں جدوں اساں اِیمان لیاندا ہُن ساڈی نجات نیڑے آئی۔

¹²رات بڑی لنگھ گئی دِن نیڑے آیا۔ سو ہنیرے دے کمّ چھڈ کے چانن دے ہتّھیار پا لیئے۔

¹³جیویں دِن نُوں چاہیدا اے۔ بھلمانسی نال چلیئے۔ نا لُچ پنیاں تے نشیاں وِچ۔ نا حرامکاری تے بدماشِیاں وِچ۔ نا جھگڑے تے ساڑے وِچ۔

¹⁴سگوں خُداوند یِسُوع مسِیح نُوں پا لوؤ تے جِسم دِیاں خواہشاں پُوریاں کرن لئی سوچ فِکر نا کرو۔