Read Western Panjabi رُومِیوں 15 Bible Online

رُومِیوں 15 - Western Panjabi bible

رُومِیوں 15

¹ہُن سانُوں جیہڑے تگڑے آں چاہیدا اے۔ پئی ماڑیاں دِیاں کمزوریاں دی برداشت کریئے۔ تے اپنی خُوشی نا کریئے۔

²ساڈے وِچوں ہر کوئی آپو اپنے گواہنڈی نُوں اوہدی بھلیائی لئی خُوش کرے۔ پئی اوہدی ترقی ہوئے۔

³کیوں جو مسِیح نے وی اپنے آپ نُوں خُوش نئیں کِیتا۔ پر جیویں لِکھیا ہویا اے۔ تیرے طعنے مارن والیاں دے طعنے میرے اُتّے آپئے۔

⁴کیوں جو جو کُجھ اگّے لِکھیا گیا سی ساڈی تعلِیم دے لئی لِکھیا گیا۔ تے جو اسی صبر نال تے پاک کتاب دی تسلّی نال آس رکھیے۔

⁵ہُن صبر تے تسلّی دا خُدا تُہانوں ایہہ بخشے۔ پئی مسِیح یِسُوع دے طَور طریقے اُتّے آپو وِچ اِکّو جیہے خیال رکھو۔

⁶تاں جو تُسی اِک دِل ہو کے اِک مُنھ نال خُدا تے ساڈے خُداوند یِسُوع مسِیح دے باپ دی وڈیائی کرو۔

⁷ایس کر کے تُسی اِک دُوجے نُوں قبول کرو۔ جیویں مسِیح وی تُہانوں قبول کِیتا۔ تاں جو خُدا دی وڈیائی ہوئے۔

⁸کیوں جو مَیں آکھنا آں پئی خُدا دی سچیائی ثابت کرن لئی ایس کر کے مسِیح سُنتی بہن والیاں دا خادم کِیتا گیا۔ تاں جو اوہناں وعدیاں نُوں۔ جیہڑے پئیو دادیاں نال کِیتے گئے سن۔ پَکیّاں کرے۔

⁹تے غیر قوماں رَحم دے سببّوں خُدا دی وڈیائی کرن جیویں لِکھیا ہویا اے۔ پئی ایس لئی مَیں غیر قوماں وِچ تیرا قرار کراں گا۔ تے تیرے ناں دا گِیت گاواں گا۔

¹⁰تے فیر اوہ آکھدا اے۔ پئی اَے غیر قوم والیو۔ اوہدی اُمّت دے نال خُوشی کرو۔

¹¹تے فیر ایہہ پئی سارے غیر قوم والیو۔ خُداوند دی وڈیائی کرو۔ تے سارِیاں اُمّتاں اوہدیاں صِفتاں کرن۔

¹²تے فیر یسعیاہ ایہہ آکھدا اے۔ یسّی دی جڑ ظاہر ہوئے گی۔ تے جیہڑا غیر قوماں اُتّے حکُومت کرن نُوں اُٹھدا اے۔ اوہدے اُتّے غیر قوماں آس رکھن گِیاں۔

¹³ہُن اوس آس دا خُدا تُہاڈے اِیمان لیاؤن دے سبّب ساری خُوشی تے چَین نال تُہانوں بھر دیوے تاں جو تُسی پاک رُوح دی قُدرت نال آس وِچ وَدھدے جاؤ۔

¹⁴تے میرے بھراؤ! مَیں آپ تُہاڈی بابت ایہہ یقِین رکھنا آں پئی تُسی آپ نیکی نال بھرپُور تے ساری دانائی نال بھرے ہوئے ہو تے اِک دُوجے نُوں سمجھان جوگے اوہ۔

¹⁵پر مَیں تُہانوں چیتا دوان واسطے تھوڑا تھوڑا لِکھیا۔ سو اوہدے وِچ بُہتی دلیری کِیتی اوس فضل دے سببّوں جیہڑا خُدا ولّوں مَینُوں بخشیا گیا اے

¹⁶پئی مَیں خُدا دی خُوشخبری دی سیوا کاہِن وانگر کر کے غیر قوماں دے لئی مسِیح یِسُوع دا سیوک ہوواں۔ تاں جو غیر قوماں دا چڑھاوا پاک رُوح توں پاک ہو کے منظُور کِیتا جاوے۔

¹⁷سو مَیں ایہناں گلّاں دی بابت جیہڑیاں خُدا ولّوں نیں۔ مسِیح یِسُوع وِچ فخر کرنا آں

¹⁸کیوں جو مَیں ایہہ دلیری نئیں کراں گا۔ پئی مَیں ہور کِسے گلّ دا ذِکر کراں بنا اوہناں دے جیہڑیاں مسِیح میری راہِیں غیر قوماں دے منان لئی کِیتیاں بھانویں کلام تے کمّاں نال۔

¹⁹بھانویں نشانِیاں تے کراماتاں دی قُدرت نال بھانویں پاک رُوح دی قُدرت نال۔ ایتھوں تِیکر پئی یرُوشلِیم توں لے کے اِلّرِکُم تِیکر وی مَیں پھیرا مار کے مسِیح دی خُوشخبری دی پُوری منادی کِیتی۔

²⁰پر مَینُوں ایہہ چاہ سی۔ پئی مَیں خُوشخبری دی منادی اوتھے نا کراں جِتّھے مسِیح دا ناں سُنایا گیا۔ کِتے اجیہا نا ہوئے پئی مَیں دُوجے دی نِینّھ اُتّے ردّہ رکھاں۔

²¹سگوں جیویں لِکھیا ہویا اے پئی اوہ ویکھن گے جِنہاں نُوں اوہدی خبر نئیں سی دِتّی گئی۔ تے اوہ سمجھن گے۔ جِنہاں نئیں سُنیا۔

²²ایسے سببّوں مَیں اکثر تُہاڈے کول آؤن توں وی رُکیا رہیا۔

²³پر ہُن ایسے کر کے پئی ایہناں دیساں وِچ تاں نئیں رہیا۔ نالے بتھیرے ورھیاں توں مَینُوں تُہاڈے کول آؤن دا دِلی شَوق سی۔

²⁴سو جد مَیں اِسفانیہ ولّ جاواں گا۔ مَینُوں آس اے پئی واٹے تُہانوں مِل کے جاواں گا تے جد پہلاں تُہاڈی سنگت نال میری کُجھ تسلّی ہو جاوے گی۔ تے تُسی مَینُوں اوس پاسے ٹور دیو گے۔

²⁵پر ایس ویلے مَیں پاک لوکاں دی خِدمت کرن لئی یرُوشلِیم نُوں جانا آں۔

²⁶کیوں جو مَکِدُنیہ تے اَخیہ دے لوکاں نُوں ایہہ چَنگا لگّا۔ پئی اوہ یرُوشلِیم دے پاک لوکاں وِچوں جیہڑے غرِیب نیں اوہناں لئی چندہ کرن۔

²⁷کِیتا تے رضامندی نال پر اوہ اوہناں دے دیندار وی نیں۔ کیوں جو جد غیر قوماں اوہناں دِیاں رُوحانی برکتاں وِچ شریک ہوئیاں۔ تے اوہناں نُوں وی چاہیدا سی پئی جِسمانی برکتاں وِچ اوہناں دی سیوا کرن۔

²⁸سو جد مَیں ایس کمّ نُوں مُکالاں گا تے ایس پَھل اُتّے اوہناں لئی مُہر لاواں گا۔ تے مَیں تُہاڈے کولوں ہو کے اِسفانیہ نُوں جاواں گا

²⁹تے مَیں جاننا آں پئی جدوں تُہاڈے کول آواں گا۔ تدوں مسِیح دی پُوری برکت لے کے آواں گا۔

³⁰بھراؤ مَیں یِسُوع مسِیح دا جیہڑا ساڈا خُداوند اے۔ واسطہ دے کے تے رُوح دی مُحبّت نُوں یاد دوا کے تُہاڈی مِنّت کرنا آں۔ پئی میرے لئی خُدا کولوں دُعا منگن وِچ میرے نال کوشش کرو۔

³¹پئی مَیں اوہناں توں جیہڑے یہُودیہ وِچ نافرمان نیں بچ جاواں نالے اوہ میری خِدمت جیہڑی مَیں یرُوشلِیم لئی کرنا آں پاک لوکاں نُوں منظُور ہوئے۔

³²تے مَیں جے خُدا چاہے تُہاڈے کول خُوشی نال آواں تے تُہاڈی سنگت وِچ سُکھ پاواں۔

³³ہُن تسلّی دا خُدا تُہاڈے سبھناں نال ہوئے آمِین۔