Read Western Panjabi رُومِیوں 16 Bible Online

رُومِیوں 16 - Western Panjabi bible

رُومِیوں 16

¹مَیں فِیبے دی جیہڑی ساڈی بھین تے کِنخریہ دی کلِیسیا دی ٹہلن اے۔ تُہانوں سونپیا آں۔

²پئی تُسی اوہنوں خُداوند وِچ قبول کرو۔ جیویں پاک لوکاں نُوں چاہیدا اے۔ تے جِس کِسے کمّ وِچ اوہنوں تُہاڈی لوڑ پَوے۔ تُسی اوہدی مدد کرو۔ کیوں جو اوہ آپ وی بتھیریاں دی سگوں میری وی مدد کرن والی سی۔

³پرسِکّلہ تے اَکوِلہ نُوں جیہڑے مسِیح یِسُوع وِچ میرے نال دے کمّ کرن والے نیں سلام آکھو۔

⁴اوہناں تے میری جان دے بدلے اپنا گلّ ڈاہ دِتّا۔ اوہناں دا نِرا مَیں ای نئیں پر غیر قوماں دِیاں سارِیاں کلِیسیاواں شُکر گُزار نیں۔

⁵نالے اوس کلِیسیا نُوں جیہڑی اوہناں دے گھر وِچ اے۔ سلام آکھو۔ میرے پیارے اِپینِتُس نُوں جیہڑا مسِیح لئی آسِیہ دا پہلا پَھل اے سلام آکھو۔

⁶مریم نُوں جِس تُہاڈے نال بُہت محنت کِیتی سلام آکھو۔

⁷میرے ساکاں اندرُنِیکُس تے یُونِیاس نُوں سلام آکھو۔ اوہ تے قید وِچ میرے ساتھی سن تے رسُولاں وِچ مشہُور نیں۔ تے مَیتھوں اگیترے مسِیح وِچ سن۔

⁸میرے خُداوند دے وِچ پیارے اَمپلیاطُس نُوں سلام آکھنا۔

⁹اُربانُس مسِیح وِچ ساڈے نال دے کمّ کرن والے نُوں تے میرے پیارے استخُس نُوں سلام آکھنا۔

¹⁰اَپلِّیس نُوں جیہڑا مسِیح وِچ مقبُول اے۔ سلام آکھنا۔ اَرِستُِبُولُس دے گھر دیاں نُوں میرا سلام آکھو۔

¹¹ہیرودیاں نُوں جیہڑا میرا ساک اے سلام آکھو نَرکِسُّس دے ٹبّر دے جِنّے خُداوند وِچ نیں۔ اوہناں نُوں سلام آکھو۔

¹²ترُوفَینہ تے ترُوفوسہ نُوں جیہڑیاں خُداوند وِچ محنت کر دیاں نیں سلام آکھو۔ پیاری پرسِس نُوں جِس خُداوند وِچ بُہت محنت کِیتی سلام آکھو۔

¹³رُوفس نُوں جیہڑا خُداوند وِچ چُنیا ہویا اے۔ تے اوہدی ماں نُوں جیہڑی میری وی ماں اے۔ سلام آکھو۔

¹⁴اَسُنکرِتُس تے فلِگون تے ہرمِیس تے پترُباس تے ہرماس تے بھراواں نُوں جیہڑے اوہناں دے نال نیں سلام آکھو۔

¹⁵فِلُلُگس تے یُولیہ تے نیریُوس تے اوہدی بھین تے اُلُمپاس تے سارے پاک لوکاں نُوں جیہڑے اوہناں دے نال نیں سلام آکھو۔

¹⁶تُسی پاک بوسہ لے کے اِک دُوجے نُوں سلام آکھو۔ مسِیح دِیاں سارِیاں کلِیسیاواں تُہانوں سلام آکھدیاں نیں۔

¹⁷پر بھراؤ! مَیں تُہاڈی مِنّت کرنا آں۔ تُسی اوہناں لوکاں توں جیہڑے اوس تعلِیم دے اُلٹ جیہڑی تُہانوں مِلی پُھٹ پان والے تے ٹھوکر دین والے نیں خبردار رہو تے اوہناں توں لانبھے رہو۔

¹⁸کیوں جو ایہو جِہے ساڈے خُداوند مسِیح دے غلام نئیں سگوں اپنے ڈِھڈ دے غلام نیں۔ تے چوپڑیاں چاپڑیاں گلّاں نال اوہ بھولیاں دیاں دِلاں نُوں بھچلاندے نیں۔

¹⁹کیوں جو تُہاڈی تابعداری ساریاں وِچ مشہُور ہوئی اے ایس کر کے مَیں تُہاڈے اُتّے خُوش آں پر مَیں چاہناں آں پئی تُسی بھلیائی وِچ سِیانے تے بُریائی وِچ نِیانے رہو۔

²⁰تسلّی دا خُدا چھیتی تُہاڈے پیراں ہیٹھ شیطان نُوں لتاڑے گا۔ ساڈے خُداوند یِسُوع مسِیح دا فضل تُہاڈے نال ہوئے۔

²¹تِیمُتِھیُس جیہڑا میرے نال کمّ کر دا اے۔ تے لُوکِیُس تے یاسون تے سوسِپطرُس جیہڑے میرے ساک نیں تُہانوں سلام آکھدے نیں۔

²²مَیں ترتِیُس جیہڑا خُداوند وِچ ایس خط دا لِکھن والا آں۔ تُہانوں سلام آکھنا آں۔

²³گَیُس جِہدے مَیں تے ساری کلِیسیا پَروہنے آں۔ تُہانوں سلام آکھدا اے۔ اِراستُس جیہڑا شہر دا خزانچی اے۔ تے بھرا کوارتُس تُہانوں سلام آکھدے نیں۔

²⁴[ساڈے خُداوند یِسُوع مسِیح دا فضل تُہاڈے سبھناں نال ہوئے۔ آمِین۔]

²⁵ہُن اوہدی جِہدی قُدرت اے۔ پئی میری خُوشخبری تے یِسُوع مسِیح دے ناں دی منادی دے سببّوں تُہانوں قیم رکھّے۔ اوس بھید دے ظاہر ہون دے سببّوں جیہڑا مُڈھوں ای چُھپیا رہیا۔

²⁶پر ہُن نبیاں دِیاں کِتاباں دی راہِیں ظاہر کِیتا گیا۔ تے ہمیشہ دے خُدا دے حُکم دے سببّوں سارِیاں قوماں نُوں ایس لئی دسیا گیا۔ پئی اوہ اِیمان دے تابعدار ہون۔

²⁷اوسے اکلّے سیانپ والے خُدا دی۔ یِسُوع مسِیح دی راہِیں سدا وڈیائی ہوئے۔ آمِین