Read Western Panjabi رُومِیوں 2 Bible Online

رُومِیوں 2 - Western Panjabi bible

رُومِیوں 2

¹سو اَے عیب لان والیا۔ بھانویں کون ہوویں تُوں جو عیب لانا ایں تیرا کُجھ عُذر نئیں۔ کیوں جو جیہڑی گلّ دا تُوں دُوجے اُتّے عیب لانا ایں اوسے دا تُوں اپنے آپ نُوں وَدّھ عَیبی بنانا ایں۔ تُوں جیہڑا عیب لانا ایں آپے ای اوہو کمّ کرنا ایں۔

²تے اسی جاننے آں۔ پئی اجیہے کمّ کرن والیاں اُتّے خُدا سچیائی نال حُکم لاندا اے۔

³اَے مر دا تُوں جیہڑا اجیہے کمّ کرن والیاں اُتّے عیب لانا ایں تے آپ ای اوہو کمّ کرنا ایں۔ ایہہ سمجھنا ایں۔ پئی تُوں خُدا دی عدالت توں بچ نکلیں گا؟

⁴یا تُوں اوہدی مِہربانی تے تحمّل تے صبر دی دَولت نُوں ماڑا جاننا ایں۔ تے نئیں سمجھدا پئی خُدا دی مِہربانی تینُوں تَوبہ دے راہ پاندی اے؟

⁵سگوں تُوں اپنے ڈاہڈے تے نا تَوبہ کرن والے دِل دے سببّوں اوس دِن لئی جِہدے وِچ قَہر تے خُدا دی سَچّی عدالت ظاہر ہوئے گی۔ اپنے لئی قَہر اکٹّھا کرنا ایں۔

⁶اوہ تے ہر اِک نُوں اوہدے کمّاں دے سببّوں بدلا دے گا۔

⁷اوہناں نُوں جیہڑے نیک کمّاں دی پَیروی کر کے وڈیائی تے عِزّت تے بقا نُوں لبّھدے نیں سدا دی زِندگی دے گا۔

⁸پر اوہناں اُتّے جیہڑے لڑاکے نیں تے سچیائی نُوں نئیں سگوں ناراستی نُوں مَن دے نیں قَہر تے غضب ہوئے گا۔

⁹ہر اِک بندے دی جان اُتّے جیہڑا بُریائی کر دا اے۔ بِپتا تے تنگی ہوئے گی۔ پہلاں یہُودی تے فیر یُونانی اُتّے۔

¹⁰پر وڈیائی تے عِزّت تے سلامتی ہر اِک نُوں جیہڑا نیک کمّ کر دا اے۔ پہلے یہُودی نُوں تے فیر یُونانی نُوں مِلے گی۔

¹¹کیوں جو خُدا دے اگّے کِسے دی رَئی نئیں ہوندی۔

¹²ایس لئی پئی جِنہاں بِناں شریعت پایاں گُناہ کِیتے اوہ بِناں شریعت دے ہلاک وی ہون گے تے جِنہاں شریعت پا کے گُناہ کِیتے اوہناں دا فیصلہ شریعت دے سببّوں ہوئے گا۔

¹³کیوں جو شریعت مَنّن والے وی خُدا دے اگّے راستباز نئیں ٹَھیرن گے۔ سگوں شریعت اُتّے چلّن والے۔

¹⁴ایس لئی پئی جد اوہ قوماں جیہڑیاں شریعت نئیں رکھدیاں اپنے سبھاؤ توں وی شریعت دے کمّ کرن تے اوہ بھانویں شریعت نئیں رکھدیاں اپنے لئی آپ شریعت نیں

¹⁵کیوں جو شریعت دِیاں گلّاں اپنے دِلاں وِچ لِکھیاں ہویاں وکھاؤندِیاں تے اوہناں دے دِل وی گواہی دیندے نیں۔ تے اوہناں دے خیال آپو وِچ الزام لاندے یا عُذر کر دے نیں۔

¹⁶اوس دِن جد خُدا میری خُوشخبری دے سببّوں یِسُوع مسِیح دی راہِیں بندیاں دِیاں لُکِیاں ہویاں گلّاں دا انصاف کرے گا۔

¹⁷پر جے تُوں یہُودی اکھواؤندا ایں۔ تے شریعت اُتّے بھروسا رکھنا ایں۔ تے خُدا اُتّے فخر کرنا ایں۔

¹⁸تے اوہدی مرضی جاننا ایں۔ تے شریعت دی تعلِیم پا کے چنگیاں شیواں پسند کرنا ایں۔

¹⁹تے اپنے اُتّے یقِین کر بَیٹھنا ایں۔ پئی مَیں اَنھیاں نُوں راہ پان والا تے ہنیرے وِچ بیہن والیاں لئی چانن۔

²⁰تے ناداناں دا گُرو تے نیانیاں دا اُستاد آں تے شریعت دے عِلم تے سچیائی دا نمونہ میرے کول اے۔

²¹تُوں جیہڑا دُوجے نُوں سکھانا ایں۔ اپنے آپ نُوں نئیں سِکھالدا۔ تُوں جیہڑا منادی کرنا ایں۔ پئی چوری نا کر۔ آپے ای چوری کرنا ایں؟

²²تُوں جیہڑا آکھنا ایں زنا نا کرنا۔ آپے ای زنا کرنا ایں؟ تُوں جیہڑا بُتاں توں نفرت کرنا ایں۔ آپ ای مَندراں نُوں لُٹّناں ایں۔

²³تُوں جیہڑا شریعت اُتّے فخر کرنا ایں۔ شریعت دے ٹالن نال خُدا دی بے عِزّتی کرنا ایں؟

²⁴کیوں جو لِکھیا ہویا اے۔ پئی تُہاڈے سبّب غیر قوماں وِچ خُدا دے ناں دی بے عِزّتی کِیتی جاندی اے۔

²⁵سُنتی بہن توں فائدہ تے اے جے تُوں شریعت اُتّے چلّیں۔ پر جے تُوں شریعت دا ٹالن والا ہوویں۔ تے تیرا سُنتی بہنا بے سُنتی جیہا ہوگیا۔

²⁶پر جے سُنتی نا بَیٹھے ہوئے شریعت دے حُکم مَنّن۔ تے اوہناں دا سُننی نا بہنا بہن دے برابر نا سمجھیا جائے گا؟

²⁷تے جیہڑے اُنج بیٹھے ای نئیں۔ جے شریعت نُوں مَنّن اوہ تینُوں جیہڑا سگوں سُنتی بَہہ کے تے کلام نُوں کول رکھ کے شریعت دا ٹالن والا ایں گُناہی نا ٹھہران گے؟

²⁸کیوں جو اوہ یہُودی نئیں جیہڑا وکھالے دا اے۔ تے نا اوہ سُنتی بہنا اے جیہڑا نِرا جِسمانی اے۔

²⁹سگوں ٹھیک یہُودی اوہو اے۔ جیہڑا اندروں اے تے سُنتی بہنا اوہو اے۔ جیہڑا دِل دا اے رسمی نا ہوئے پر رُوحانی ہوئے۔ اجیہے دی وڈیائی بندیاں ولّوں نئیں پر خُدا ولّوں اے۔