Read Western Panjabi رُومِیوں 7 Bible Online

رُومِیوں 7 - Western Panjabi bible

رُومِیوں 7

¹بھراؤ! تُسی نئیں جان دے (مَیں اوہناں نُوں آکھنا آں جیہڑے شریعت توں واقف نیں) پئی بندہ جد تیک جِیوندا رہندا اے اوہدے اُتّے شریعت دا وَس چلدا اے۔

²کیوں جو وِیاہی ہوئی زنانی جد تِیکر بندہ جِیوندا اے۔ شریعت ولّوں اوہدے تابع وِچ اے۔ پر جے اوہدا بندہ مر جائے۔ تے اوہ بندے دی شریعت توں چھڈائی گئی۔

³جے اوہ اپنے بندے دے جِیوندے جی دُوجے بندے دی ہو جائے تے اوہ بدکار اکھوائے گی پر جے اوہدا بندہ مر جائے۔ تے اوہ اوس شریعت توں اَزاد اے پئی جے اوہ دُوجے مرد دی ہو وی جائے۔ تے بدکار نئیں اے۔

⁴سو میرے بھراؤ! تُسی مسِیح دے بدن دی راہِیں شریعت ولّوں ایس کر کے مر گئے اوہ۔ پئی تُسی دُوجے دے جیہڑا مُردیاں وِچوں جوالیا گیا۔ ہو جاؤ۔ تاں جو اسی خُدا دے لئی پَھل لیاوے۔

⁵کیوں جو جد اسی جِسمانی ساں تَد گُناہ دِیاں خواہشاں جیہڑیاں شریعت دے سببّوں سن۔ ساڈے انگاں وِچ مَوت دے لئی پَھل لیاؤن نُوں زور کر دِیاں سن۔

⁶پر اسی اوہدے ولّوں مر کے جِہدے وِچ بَدّھے ساں شریعت توں ہُن ایتھوں تِیکر چھڈائے گئے آں۔ پئی اسی رُوح دے نَوِیں طریقے اُتّے خِدمت کریئے نا حرف دی پرانی رِیت اُتّے۔

⁷فیر اسی کِیہ آکھیئے؟ شریعت گُناہ اے؟ خُدا نا کرے سگوں بِناں شریعت دے مَیں گُناہ نُوں نئیں پچھاندا۔ کیوں مَیں لالچ نا جان دا جے شریعت نا آکھدی پئی تُوں لالچ نا کر۔

⁸پر گُناہ شریعت دے سبّب موقع پا کے میرے وِچ ہر طرح دا لالچ پَیدا کِیتا۔ کیوں جو شریعت باہجوں گُناہ مُردہ اے۔

⁹تے مَیں اگّے شریعت باہجوں جِیوندا ساں پر جد حُکم آیا گُناہ مُڑ جی اُٹھیا تے مَیں مر گیا۔

¹⁰تے اوہ حُکم جیہڑا زِندگی دے لئی سی۔ مَینُوں مَوت دے لئی معلُوم ہویا۔

¹¹کیوں جو گُناہ حُکم دی راہِیں موقع پا کے مَینُوں دھوکھا دِتّا تے اوسے دی راہِیں مَینُوں مار سُٹّیا۔

¹²سو شریعت تے پاک اے۔ تے حُکم پاک تے راست تے چَنگا اے۔

¹³پر جیہڑی شے چنگی اے۔ کِیہ میرے لئی مَوت بن گئی؟ خُدا نا کرے۔ پر گُناہ نے اوس چنگی شے دی راہِیں میرے لئی مَوت پَیدا کِیتی۔ پئی اوہدا گُناہ ہونا ظاہر ہوئے تاں جو گُناہ حُکم دی راہِیں حدّوں وَدّھ بُرا معلُوم ہوئے۔

¹⁴کیوں جو اسی جاننے آں پئی شریعت رُوحانی اے۔ پر مَیں جِسمانی آں تے گُناہ دے ہتّھ وِکیا ہویا۔

¹⁵کیوں جو جیہڑا کمّ مَیں کرنا آں اوہ مَیں نئیں جان دا۔ پر جیہڑا کمّ مَیں نئیں چاہندا سو مَیں کرنا آں۔ تے جِہدے توں مَینُوں کراہت اے اوہی مَیتھوں ہوندا اے۔

¹⁶سو جے مَیتھوں اوہی ہوندا اے جیہڑا مَیں نئیں چاہندا۔ تے مَیں اِقرار کرنا آں۔ پئی شریعت چنگی اے۔

¹⁷تے ہُن مَیں اوہدا کرن والا نئیں رہیا سگوں گُناہ جیہڑا میرے وِچ وَسدا اے۔ اوہو ای کر دا اے۔

¹⁸کیوں جو مَینُوں معلُوم اے پئی میرے وِچ یعنی میرے جِسم وِچ کوئی چنگی شے نئیں وَسدی۔ سو چاہ تے مَیں کرنا آں۔ پر جو کُجھ چَنگا اے۔ اوہ مَیتھوں نئیں ہوندا۔

¹⁹پئی جیہڑی بھلیائی مَیں چاہناں آں مَیں نئیں کر دا۔ پر بَھیڑے کمّ جیہڑے مَیں نئیں چاہندا اوہی مَیں کرنا آں۔

²⁰سو جے مَیں اوہو کرنا آں جیہڑا نئیں چاہندا تے ہُن مَیں اوہدا کرن والا نا رہیا۔ سگوں گُناہ جیہڑا میرے وِچ وَسدا اے۔

²¹فیر مَینُوں شریعت ایویں معلُوم ہوندی اے۔ پئی جد مَیں نیکی کرنی چاہناں آں۔ تے بدی میرے سامھنے اے۔

²²کیوں جو مَیں تے دِلوں خُدا دی شریعت توں خُوش آں۔

²³پر دُوجی شریعت مَیں اپنے انگاں وِچ ویکھنا آں۔ جیہڑی میری عقل دی شریعت نال لڑائی کر کے مَینُوں گُناہ دی اوس شریعت دے ہتّھ جیہڑی میرے انگاں وِچ اے قید کر کے پھڑاؤندی اے۔

²⁴ہائے مَیں تے بڑا اَوکھا آں۔ ایس مَوت دے بدن توں مَینُوں کون چھڈاوے گا؟

²⁵مَیں اپنے خُداوند یِسُوع مسِیح دی راہِیں خُدا دا شُکر کرنا آں۔ ایس طرح مَیں آپ اپنی عقل نال تے خُدا دی شریعت دا غلام آں۔ پر اپنے جِسم نال گُناہ دی شریعت دا۔