Read Western Panjabi رُومِیوں 8 Bible Online

رُومِیوں 8 - Western Panjabi bible

رُومِیوں 8

¹سو ہُن اوہناں اُتّے کُجھ وی سزا دا حُکم نئیں۔ جیہڑے مسِیح یِسُوع وِچ نیں۔

²کیوں جو جیہڑی زِندگی مسِیح یِسُوع وِچ اے۔ اوہدے رُوح دی شریعت مَینُوں گُناہ تے مَوت دی شریعت توں چھڈا دِتّا۔

³ایس لئی پئی جیہڑی گلّ جِسم دی کمزوری دے سببّوں شریعت توں نا ہو سکی۔ خُدا اپنے ای پُتر نُوں گُناہی جِسم دی صُورت وِچ تے گُناہ دی قُربانی لئی گھل کے جِسم وِچ گُناہ دی سزا دا حُکم کِیتا۔

⁴تاں جو شریعت دا راست حُکم ساڈے وِچ جیہڑے جِسم دے سببّوں نئیں سگوں رُوح دے سببّوں ٹُر نیں آں۔ پُورا کِیتا جائے۔

⁵کیوں جو اوہ لوک جیہڑے جِسمانی نیں اوہ جِسمانی گلّاں سوچدے نیں پر اوہ جیہڑے رُوحانی نیں اوہ رُوحانی گلّاں سوچدے نیں۔

⁶کیوں جو جِسمانی نِیّت مَوت اے پر رُوحانی نِیّت زِندگی تے چَین اے۔

⁷ایس لئی پئی جِسمانی نِیّت خُدا دے برخلاف اے۔ کیوں جو اوہ خُدا دی شریعت دی تابعدار نئیں اے۔ تے نا ہو سکدی اے۔

⁸تے جیہڑے جِسمانی نیں خُدا نُوں خُوش نئیں کر سکدے۔

⁹پر تُسی جِسمانی نئیں سگوں رُوحانی ہو۔ جے خُدا دا رُوح تُہاڈے وِچ وَسدا ہوئے۔ پر جِہدے وِچ مسِیح دا رُوح نئیں اوہ اوہدا نئیں اے۔

¹⁰تے جے مسِیح تُہاڈے وِچ اے تاں بدن گُناہ دے سبّب مُردہ اے۔ پر رُوح راستبازی دے سبّب زِندہ اے۔

¹¹پر جے اوہدا رُوح جِس یِسُوع نُوں مُردیاں وِچوں جوالیا تُہاڈے وِچ وَسدا اے تے اوہ جِس مسِیح یِسُوع نُوں مُردیاں وِچوں جوالیا تُہاڈیاں مرن والیاں بدناں نُوں وی اپنے رُوح دی راہِیں جیہڑا تُہاڈے وِچ وَسدا اے جوا لے گا۔

¹²سو بھراؤ! اسی قرضئی تے آں پر جِسم دے نئیں پئی جِسم دے سببّوں زِندگی کِٹئے۔

¹³کیوں جو جے جِسم دے سببّوں زِندگی کٹّو تاں تُہانوں مرنا پئے گا۔ پر جے تُسی رُوح نال بدن دیاں کمّاں نُوں مار دے رہو۔ تے جِیوندے رہو گے۔

¹⁴ایس لئی پئی جِنّے خُدا دے رُوح دے سببّوں چلدے نیں اوہو ای خُدا دے پُتر نیں۔

¹⁵کیوں جو تُہانوں تے غلامی دی رُوح نئیں مِلی۔ پئی فیر ڈر جاؤ سگوں پُتریلا ہون دا رُوح مِلیا جِہدے وِچ اسی ابّا یعنی اَے باپ آکھ کے سَدّ نیں آں۔

¹⁶رُوح آپ ای ساڈے رُوح نال گواہی دیندا اے پئی اسی خُدا دے بچّے آں۔

¹⁷تے جد بچّے ہوئے تے وارث وی یعنی وارث خُدا دے۔ تے وِرثے وِچ مسِیح نال شریک ایس شرط اُتّے پئی اسی اوہدے نال دُکھ وِچ بھوگِیئے پئی اوہدے نال سانُوں وی جلال لَبھّے۔

¹⁸کیوں جو میری سمجھ وِچ ایس ویلے دے دُکھ دَرد اوس جلال دے اگّے کُجھ وی نئیں جیہڑا ساڈے اُتّے ظاہر ہوئے گا۔

¹⁹پئی خلقت بڑی چاہ نال خُدا دے پُتراں دے ظاہر ہون دا راہ ویکھدی اے۔

²⁰کیوں جو خلقت نکمّے پن دے تابعیاں کِیتی گئی۔ اپنی مرضی نال نئیں پر اوہدے سبّب جِس اوہنوں تابعیاں کِیتا۔

²¹ایس آس اُتّے پئی خلقت فنا دے قبضے توں چُھٹ کے خُدا دے بچّیاں دی جلال والی خلاصی نُوں حاصِل کرے گی۔

²²کیوں جو اسی جاننے آں پئی ساری خلقت رَل کے تڑپھدی اے تے ہُن تِیکر اوہنوں پِیڑاں لگِیاں ہویاں نیں۔

²³تے نِری اوہو نئیں پر اسی وی جِنہاں نُوں رُوح دے پہلے پَھل مِلے۔ آپ ای اپنے وِچ تڑپھنے آں۔ تے پُتریلے ہون دے یعنی اپنے بدن دے چُھٹکارے دی اُڈِیک وِچ آں۔

²⁴پئی اسی تے آس نال بچ گئے ساں۔ پر اوہ آس جیہڑی دِسدی اے آس نا رہی کیوں جو جیہڑی شے نظر آوے اوہدی کون آس رکھّے؟

²⁵پر جِہنُوں اسی نئیں ویکھدے جے اوہدی آس رکھیے۔ تے صبر نال اوہدی اُڈِیک وِچ رہنے آں۔

²⁶تے ایسے طرح رُوح وی ساڈیاں کمزوریاں وِچ ساڈی مدد کر دا اے کیوں جو جیویں چاہیدا اے۔ اسی نئیں جان دے پئی کِیہ دُعا منگیے۔ پر اوہ رُوح اجیہے ہوکے بھرکے جِنہاں دا بیان نئیں ہوسکدا۔ ساڈی سفارِش کر دا اے۔

²⁷تے اوہ جیہڑا دِلاں دا جانن والا اے جان دا اے۔ پئی رُوح دی کِیہ نِیّت اے۔ کیوں جو اوہ خُدا دی مرضی دے سببّوں پاک لوکاں دی سفارِش کر دا اے۔

²⁸تے اسی جاننے آں پئی سارِیاں شیواں اوہناں لئی جیہڑے خُدا نال مُحبّت رکھدے نیں رَل کے فائدہ پَیدا کر دیاں نیں ایہہ اوہ نیں جیہڑے خُدا دے اِرادے دے سببّوں سَدّے گئے نیں۔

²⁹کیوں جو جِنہاں نُوں اوس پہلے توں جانیا۔ اوہناں نُوں اگّے توں مُقرّر وی کِیتا پئی اوہدے پُتر دی شکل بنن۔ تاں جو اوہ بتھیرے بھراواں وِچ پلیٹھا ہوئے۔

³⁰تے جِنہاں نُوں اوس اگّے توں مُقرّر کِیتا اوس اوہناں نُوں سدّیا وی۔ تے جِنہاں نُوں سدّیا اوہناں نُوں راستباز وی ٹھیرایا۔ تے جِنہاں نُوں راستباز ٹھیرایا اوہناں نُوں اوس جلال وی دِتّا۔

³¹ہُن اسی ایہناں گلّاں دی بابت کِیہ آکھئے؟ جے خُدا ساڈے ولّ اے۔ تے کون ساڈے برخلاف ہوئے گا؟

³²جِس اپنے ای پُتر نُوں بچا نا رکھیا۔ سگوں اوہنوں اساں سبھناں دے بدلے حوالے کِیتا سو اوہدے نال ای سانُوں سارِیاں شیواں وی کِیویں نا بخشے گا؟

³³خُدا دے چُنیاں ہویاں نُوں کیہڑا الزام دے گا؟ ایہہ خُدا ای جیہڑا سَتی بناندا اے۔

³⁴کیہڑا اے جیہڑا ڈنڈ لاندا اے؟ ایہہ مسِیح یِسُوع اے جیہڑا مر گیا۔ آہو سگوں اوہی جیہڑا مُردیاں وِچوں جوالیا گیا تے خُدا دے سَجّے پاسے اے۔ تے ساڈی سفارِش وی کر دا اے۔

³⁵کون سانُوں مسِیح دی مُحبّت توں وَکھ کرے گا؟ مُصِیبت یا تنگی یا ظُلم یا کال یا ننگ یا خطرہ یا تلوار؟

³⁶جیویں لِکھیا اے۔ اسی تیری خاطر سارا دِن مارے جانے آں۔ اسی کوہِیاں جان والِیاں بھیڈاں وانگُوں گِنے جانے آں۔

³⁷تَد وی اسی ایہناں سبھناں گلّاں وِچ اوہدی راہِیں جِس ساڈے نال مُحبّت کِیتی حدّوں وَدّھ فتح پانے آں۔

³⁸کیوں جو مَینُوں یقِین اے پئی نا مَوت نا زِندگی۔ نا فرِشتے نا حکُومتاں۔ نا ہُن دِیاں شیواں تے نا آؤن والِیاں۔ تے نا طاقتاں۔

³⁹نا اُچیائی نا ڈونگھیائی تے نا کوئی ہور مخلُوق سانُوں خُدا دی اوس مُحبّت توں جیہڑی یِسُوع مسِیح ساڈے خُداوند وِچ اے وَکھ کر سکے گی۔