Read Western Panjabi ۱ـکُرِنتھِیوں 10 Bible Online

۱ـکُرِنتھِیوں 10 - Western Panjabi bible

۱ـکُرِنتھِیوں 10

¹بھراؤ! مَیں نئیں چاہندا۔ پئی تُسی ایس گلّ نُوں نا جانو۔ پئی ساڈے سارے پئیو دا دے بدّل دے ہیٹھ سن۔ تے سارے سمُندر وِچوں لنگھ گئے۔

²تے سبھناں ای اوس بدّل تے سمُندر وِچ مُوسیٰ دا بپتِسمہ لیا۔

³تے سبھناں اِکّوئی رُوحانی خُوراک کھادِی۔

⁴تے سبھناں اِکّوئی رُوحانی پانی پِیتا۔ کیوں جو اوہ اوس رُوحانی چٹان وِچوں پانی پِیندے سن۔ جیہڑی اوہناں دے نال نال ٹُردی سی۔ تے اوہ چٹان مسِیح سی۔

⁵پر اوہناں وِچوں بتھیریاں نال خُدا خُوش نا ہویا۔ سو اوہ بیابان وِچ ڈھیر ہوگئے۔

⁶ہُن ایہہ گلّاں ساڈے واسطے نصِیحت ہویاں۔ تاں جو اسی بُریاں شیواں دی چاہ نا کریئے۔ جیویں اوہناں کِیتی۔

⁷تے تُسی بُتاں دے پُوجن والے نا بنو۔ جیویں اوہناں وِچوں بعضے بن گئے سن۔ جیویں لِکھیا اے پئی لوک کھان پِین بَیٹھے۔ فیر اُٹھ کے نچّن کُدّن لگّے۔

⁸تے اسی حرامکاری نا کریئے۔ جیویں اوہناں وِچوں بعضیاں کِیتی۔ تے اِکّوئی دِن وِچ تریئی ہزار مارے گئے۔

⁹تے اسی خُداوند نُوں نا ازمایئے۔ جیویں اوہناں وِچوں بعضیاں ازمایا۔ تے سپّاں اوہناں نُوں ہلاک کِیتا۔

¹⁰تُسی نا کُڑ کُڑاؤ جیویں اوہناں وِچوں کئی کُڑ کُڑائے۔ تے ہلاک کرن والے توں ہلاک ہوئے۔

¹¹ایہہ گلّاں اوہناں دی نصِیحت لئی ہویاں۔ تے ساڈے اخِیری زمانے والیاں دے سمجھان واسطے لِکھیاں گِئیاں۔

¹²سو جیہڑا اپنے آپ نُوں پَکیّاں سمجھدا اے سو خبردار رہے پئی ڈِگّ نا پَوے۔

¹³تُسی کِسے اجیہی ازمایش وِچ نئیں پئے۔ جیہڑی بندے دی برداشت توں باہر ہوئے۔ تے خُدا سَچّا اے۔ اوہ تُہانوں تُہاڈی طاقت توں وَدّھ ازمایش وِچ نئیں پَین دے گا۔ سگوں ازمایش وِچوں نِکل جان دا راہ وی بناوے گا۔ تاں جو تُسی برداشت کر سکو۔

¹⁴ایس لئی میرے بھراؤ۔ بُتاں دی پُوجا توں بچو۔

¹⁵مَیں تُہانوں سیانیاں سمجھ کے تُہاڈے نال گلّ کرنا آں۔ جو کُجھ مَیں آکھنا آں۔ تُسی آپ اوہنوں ازماؤ۔

¹⁶اوہ برکت دا پیالہ جِہدے اُتّے اسی برکت منگنے آں۔ مسِیح دے خُون دی شراکت نئیں؟ اوہ روٹی جیہڑی اسی توڑنے آں۔ مسِیح دے بدن دی شراکت نئیں؟

¹⁷ایس کر کے پئی روٹی اِکّوئی اے۔ ایس لئی اسی جو بتھیرے آں اِکّوئی جِسم آں۔ کیوں جو اسی سارے اوسے اِکّوئی روٹی وِچ سِیری ہُنے آں۔

¹⁸جیہڑے جِسم ولّوں اِسرائیلی نئیں اوہناں ولّوں ویکھو۔ قُربانی دا گوشت کھان والے قُربان گاہ دے شریک نئیں؟

¹⁹سو مَیں کِیہ آکھنا آں؟ پئی بُتاں دی قُربانی کوئی شے اے؟ یا بُت کُجھ شے اے؟

²⁰نئیں مَیں سگوں ایہہ آکھنا آں پئی جیہڑی قُربانی غیر قوماں کر دیاں نیں۔ شیطاناں اگّے قُربانی کر دیاں نیں نا خُدا اگّے۔ تے مَیں نئیں چاہندا پئی تُسی شیطاناں دے شریک ہوؤو۔

²¹تُسی خُداوند دے پیالے تے شیطاناں دے پیالے دوہاں وِچوں نئیں پی سکدے۔ خُداوند دے دسترخوان تے شیطان دے دسترخوان دوہاں وِچ شریک نئیں ہوسکدے۔

²²کِیہ اسی خُداوند نُوں غیرت دوانے آں؟ کِیہ اسی اوہدے نالوں زوراور آں؟

²³سارِیاں شیواں روا تے ہَین۔ پر سارِیاں شیواں فائدے والیاں نئیں۔ سارِیاں شیواں روا تے ہَین۔ پر سارِیاں ترقی دا سبّب نئیں۔

²⁴کوئی اپنا فائدہ نا لَبھّے سگوں دُوجے دا۔

²⁵جو کُجھ قصائِیاں دی دُکاناں اُتّے وِکدا اے۔ سو کھاؤ۔ تے دِین دا خیال کر کے کُجھ نا پُچھو۔

²⁶کیوں جو زمین تے اوہدی بھرپُوری خُداوند دی اے۔

²⁷جے بے اِیماناں وِچوں کوئی تُہاڈی روٹی ٹھاکے تے تُہاڈی مرضی ہوئے تاں جو کُجھ تُہاڈے اگّے رکھیا جائے کھالَو۔ تے دین دا خیال کر کے کُجھ نا پُچھو۔

²⁸پر جے کوئی تُہانوں آکھے۔ پئی ایہہ قُربانی دا گوشت اے۔ تے اوہدے سببّوں جِس تُہانوں دسیا تے دِین دے خیال دے سبّب نا کھاؤ۔

²⁹دِینی خیال توں میرا مطلب تیرا خیال نئیں۔ سگوں اوس دُوجے دا اے۔ میری اَزادی دُوجے بندے دے خیال نال کیوں ویکھی جائے۔

³⁰جے مَیں شُکر کر کے کھاناں آں۔ تے جیہڑی شے اُتّے شُکر کرنا آں۔ اوہدے سببّوں کاہدے لئی بدنام کِیتا جاناں آں۔

³¹سو تُسی کھاؤ یا پِیو جو کُجھ کرو سبھ کُجھ خُدا دے جلال لئی کرو۔

³²تُسی نا یہُودِیاں دی ٹھوکر دا سبّب بنو۔ نا یُونانِیاں تے نا خُدا دی کلِیسیا دے۔

³³سو مَیں وی سبھناں گلّاں وِچ سبھناں نُوں خُوش کرنا آں۔ تے اپنا نئیں پر بتھیریاں دا فائدہ لبّھنا آں۔ پئی بچ جان۔