Read Western Panjabi ۱ـکُرِنتھِیوں 12 Bible Online

۱ـکُرِنتھِیوں 12 - Western Panjabi bible

۱ـکُرِنتھِیوں 12

¹ہُن بھراؤ! مَیں نئیں چاہندا پئی تُسی رُوحانی نِعمتاں ولّوں بے خبر رہو۔

²تُسی جان دے ہو پئی جد تُسی غیر قوم سو۔ تے گُونگے بُتاں دے پِچّھے جیویں کوئی لے جاندا سی اوسے طرح جاندے سو۔

³سو مَیں تُہانوں دسنا آں پئی جیہڑا خُدا دے رُوح دی ہدایت نال بولدا اے اوہ نئیں آکھدا پئی یِسُوع لعنتی اے۔ تے نا کوئی پاک رُوح بِناں آکھ سکدا ایہہ۔ پئی یِسُوع خُداوند اے۔

⁴نِعمتاں تے طرح طرح دِیاں نیں پر رُوح اِکّوئی اے۔

⁵تے خِدمتاں وی طرح طرح دِیاں نیں پر خُداوند اِکّوئی اے۔

⁶تے تاثِیراں وی طرح طرح دِیاں نیں پر خُداوند اِکّوئی اے۔ جیہڑا ساریاں وِچ ہر طرح دا اثر پَیدا کر دا اے۔

⁷پر ہر کِسے وِچ رُوح دا ظاہر ہونا فائدہ پُچان لئی ہوندا اے۔

⁸کیوں جو اِک نُوں رُوح دی راہِیں حِکمت دا کلام مِلدا اے تے دُوجے نُوں اوسے رُوح دی مرضی نال عِلم دا کلام۔

⁹کِسے نُوں اوسے رُوح نال اِیمان تے کِسے نُوں اوسے اِک رُوح نال شفا دین دی نِعمت۔

¹⁰تے کِسے نُوں کراماتاں کرن دِیاں قُدرتاں۔ کِسے نُوں نبُوّت کِسے نُوں رُوحاں دی پہچان۔ کِسے نُوں طرح طرح دِیاں زباناں۔ کِسے نُوں زباناں دا ترجمہ کرنا۔

¹¹پر ایہہ سارِیاں اوہو اِکّو رُوح کر دا اے تے جِہنُوں چاہندا اے۔ ونڈ دا اے۔

¹²کیوں جو جیویں جِسم اِک اے تے اوہدے انگ بتھیرے نیں۔ تے جِسم دے سارے انگ بھانویں بتھیرے نیں پر آپو وِچ رَل کے اِکّوئی جِسم نے۔ ایسے طرح مسِیح وی اے۔

¹³کیوں جو اساں ساریاں بھانویں یہُودی ہوئے بھانویں یُونانی بھانویں غلام بھانویں اَزاد اِکّو رُوح دی راہِیں اِک جِسم ہون لئی بپتِسمہ لیا تے سبھناں نُوں اِکّو رُوح پیا یا گیا۔

¹⁴کیوں جو جِسم وِچ اِکّو انگ نئیں سگوں بتھیرے نیں۔

¹⁵جے پَیر آکھے پئی ایس کر کے پئی مَیں ہتّھ نئیں ایس لئی بدن دا نئیں تے اوہ ایس سببّوں جِسم وِچوں خارج تے نئیں ہو جاندا۔

¹⁶تے جے کنّ آکھے پئی ایس کر کے پئی مَیں اَکھ نئیں ایس لئی جِسم دا نئیں تے اوہ ایس سببّوں جِسم وِچوں خارج تے نئیں۔

¹⁷جے سارا جِسم اَکھ ای ہوندا تے سُننا کِتّھوں ہوندا جے سُننا ای سُننا ہوندا تے سُنگھنا کِتّھوں ہوندا۔

¹⁸پر اصل وِچ خُدا ہر اِک انگ نُوں جِسم وِچ اپنی مرضی دے سببّوں رکھیا اے۔

¹⁹جے اوہ سارے اِکّو انگ ہوندے۔ تے بدن کِتّھے ہوندا۔

²⁰پر ہُن انگ تے بتھیرے نیں پر جِسم اِکّوئی اے۔

²¹سو اَکھ ہتّھ نُوں نئیں آکھ سکدی پئی مَینُوں تیری کوئی لوڑ نئیں۔ تے نا سِر پَیر نُوں آکھ سکدا اے۔ پئی مَینُوں تیری لوڑ نئیں۔

²²سگوں جِسم دے اوہ انگ جیہڑے ساریاں نالوں ماڑے معلُوم ہوندے نیں بُہت ای ضرُوری نیں۔

²³تے جِسم دے اوہ انگ جِنہاں نُوں ہورناں نالوں اسی حِقیر جاننے آں اوہناں نُوں ای وَدّھ عِزّت دینے آں۔ تے ساڈے کوجھے انگ بُہت سوچَجّے ہو جاندے نیں۔

²⁴پر ساڈے سوچَجّے انگاں نُوں لوڑ نئیں۔ پر خُدا نے جِسم نُوں ایس طرح بنایا اے۔ پئی جیہڑے انگ لوڑ والے اوسے نُوں وَدّھ عِزّت دِتّی جاوے۔

²⁵تاں جو جِسم وِچ ونڈ نا پَے جاوے۔ سگوں سارے انگ اِک دُوجے دا اِکّو جیہا فِکر کرن۔

²⁶سو جے اِک انگ نُوں دُکھ ہوندا اے۔ تے ساریاں انگاں نُوں اوہدے نال دُکھ ہوندا اے۔ تے جے اِک انگ نُوں عِزّت مِلدی اے تے سارے انگ اوہدے نال خُوش ہوندے نیں۔

²⁷ایویں تُسی مِل کے مسِیح دا بدن ہو تے وکھرے وکھرے انگ ہو۔

²⁸تے خُدا نے کلِیسیا وِچ وَکھو وَکھ بندے مُقرّر کِیتے۔ پہلے رسُول دُوجے نبی ترِیجے اُستاد فیر کراماتاں وکھان والے۔ فیر بیماریاں ولّ کرن والے۔ مدد کرن والے۔ انتظام کرن والے۔ وَن سَووَنِیاں زباناں بولن والے۔

²⁹کِیہ سارے رسُول نیں؟ کِیہ سارے نبی نیں؟ کِیہ سارے اُستاد نیں؟ کِیہ سارے کراماتاں وکھان والے نیں؟

³⁰کِیہ ساریاں نُوں چَنگیاں کرن دی قُوّت مِلی ہوئی اے؟ کِیہ سارے وَن سَووَنِیاں بولیاں بولدے نیں؟ کِیہ سارے ترجمہ کر دے نیں؟

³¹تُسی وی وڈّی توں وڈّی نِعمتاں دی چاہ رکھو۔ پر ساریاں نالوں ہور وی چَنگا طریقہ مَیں تُہانوں دسنا آں۔