Read Western Panjabi ۱ـکُرِنتھِیوں 16 Bible Online

۱ـکُرِنتھِیوں 16 - Western Panjabi bible

۱ـکُرِنتھِیوں 16

¹ہُن اوس چندے دی بابت جیہڑا پاک لوکاں لئی کِیتا جاندا اے۔ جیویں مَیں گلِتیہ دی کلِیسیاواں نُوں حُکم دِتّا اے۔ اوسے طرح تُسی وی کرو۔

²ہفتے دے پہلے دِن تُہاڈے وِچوں ہر اِک اپنے قدر سیتی کُجھ اپنے کول رکھ چھڈے تاں جو میرے آؤن اُتّے چندے نا کرنے پَین۔

³تے جدوں مَیں آواں گا تَد جِنہاں نُوں تُسی منظُور کرو گے اوہناں نُوں مَیں خط دے کے گھل دیاں گا۔ پئی تُہاڈی خَیرات یرُوشلِیم وِچ اپڑا دین۔

⁴تے جے میرا وی جانا ٹھیک ہوئے تے اوہ میرے نال جان گے۔

⁵تے مَیں مَکِدُنیہ ہو کے تُہاڈے کول آواں گا۔ کیوں جو مَیں مَکِدُنیہ وِچوں ای ہو کے جاناں اے۔

⁶پر شاید مَیں تُہاڈے کول ای رہواں گا تے سِیال وی تُہاڈے کول کٹّاں گا۔ تاں جو جیہڑے پاسے جانا چاہاں۔ تُسی مَینُوں اوس پاسے ٹور دیو۔

⁷کیوں جو مَیں ہُن راہ وِچ تُہانوں نئیں مِلنا چاہندا سگوں مَینُوں آس اے۔ پئی جے خُداوند دی مرضی ہوئی تے کُجھ چِر تُہاڈے کول ٹِکاں گا۔

⁸پر مَیں پِنتیکُست دی عید توڑی اِفِسُس وِچ رہاں گا۔

⁹کیوں جو میرے لئی اِک وَڈا سارے کمّ دا بُوہا لتّھا اے۔ تے وَیری بتھیرے نیں۔

¹⁰جے تِیمُتِھیُس آ جائے تے خیال رکھنا۔ پئی اوہ تُہاڈے کول بے فِکر رہے کیوں جو اوہ میرے وانگُوں خُدا دا کمّ کر دا اے۔

¹¹سو کوئی اوہنوں ماڑا نا جانے سگوں اوہنوں خیریں مِہریں ایدھر ٹور دیو۔ تاں جو میرے کول آ جائے مَیں اوہنوں پیا اُڈِیکناں آں۔ پئی بھراواں سَنے آ جاوے۔

¹²تے بھرا اُپلّوس دے مَیں بڑے تَرلے کِیتے۔ پئی بھراواں نال تُہاڈے کول جائے پر اجے تے اوہ جان نُوں بالکل راضی نئیں ہویا۔ پر جد اوہنوں موقع مِلے گا۔ تے جائے گا۔

¹³جاگدے رہو اِیمان وِچ پکّے رہو۔ بندے بنو تگڑے ہوؤ۔

¹⁴جو کُجھ کر دے ہو مُحبّت نال کرو۔

¹⁵بھراؤ! تُسی ستِفناس دے ٹبّر نُوں جان دے اوہ۔ پئی اوہ اَخیہ دے پہلے پَھل نیں تے پاک لوکاں دی سیوا لئی تیار رہندے نیں۔

¹⁶سو تُہاڈے اگّے عرض کرنا آں پئی اجیہے لوکاں دے تابعیاں رہو۔ سگوں ہر اِک دے جیہڑے ایس کمّ تے محنت وِچ سِیری نیں۔

¹⁷تے مَیں ستِفناس تے فرتُوناتُس تے اخیکُس دے آؤن توں خُوش آں۔ کیوں جو کُجھ تُہاڈے توں رہ گیا سی اوہناں پُورا کر دِتّا۔

¹⁸تے اوہناں میری تے تُہاڈی رُوح نُوں تازیاں کِیتا سو ایہو جِہیاں نُوں مَنّوں۔

¹⁹آسِیہ دِیاں کلِیسیاواں تُہانوں سلام آکھدیاں نیں اَکوِلہ تے پرسِکّلہ اوس کلِیسیا سَنے جیہڑی اوہناں دے گھر وِچ اے۔ تُہانوں خُداوند وِچ بُہت بُہت سلام آکھدے نیں۔

²⁰سارے بھرا تُہانوں سلام آکھدے نیں۔ پاک بوسہ لے کے آپو وِچ سلام آکھو۔

²¹مَیں پَولُس اپنے ہتّھ نال سلام لِکھناں آں

²²جیہڑا خُداوند نُوں پیار نئیں کر دا سو لعنتی ہوئے۔ ساڈے خُداوندا آ۔

²³خُداوند یِسُوع مسِیح دا فصل تُہاڈے اُتّے ہوندا رہے۔

²⁴میری مُحبّت مسِیح یِسُوع وِچ تُہاڈے سبھناں دے نال رہے۔ آمِین