Read Western Panjabi ۱ـکُرِنتھِیوں 2 Bible Online

۱ـکُرِنتھِیوں 2 - Western Panjabi bible

۱ـکُرِنتھِیوں 2

¹تے بھراؤ! جد مَیں خُدا دے بھیت دی منادی کر دا ہویا تُہاڈے کول آیا۔ تے اُچّے درجے دے کلام یا دنائی نال نئیں آیا

²کیوں جو مَیں ایہہ اِرادہ کر لیا سی پئی تُہاڈے وِچ یِسُوع مسِیح سگوں صلِیب دِتّے ہوئے مسِیح دے بِناں ہور کُجھ نا جاناں گا۔

³تے مَیں کمزوری تے ڈر تے بڑے تَھر تَھر کمبن دی حالت وِچ تُہاڈے کول رہیا۔

⁴تے میرے کلام تے میری منادی وِچ دنائی دِیاں پَرچا لین والِیاں گلّاں نئیں سن سگوں اوہ رُوح تے قُدرت نال ثابت ہوندیاں سن۔

⁵تاں جو تُہاڈا اِیمان بندیاں دی دنائی اُتّے نا بنیا ہوئے۔ سگوں خُدا دی قُدرت اُتّے۔

⁶فیر وی سیانیاں وِچ اسی حِکمت دِیاں گلّاں کرنے آں۔ پر ایس دُنیا دی تے ایس جہان دے ناس ہون والیاں سرداراں دی حِکمت نئیں۔

⁷سگوں اسی خُدا دی اوہ لُکی ہوئی حِکمت بھیت وانگر بیان کرنے آں۔ جِہنُوں خُدا نے دُنیا دے مُڈھ توں پہلاں ساڈے جلال واسطے مُقرّر کِیتا سی۔

⁸تے اوہنوں ایس جہان دے سرداراں وِچوں کِسے نا سہاتا کیوں جو جے سمجھدے تے جلال دے خُداوند نُوں صلِیب نا دیندے۔

⁹سگوں جیویں لِکھیا اے۔ اوسے طرح ہویا پئی جیہڑیاں شیواں نا اَکھّیاں ویکھیاں نا کنّاں سُنیاں نا بندیاں دے دِلاں وِچ آئِیاں۔ جِنّیاں شیواں خُدا نے اپنے پیار کرن والیاں لئی تیار کر دِتّیاں۔

¹⁰پر ساڈے اُتّے خُدا اوہناں نُوں رُوح دی راہِیں ظاہر کِیتا۔ کیوں جو رُوح سارِیاں گلّاں سگوں خُدا دِیاں ڈُوہنِگیاں گلّاں وی بھال کر لَیندا اے۔

¹¹کیوں جو بندیاں وِچوں کون کِسے بندے دا حال جان دا اے۔ اوس بندے دی رُوح دے بِناں جیہڑی اوہدے وِچ اے۔ ایس طرح خُدا دے رُوح بِناں کوئی خُدا دا حال نئیں جان دا۔

¹²پر سانُوں دُنیا دی رُوح نئیں۔ سگوں اوہ رُوح مِلیا اے جیہڑا خُدا ولّوں اے۔ تاں جو اوہناں گلّاں نُوں جانئے جیہڑیاں خُدا سانُوں دان کِیتیاں نیں۔

¹³تے اسی ایہناں گلّاں نُوں اوہناں لفظاں وِچ نئیں بیان کر دے۔ جیہڑے اِنسانی حِکمت نال سانُوں سِکھائے گئے ہون۔ سگوں اوہناں لفظاں وِچ جیہڑے رُوح سِکھائے نیں۔ تے رُوحانی گلّاں نُوں رُوحانی گلّاں نال جاچنے آں۔

¹⁴پر نفس دا بندہ خُدا دے رُوح دِیاں گلّاں نئیں مَندا کیوں جو اوہ اوہدے بھانیں مُورکھ دِیاں گلّاں نیں۔ تے اوہ اوہناں نُوں سمجھ نئیں سکدا اے۔ کیوں جو اوہ رُوحانی طرح پرکھیاں جاندِیاں نیں۔

¹⁵پر رُوحانی بندہ سارِیاں گلّاں نُوں پرکھ لَیندا اے۔ پر آپ کِسے توں پرکھیا نئیں جاندا۔

¹⁶خُداوند دی عقل نُوں کِس جانیا اے۔ پئی اوہنوں کوئی سِکھا سکے۔ پر ساڈے وِچ مسِیح دی عقل رہندی اے۔