Read Western Panjabi ۱ـکُرِنتھِیوں 3 Bible Online

۱ـکُرِنتھِیوں 3 - Western Panjabi bible

۱ـکُرِنتھِیوں 3

¹تے بھراؤ! مَیں تُہاڈے نال ایس طرح کلام نا کر سکیا جیویں رُوحانِیاں نال سگوں جیویں جسمانِیاں نال تے اوہناں نال جیہڑے مسِیح وِچ نِیانے نیں۔

²مَیں تُہانوں دُدّھ پیایا۔ تے روٹی نا کھوائی۔ کیوں جو تُسی اوہنوں پچا نئیں سو سکدے۔ سگوں اجے وی پچا نئیں سکدے ہو۔

³کیوں جو اجے تِیکر جِسمانی ہو۔ ایس لئی پئی جد تُہاڈے وِچ ساڑا تے جھگڑا اے۔ تے تُسی جِسمانی نا ہوئے؟ تے بندیاں دِیاں طریقیاں اُتّے ٹُرن والے نا ہوئے؟

⁴ایس لئی پئی جد اِک آکھدا اے۔ پئی مَیں پَولُس دا آں۔ تے دُوجا آکھدا اے مَیں اُپلّوس دا آں۔ تے تُسی اِنسان نا ہوئے؟

⁵اُپلّوس کِیہ شے اے؟ تے پَولُس کِیہ اے؟ سیوائے جِنہاں دی راہِیں تُساں اِیمان لیاندا۔ تے ہر اِک دا اوناں ای درجہ اے۔ جِنّاں خُداوند دِتّا اے

⁶مَیں بُوٹا لا یا تے اُپلّوس پیایا پر وَدھایا خُدا نے۔

⁷سو نا تے لان والا کُجھ شے اے۔ نا پیان والا پر خُدا جیہڑا وَدھان والا اے۔

⁸لان والا تے پانی دین والا دونویں اِکّو جیہے نیں۔ پر ہر اِک نُوں بدلہ اوہدی اپنی محنت پِچّھے مِلے گا۔

⁹کیوں جو اسی خُدا دے نال کمّ کرن والے آں۔ تے تُسی خُدا دی پَیلی اوہ۔ تے خُدا دی عمارت۔

¹⁰مَیں اوس توفِیق دے سببّوں جیہڑی خُدا مَینُوں بخشی۔ عقلمند راج وانگر نِینّھ رکھی تے دُوجا اوہدے اُتّے عمارت اُسار دا اے۔ سو ہر اِک خبردار رہے۔ پئی کہیو جِہی عمارت اُسار دا اے۔

¹¹کیوں جو بِناں اوس نِینّھ دے جیہڑی دھری ہوئی اے۔ تے اوہ یِسُوع مسِیح اے۔ کوئی ہور نِینّھ رکھ نئیں سکدا۔

¹²تے جے کوئی اوس نِینّھ اُتّے سونے یا چاندی یا قِیمتی پتّھراں یا لکّڑیا گھاہ یا بھوہ دا ردّہ رکھّے۔

¹³تے ہر کِسے دا کمّ دِس پووے گا۔ کیوں جو جیہڑا دِن اَگ نال ظاہر ہوئے گا۔ اوہ اوس کمّ نُوں دس دے گا۔ تے اوہ اَگ ہر اِک دا کمّ آپی پرکھ لَئے گی۔ پئی کیہو جِہیا اے۔

¹⁴جِہدا کمّ اوہدے اُتّے اُساریا ہویا باقی رہے گا۔ اوہنوں بدلہ مِلے گا۔

¹⁵تے جِہدا کمّ سڑ جائے گا۔ اوہ گھاٹا پائے گا۔ اوہ آپی بھانویں بچ تے جائے گا۔ پر سڑدیاں سڑدیاں۔

¹⁶تُسی نئیں جان دے ہو۔ پئی تُسی خُدا دی ہیکل ہو تے خُدا دا رُوح تُہاڈے وِچ وَسدا اے؟

¹⁷جے کوئی خُدا دی ہیکل نُوں برباد کرے گا۔ خُدا اوہنوں برباد کرے گا۔ کیوں جو خُدا دی ہیکل پاک اے۔ تے اوہ تُسی ہو۔

¹⁸کوئی اپنے آپ نُوں دھوکھا نا دے۔ جیہڑا تُہاڈے وِچوں اپنے آپ نُوں ایس جہان دا سیانا سمجھے اوہ مُورکھ بنے تاں جو سیانا ہو جائے۔

¹⁹کیوں جو دُنیا دی حِکمت خُدا دے بھانے مُورکھ اے۔ جیویں لِکھیا ہویا اے پئی اوہ سیانیاں نُوں اوہناں دی چالاکی وِچ پھسا دیندا اے۔

²⁰تے ایہہ وی لِکھیا ہویا اے۔ پئی خُدا سیانیاں دِیاں خیالاں نُوں جان دا اے۔ پئی جُھوٹھے نیں۔

²¹سو بندے اُتّے کوئی فخر نا کرے کیوں جو سارِیاں شیواں تُہاڈیاں نیں۔

²²بھانویں پَولُس ہوئے بھانویں اُپلّوس بھانویں کیفا بھانویں دُنیا بھانویں زِندگی بھانویں مَوت بھانویں ہُن دِیاں شیواں تے بھانویں آؤن والِیاں۔

²³سارِیاں تُہاڈیاں نیں تے تُسی مسِیح دے اوہ۔ تے مسِیح خُدا دا اے۔