Read Western Panjabi ۱ـکُرِنتھِیوں 9 Bible Online

۱ـکُرِنتھِیوں 9 - Western Panjabi bible

۱ـکُرِنتھِیوں 9

¹کِیہ مَیں اَزاد نئیں؟ مَیں رسُول نئیں؟ مَیں یِسُوع نُوں نئیں ویکھیا۔ جیہڑا ساڈا خُداوند اے؟ تُسی خُداوند وِچ میرے لئی بنائے ہوئے نئیں؟

²جے مَیں ہورناں دا رسُول نئیں۔ پر تُہاڈے لئی تے ضرُور آں۔ کیوں جو تُسی آپ ای خُداوند وِچ میرے رسُول ہون اُتّے موہر ہو۔

³جیہڑے مَینُوں ازماندے نیں۔ اوہناں لئی میرا ایہو ای جواب اے۔

⁴پئی سانُوں کھان پِین دا اختیار نئیں؟

⁵سانُوں ایہہ اختیار نئیں پئی کِسے مسِیحی بھین نُوں ویاہ کے لئی پِھریئے جیویں ہور رسُول تے خُداوند دے بھرا تے کیفا کر دے نیں۔

⁶یا نِرا مَینُوں تے برنباس نُوں محنت نا کرن دا اختیار نئیں؟

⁷کیہڑا سپاہی اپنے پلّیوں کھا کے لڑائی کر دا اے۔ کون انگور دا باغ لاکے پَھل نئیں کھاندا؟ یا کون اِجّڑ چار کے اوس اِجّڑ دا دُدّھ نئیں پَیندا؟

⁸کِیہ مَیں ایہہ گلّاں اِنسانی خیال ولّوں ای آکھنا آں؟ توریت وی ایسے طرح ای نئیں آکھدی؟

⁹جیویں مُوسیٰ دی توریت وِچ لِکھیا ہویا اے۔ پئی گاہ وِچ وَگدے ڈھگّے دا مُنھ نا بنھنو۔ خُدا نُوں ڈھگّیاں دا فِکر اے۔

¹⁰یا خاص ساڈے واسطے ایہہ آکھدا اے؟ ہاں ایہہ ساڈے واسطے لِکھیا گیا اے۔ کیوں جو چاہیدا اے۔ جون والا آس نال جوئے تے گاہن والا حِصّہ لین دی آس اُتّے گاہے۔

¹¹سو اساں تُہاڈے لئی رُوحانی شیواں بِیجیاں۔ تے ایہہ کوئی وڈّی گلّ اے۔ پئی اسی تُہاڈیاں جِسمانی شیواں دی فصل وَڈّھئے؟

¹²جے ہورناں دا تُہاڈے اُتّے ایہہ اختیار اے تے ساڈا اوہدے نالوں وَدّھ نا ہوئے گا؟ پر اساں اختیار نال کمّ نا لیا۔ سگوں ہر شے دی برداشت کرنے آں۔ تاں جو ساڈے سبّبوں یِسُوع مسِیح دی خُوشخبری وِچ اڑِکا نا ہوئے۔

¹³تُسی نئیں جان دے۔ پئی جیہڑے پاک شیواں دی سیوا کر دے نیں۔ اوہ ہیکل وِچوں کھاندے نیں؟ تے جیہڑے قُربان گاہ دی سیوا کر دے نیں۔ اوہ قُربان گاہ دے نال حِصّہ لَیندے نیں۔

¹⁴ایسے طرح خُداوند وی حُکم دِتّا اے۔ پئی خُوشخبری سُنان والے خُوشخبری دی راہِیں گذارہ کرن۔

¹⁵پر مَیں ایہناں وِچوں کِسے اُتّے عمل نئیں کِیتا۔ نا ایس مطلب نال ایہہ لِکھیا۔ پئی میرے لئی اجیہا ہوئے۔ کیوں جو میرا مر جانا ای اوہدے نالوں چَنگا اے۔ پئی کوئی میرا فخر گواوے۔

¹⁶جے خُوشخبری سُناواں تے میرا کوئی فخر نئیں کیوں جو ایہہ تے میرے لئی ضرُوری گلّ اے۔ سگوں میرے اُتّے افسوس اے جے خُوشخبری نا سُناواں۔

¹⁷کیوں جو جے اپنی مرضی نال ایہہ کرنا آں۔ تے میرے لئی بدلہ اے تے جے اپنی مرضی نال نئیں کر دا۔ تے مُختیاری میرے سپُرد ہوئی اے۔

¹⁸سو مَینُوں کِیہ بدلہ مِلدا اے؟ ایہہ پئی جدوں خُوشخبری دی منادی کراں تے خُوشخبری نُوں مُفت کر دیاں۔ تاں جو جیہڑا اختیار مَینُوں خُوشخبری دے لئی مِلیا ہویا اے۔ اوہدے سببّوں پُورا عمل نا کراں۔

¹⁹بھانویں مَیں ساریاں لوکاں توں اَزاد آں تَد وی مَیں اپنے آپ نُوں سبھناں دا غلام بنا دِتّا اے۔ تاں جو ہور وی وَدّھ لوکاں نُوں کھِچّ لیاواں۔

²⁰مَیں یہُودِیاں لئی یہُودی بنیا تاں جو یہُودِیاں نُوں کھِچّ لیاواں۔ جیہڑے لوک شریعت دے وَس وِچ نیں اوہناں لئی مَیں شریعت دے ہیٹھ ہویا۔ تاں جو اوہناں نُوں جیہڑے شریعت دے وَس وِچ نیں کھِچّ لیاواں۔ بھانویں آپ شریعت دے وَس وِچ نئیں۔

²¹بے شریعت لوکاں لئی مَیں بے شریعت بنیا۔ تاں جو بے شریعت لوکاں نُوں کھِچّ لیاواں (بھانویں خُدا دے اگّے بے شریعت نئیں) سگوں مسِیح دی شریعت دے تابع۔

²²کمزوراں لئی مَیں کمزور بنیا۔ تاں جو کمزوراں نُوں کھِچّ لیاواں۔ مَیں ساریاں بندیاں لئی سبھ کُجھ بنیا ہویا آں۔ تاں جو کِسے طرح نال بعضیاں نُوں بچاواں۔

²³تے مَیں سبھ کُجھ اِنجِیل دی خاطر کرنا آں۔ تاں جو ہورناں نال اوہدے وِچ شریک ہوواں۔

²⁴تُسی نئیں جان دے پئی میدان دے دَوڑن والے دَوڑ دے تے سارے ای نیں۔ پر اِنعام اِکّوئی لے جاندا اے۔ تُسی وی اجیہے دَوڑو پئی جِت لوؤ۔

²⁵تے ہر اِک پہلوان سبھ طرح دا پرہیز کر دا اے۔ اوہ لوک تے کُملان والا سِہرا لین لئی ایہہ کر دے نیں۔ پر اسی اوس سِہرے لئی کرنے آں۔ جیہڑا کُملاؤندا نئیں۔

²⁶سو مَیں وی ایسے طرح دَوڑناں آں۔ پئی بے ٹِکانے نئیں۔ مَیں ایس طرح ہُوریاں نال لڑنا آں۔ پئی اوہدے وانگر نئیں جیہڑا وَا نُوں مار دا اے۔

²⁷سگوں مَیں اپنے جِسم نُوں مار دا کُٹدا تے اوہنوں قابُو وِچ رکھنا آں تاں جو اجیہا نا ہوئے پئی ہورناں وِچ منادی کر دا کر دا آپی قبول نا ہوواں۔