Read Western Panjabi ۲-کُرِنتھِیوں 1 Bible Online

۲-کُرِنتھِیوں 1 - Western Panjabi bible

۲-کُرِنتھِیوں 1

¹پَولُس ولّوں جیہڑا خُدا دی مرضی نال مسِیح یِسُوع دا رسُول اے۔ تے بھرا تِیمُتِھیُس ولّوں خُدا دی اوس کلِیسیا دے ناں جیہڑی کُرِنتِھس وِچ اے۔ تے کُل اَخیہ دے ساریاں پاک لوکاں دے ناں۔

²ساڈے باپ خُدا تے خُداوند یِسُوع مسِیح ولّوں تُہانوں فضل تے تسلّی مِلدی رہے۔

³ساڈے خُداوند یِسُوع مسِیح دے خُدا تے باپ دی وڈیائی ہوئے جیہڑا رحمتاں دا باپ تے ہر طرح دی تسلّی دا خُدا اے۔

⁴اوہ ساڈیاں سارِیاں مُصِیبتاں وِچ سانُوں تسلّی دیندا اے۔ تاں جو اسی اوس تسلّی دے سبّب جیہڑی خُدا سانُوں دیندا اے۔ اوہناں نُوں وی تسلّی دے سکِئے۔ جیہڑے کِسے نا کِسے طرح دی مُصِیبت وِچ پئے ہوئے نیں۔

⁵کیوں جو جیویں مسِیح دے دُکھ سانُوں وَدّھ پُہنچدے نیں اوسے طرح ساڈی تسلّی وی مسِیح دی راہِیں وَدّھ ہوندی اے۔

⁶جے ساڈے اُتّے مُصِیبت آؤندی اے تے تُہاڈی تسلّی تے نجات لئی۔ تے جے سانُوں تسلّی مِلدی اے۔ تے تُہاڈی تسلّی دے لئی جِہدے اثر نال تُسی صبر کر کے اوہناں دُکھاں نُوں سہہ لَیندے ہو۔ جیہڑے اسی وی سہنے آں۔

⁷تے ساڈی آس تُہاڈی بابت پَکّی اے۔ کیوں جو اسی جاننے آں پئی جیویں تُسی دُکھاں وِچ سِیری ہو۔ اوسے طرح تسلّی وِچ وی ہو۔

⁸بھراؤ! اسی نئیں چاہندے پئی تُسی اوس مُصِیبت توں ناواقِف رہو۔ جیہڑی آسِیہ وِچ ساڈے اُتّے پئی۔ تے اسی حدّوں وَدّھ تے طاقتوں باہر تنگ ہوگئے۔ ایتھوں توڑی پئی اساں اپنی جانوں وی ہتّھ دھوئے۔

⁹سگوں اپنے اُتّے مَوت دا حُکم یقِین کر لیا سی۔ تاں جو اپنا بھروسا نا رکھیے سگوں خُدا دا جیہڑا مُردیاں نُوں جوالدا اے۔

¹⁰سو اوسے سانُوں ایڈی وڈّی ہلاکت توں چھڈایا تے چھڈاوے گا تے سانُوں اوہدے توں آس اے۔ پئی اگّے نُوں وی چھڈاؤندا رہے گا۔

¹¹جے تُسی وی رَل مِل کے دُعا نال ساڈی مدد کرو گے۔ پئی جیہڑی بخشِش سانُوں بتھیریاں لوکاں دی راہِیں مِلی اوہدا شُکر وی بُہتے لوک ساڈے ولّوں کرن۔

¹²کیوں جو سانُوں اپنے دِل دی ایس گواہی اُتّے فخر اے پئی ساڈا چال چَلّن دُنیا وِچ تے خاص کر تُہاڈے وِچ جِسمانی حِکمت نال نئیں۔ سگوں خُدا دے فضل دے نال یعنی اجیہی پاکیزگی تے صفائی دے نال رہیا۔ جیہڑا خُدا دے لائق اے۔

¹³اسی ہور گلّاں تُہانوں نئیں لِکھدے۔ اوہناں دے بِناں جیہڑیاں تُسی پڑھدے یا مَن دے اوہ۔ تے مَینُوں آس اے۔ پئی اوڑک تِیکر مَن دے رہو گے۔

¹⁴جیویں تُہاڈے وِچوں کئیاں مَن وی لیا اے پئی اسی تُہاڈا فخر آں۔ جیویں ساڈے خُداوند یِسُوع مسِیح دے دِن تُسی وی ساڈا فخر ہوؤ گے۔

¹⁵تے ایسے بھروسے اُتّے مَیں ایہہ اِرادہ کِیتا سی پئی پہلاں تُہاڈے کول آواں تاں جو تُہانوں اِک ہور بخشِش مِلے۔

¹⁶تے تُہاڈے کول ہوندا ہویا مَکِدُنیہ نُوں جاواں۔ تے مَکِدُنیہ توں فیر تُہاڈے کول آواں۔ تے تُسی مَینُوں یہُودیہ ولّ ٹور دیو۔

¹⁷سو مَیں جو ایہہ اِرادہ کِیتا سی کِیہ مَیں اِقرار دا کچّا ساں؟ یا جِنہاں گلّاں دا اِرادہ کرنا آں جِسم ولّوں کرنا آں پئی ہاں ہاں وی کراں تے نئیں نئیں وی؟

¹⁸خُدا دی سچیائی دی سَونہہ پئی ساڈے اوس کلام وِچ جیہڑا تُہاڈے نال کِیتا جاندا اے۔ ہاں تے نئیں دونویں ای نئیں ہوندے۔

¹⁹کیوں جو خُدا دا پُتر یِسُوع مسِیح جِہدی منادی اساں یعنی مَیں تے سِلوانُس تے تِیمُتِھیُس نیں تُہاڈے وِچ کِیتی۔ اوہدے وِچ ہاں تے نئیں دونویں نئیں سن۔ سگوں اوہدے وِچ ہاں ای ہاں ہوئی۔

²⁰کیوں جو خُدا دے جِنّے وعدے نیں۔ اوہ سارے اوہدے وِچ ہاں دے نال نیں۔ ایس کر کے اوہدی راہِیں آمِین وی ہوئی۔ تاں جو ساڈی راہِیں خُدا دا جلال ہوئے۔

²¹تے جیہڑا سانُوں تُہاڈے نال مسِیح وِچ قیم کر دا اے۔ تے جِس سانُوں مسَح کِیتا اوہ خُدا اے۔

²²جِس ساڈے اُتّے مُہر وی لائی۔ تے رُوح دی سائی ساڈے دِلاں وِچ دِتّی۔

²³مَیں خُدا نُوں گواہ کرناں آں پئی مَیں اجے تِیکر کُرِنتِھس وِچ ایس کر کے نئیں آیا۔ کیوں جو مَینُوں تُہاڈے اُتّے ترس آؤندا سی۔

²⁴ایہہ نئیں پئی اسی اِیمان ولّوں تُہاڈے اُتّے حکُومت کرنے آں سگوں خُوشی وِچ تُہاڈے مددگار ہاں کیوں جو تُسی اِیمان ای نال قیم رہندے ہو۔