Read Western Panjabi ۲-کُرِنتھِیوں 3 Bible Online

۲-کُرِنتھِیوں 3 - Western Panjabi bible

۲-کُرِنتھِیوں 3

¹کِیہ اسی فیر اپنی نیک نامی دسنی شُروع کرنے آں؟ یا سانُوں کئیاں وانگر نیک نامی دِیاں چِٹّھیاں تُہاڈے کول لیاؤن یا تُہاتھوں لین دی لوڑ اے؟

²ساڈا خط جیہڑا ساڈیاں دِلاں اُتّے لِکھیا ہویا اے۔ سو تُسی ہو تے اوہنوں سارے بندے جان دے تے پڑھدے نیں۔

³ظاہر اے پئی تُسی مسِیح دا اوہ خط اوہ جیہڑا اساں خادماں دے طَور اُتّے لِکھیا۔ سیاہی نال نئیں سگوں زِندہ خُدا دے رُوح نال پتّھر دِیاں تختِیاں اُتّے نئیں سگوں گوشت دی یعنی دِل دِیاں تختِیاں اُتّے۔

⁴اسی مسِیح دی راہِیں خُدا اُتّے اجیہا ای بھروسا رکھنے آں۔

⁵ایہہ نئیں پئی آپ ای اسی ایس لائق آں۔ پئی اپنے ولّوں کُجھ خیال وی کر سکِئے۔ سگوں ساڈی لیاقت خُدا ولّوں اے۔

⁶جِس سانُوں نَوِیں عہد دے خادم ہون جوگیاں وی کِیتا۔ لفظاں دے خادم نئیں سگوں رُوح دے کیوں جو لفظ مار سُٹّدے نیں پر رُوح جوالدی اے۔

⁷تے جد مَوت دا اوہ عہد جِہدے حرف پتّھراں اُتّے اُکرے گئے نیں اجیہا جلال والا ہویا۔ پئی بنی اِسرائیل مُوسیٰ دے مُنھ نُوں اوس جلال دے سببّوں جیہڑا اوہدے مُنھ اُتّے آیا سی تاڑ نا سکے بھانویں اوہ گھٹدا جاندا سی۔

⁸تے رُوح دا عہد تے ضرُور ای جلال والا ہوئے گا۔

⁹کیوں جو جد قصوروار ٹھہرن والا عہد جلال والا سی۔ تے راستبازی دا عہد تے ضرُور ای جلال والا ہوئے گا۔

¹⁰سگوں ایس حال اوہ جلال والا ایس وڈّے جلال دے سبّب بے جلال ہویا۔

¹¹کیوں جو جد مِٹن والی شے جلال والی سی تے باقی رہن والی شے تے ضرُور ای جلال والی ہوئے گی۔

¹²سو اسی اجیہی آس کر کے بڑی دلیری نال بولنے آں۔

¹³تے مُوسیٰ وانگر نئیں آں جِس اپنے مُنھ اُتّے پردہ پایا تاں جو بنی اِسرائیل ایس مِٹن والی شے دے اوڑک نُوں نا ویکھ سکن۔

¹⁴پر اوہناں دے دِل سخت ہوگئے۔ کیوں جو اَج توڑی پرانے عہد نامے نُوں پڑھدیاں اوہناں دے دِلاں اُتّے اوہو پردہ پیا رہندا اے۔ تے اوہ مسِیح وِچ اُٹھایا جاندا اے۔

¹⁵پر اَج تِیکر جد کدِیں مُوسیٰ دی کتاب پڑھی جاندی اے تے اوہناں دے دِل اُتّے پردہ پیا رہندا اے۔

¹⁶پر جد کدی اوہناں دا دِل خُداوند ولّ پِھرے گا۔ تے اوہ پردہ اُٹھایا جائے گا۔

¹⁷تے اوہ خُداوند رُوح اے۔ تے جِتّھے کِتّھے خُداوند دا رُوح اے اوتھے اَزادی اے۔

¹⁸پر جد اساں سبھناں دے بے پردہ چِہریاں توں خُداوند دے جلال دا ایس طرح عکس پَیندا اے جیویں شیشے توں۔ تے اوس خُداوند دی راہِیں جیہڑا رُوح اے۔ اسی اوسے ای جلالی صُورت وِچ درجہ بدرجہ بدلدے جانے آں۔