Read Western Panjabi ۲-کُرِنتھِیوں 4 Bible Online

۲-کُرِنتھِیوں 4 - Western Panjabi bible

۲-کُرِنتھِیوں 4

¹سو جد ساڈے اُتّے اجیہا رَحم ہویا پئی سانُوں ایہہ خِدمت مِلی۔ تاں اسی ہِمّت نئیں ہار دے۔

²سگوں اساں شرم دِیاں لُکِیاں ہویاں گلّاں نُوں چھڈ دِتّا۔ تے مکّاری دی چال نئیں چلدے۔ نا خُدا دے کلام وِچ کُجھ رَلا دینے آں۔ سگوں سچیائی ظاہر کر کے خُدا دے اگّے ہر اِک بندے دے دِل وِچ اپنی نیکی بٹھالنے آں۔

³تے جے ساڈی خُوشخبری اُتّے پردہ پیا ہویا اے۔ تے ہلاک ہون والیاں ای دے لئی پیا اے۔

⁴یعنی اوہناں بے اِیماناں لئی جِنہاں دِیاں اَکھّیاں نُوں ایس جہان دے خُدا اَنھیاں کر دِتّا اے۔ تاں جو مسِیح جیہڑا خُدا دی صُورت اے اوہدے جلال دی خُوشخبری دا چانن اوہناں اُتّے نا پئے۔

⁵کیوں جو اسی اپنی نئیں سگوں مسِیح یِسُوع دی منادی کرنے آں۔ پئی اوہ خُداوند اے۔ تے اپنی بابت ایہہ آکھنے آں۔ پئی یِسُوع دی خاطر تُہاڈے نوکر آں۔

⁶ایس لئی پئی خُدا ای اے جِس آکھیا پئی ہنیرے وِچوں نُور چمکے تے اوہو ای ساڈیاں دِلاں وِچ چمکیا۔ تاں جو خُدا دے جلال دی پچھان دا نُور یِسُوع مسِیح دے چِہرے توں چمکارا مارے۔

⁷پر ساڈے کول ایہہ خزانہ مِٹّی دیاں بھانڈیاں وِچ رکھیا ہویا اے۔ تاں جو اوہ حدّوں وَدّھ قُدرت ساڈے ولّوں نئیں سگوں خُدا ولّوں معلُوم ہوئے۔

⁸اسی ہر اِک گلّ وِچ مُصِیبت تے چُکنے آں۔ پر لاچار نئیں ہوندے۔ حَیران تے ہُنے آں پر نا آس نئیں ہوندے۔

⁹ستائے تے جانے آں پر اکلّے نئیں چھڈے جاندے۔ ڈیگے تے جانے آں پر ہلاک نئیں ہوندے۔

¹⁰اسی ہر ویلے اپنے جِسم وِچ یِسُوع دی مَوت لئی پِھرنے آں۔ تاں جو یِسُوع دی زِندگی ساڈے بدن وِچ ظاہر ہوئے۔

¹¹کیوں جو اسی جِیوندے ای یِسُوع دی خاطر سدا مَوت دے حوالے کِیتے جانے آں۔ تاں جو یِسُوع دی زِندگی ساڈے فنا ہون والے جِسم وِچ ظاہر ہوئے۔

¹²سو مَوت تے ساڈے وِچ اثر کر دی اے تے زِندگی تُہاڈے وِچ۔

¹³تے ایس کر کے پئی ساڈے وِچ اوہو ای اِیمان دی رُوح اے۔ جِہدی بابت لِکھیا اے۔ پئی مَیں اِیمان لیایا تے ایس لئی بولیا۔ سو اسی اِیمان وی لیاؤنے آں تے ایسے لئی آکھنے آں۔

¹⁴کیوں جو اسی جاننے آں۔ پئی جِس خُداوند یِسُوع نُوں جوالیا اوہ سانُوں وی یِسُوع دے نال جوالے گا۔ تے تُہاڈے نال اپنے اگّے حاضر کرے گا۔

¹⁵ایس لئی پئی سارِیاں شیواں تُہاڈے واسطے نیں تاں جو بتھیریاں لوکاں دے سببّوں فضل بُہتا ہو کے خُدا دے جلال لئی شُکر گُزاری نُوں وی وَدھائے۔

¹⁶ایس لئی اسی ہِمّت نئیں ہار دے سگوں بھانویں ساڈی ظاہری اِنسانِیّت برباد ہوندی اے۔ فیر وی ساڈی اندرلی اِنسانِیّت دِنوں دِن نَوِیں ہوندی جاندی اے۔

¹⁷کیوں جو ساڈی پَل کُو دی ہَولی جیہی مُصِیبت ساڈے لئی بُہت ای بھارا تے سدا دا جلال پَیدا کر دی جاندی اے۔

¹⁸جِس حال اسی ویکھیاں ہویاں شیواں اُتّے نئیں سگوں اَن ویکھیاں شیواں اُتّے نِگاہ کرنے آں۔ کیوں جو ویکھیاں ہویاں شیواں تھوڑیاں دِناں دِیاں نیں۔ پر اَن ویکھیاں شیواں سدا رہن والیاں نیں۔