Read Western Panjabi ۲-کُرِنتھِیوں 8 Bible Online

۲-کُرِنتھِیوں 8 - Western Panjabi bible

۲-کُرِنتھِیوں 8

¹ہُن بھراؤ! اسی تُہانوں خُدا دے اوس فضل دی خبر دینے آں۔ جیہڑا مَکِدُنیہ دِیاں کلِیسیاواں اُتّے ہویا۔

²پئی مُصِیبت دی وڈّی ازمایش وِچ اوہناں دی بڑی خُوشی تے سخت غرِیبی نے اوہناں دی سخاوت نُوں حدّوں وَدّھ کر دِتّا۔

³تے مَیں گواہی دینا آں پئی اوہناں قدر دے سببّوں سگوں قدروں وَدّھ کے اپنی خُوشی نال دِتّا۔

⁴تے ایس خَیرات تے پاک لوکاں دی خِدمت وِچ سِیری ہوندی بابت ساڈے اگّے بڑی مِنّت نال عرض کِیتی۔

⁵تے ساڈی آس دے سببّوں ای نئیں دِتّا۔ سگوں اپنے آپ نُوں پہلاں خُداوند دے تے فیر خُدا دی مرضی نال ساڈے سپُرد کِیتا۔

⁶ایس واسطے اساں طِطُس نُوں نصِیحت کِیتی پئی جیویں اوس پہلاں شُروع کِیتا سی اوسے طرح ای تُہاڈے وِچ ایس خَیرات دے کمّ نُوں پُوریاں وی کرے۔

⁷سو جیویں تُسی ہر گلّ وِچ اِیمان تے کلام تے عِلم تے پُوری سرگرمی تے اوس مُحبّت وِچ جیہڑی ساڈے نال رکھدے ہو اگّے وَدّھ گئے ہو ایسے طرح ای ایس خَیرات دے کمّ وِچ وی اگّے وَدّھ جاؤ۔

⁸مَیں حُکم دے طَور نال نئیں آکھدا سگوں ایس لئی پئی ہورناں دی سرگرمی نال تُہاڈی مُحبّت وِچ سچیائی نُوں ازماواں۔

⁹کیوں جو تُسی ساڈے خُداوند یِسُوع مسِیح دے فضل نُوں جان دے اوہ۔ پئی اوہ بھانویں دَولتمند سی پر تُہاڈی خاطر غرِیب بن گیا۔ تاں جو تُسی اوہدی غرِیبی دے سبّب دَولت مند بن جاؤ۔

¹⁰تے مَیں ایس گلّ وِچ اپنی صلاح دینا آں کیوں جو ایہہ تُہاڈے لئی فائدے والی اے۔ ایس لئی پئی تُسی پِچّھلے ورھے توں نا نِرے ایس کمّ وِچ سگوں ایہدے اِرادے کرن وِچ وی پہلے سو۔

¹¹سو ہُن ایس کمّ نُوں پُوریاں وی کرو۔ تاں جو جیویں تُسی اِرادہ کرن وِچ تگڑے سو۔ اوسے طرح قدر دے سببّوں اوہنوں پُوریاں وی کرو۔

¹²کیوں جو جے نِیّت ہوئے تے خَیرات اوہدے دے سببّوں قبول ہوئے گی۔ جو کُجھ بندے دے کول اے۔ نا اوس دے سببّوں جو کُجھ اوہدے کول نئیں۔

¹³ایہہ نئیں پئی ہورناں نُوں آرام مِلے۔ تے تُہانوں اَوکھ ہوئے۔

¹⁴سگوں برابری دے طَور نال ایس ویلے تُہاڈی دَولت نال اوہناں دا گھاٹا پُورا ہوئے۔ تاں جو اوہناں دی دَولت نال وی تُہاڈا گھاٹا پُورا ہوئے۔ تے ایس طرح نال برابری ہو جائے۔

¹⁵جیویں لِکھیا ہویا اے۔ پئی جِس کِسے بُہتا اکٹّھا کِیتا اوہدا کُجھ وَدّھ نا نِکلیا تے جِس تھوڑا اکٹّھا کِیتا اوہدا کُجھ گھٹ نا نِکلیا۔

¹⁶خُدا دا شُکر اے جیہڑا طِطُس دے دِل وِچ تُہاڈے واسطے اوہو جیہی ای سرگرمی پَیدا کر دا اے۔

¹⁷کیوں جو اوس ساڈی نصِیحت نُوں مَن لیا۔ سگوں بُہت سرگرم ہو کے اپنی خُوشی نال تُہاڈے ولّ ٹُر پیا۔

¹⁸تے اساں اوہدے نال اوس بھرا نُوں گھلّیا۔ جِہدی وڈیائی خُوشخبری دے سبّب سارِیاں کلِیسیاواں وِچ ہوندی اے۔

¹⁹تے نِرا اوہو ای نئیں سگوں اوہ کلِیسیاواں ولّوں ایس خَیرات دے سببّوں ساڈے نال سفر کرن والا مُقرّر ہویا تے اسی ایہہ خِدمت ایس لئی کرنے آں پئی خُداوند دا جلال تے ساڈا شَوق ظاہر ہوئے۔

²⁰تے اسی بچدے رہنے آں۔ پئی جِس وڈّی خَیرات لئی خِدمت کرنے آں اوہدی بابت کوئی ساڈے اُتّے کوئی گلّ نا بنائے۔

²¹کیوں جو اسی اجیہی شیواں دی تدبیر کرنے آں جیہڑیاں نا نِریاں خُداوند دے اگّے بھلیاں نیں سگوں بندیاں دے اگّے وی۔

²²تے اساں اوہناں نال اپنے اوس بھرا نُوں گھلّیا اے۔ جِہنُوں اساں بُہت سارِیاں گلّاں وِچ کئی وار ازما کے سرگرم ویکھیا اے پر ایس کر کے پئی اوہنوں تُہاڈے اُتّے بھروسا اے۔ ایس لئی ہُن بُہت وَدّھ سرگرم اے۔

²³جے کوئی طِطُس دی بابت پُچھے۔ تے اوہ میرا سِیری تے تُہاڈے واسطے میرے نال خِدمت کرن والا اے۔ جے ساڈیاں بھراواں دی بابت پُچھیا جاوے۔ تے اوہ کلِیسیاواں دے گھلّے ہوئے تے مسِیح دا جلال نیں۔

²⁴سو اپنی اوہ مُحبّت تے ساڈا اوہ فخر جیہڑا تُہاڈے اُتّے اے کلِیسیاواں دے رُوبرُو اوہناں اُتّے ثابت کرو۔