Read Western Panjabi گلتِیوں 3 Bible Online

گلتِیوں 3 - Western Panjabi bible

گلتِیوں 3

¹اَے مُورکھ گلِتیو! کِس تُہاڈے اُتّے ٹُونا کِیتا اے؟ جِنہاں دِیاں اَکھّیاں سامھنے یِسُوع مسِیح سُولی چاہڑیا ہویا وکھالی دِتّا۔

²مَیں تُہانوں ایہی گلّ پُچھنی چاہناں آں پئی تُہانوں شریعت دیاں کمّاں پِچھّے رُوح مِلیا یا اِیمان دے سنیہے نال؟

³تُسی اجیہے مُورکھ ہو۔ پئی رُوح نال شُروع کر کے ہُن جِسم نال پُورا کرنا چاہندے ہو؟

⁴تُساں اینِیاں تکلیفاں بے فید جھلیاں نیں؟ پر سَچّی مُچّی بے فید نئیں۔

⁵تَد جیہڑا تُہانوں رُوح بخشدا اے تے تُہاڈے وِچ کراماتاں وکھاؤندا اے اوہ شریعت دے کمّاں نال اجیہا کر دا اے۔ یا اِیمان دے سنیہے نال؟

⁶جیویں ابرہام خُدا اُتّے اِیمان لیاندا تے اوہ اوہدے حق وِچ راستبازی گِنیا گیا۔

⁷سو جان لوؤ پئی جیہڑے اِیمان والے نیں۔ اوہو ابرہام دے پُتر نیں۔

⁸تے پاک کتاب نے پہلاں ای ایہہ جان کے پئی خُدا غیر قوماں نُوں اِیمان دی راہِیں راست باز ٹھہرائے گا ابرہام نُوں اگیتری ایہہ خُوشخبری سُنا دِتّی۔ پئی سارِیاں قوماں تیرے وِچ برکتاں پان گِئیاں۔

⁹ایس لئی جیہڑے اِیمان والے نیں اوہ اِیماندار ابرہام نال برکت پاندے نیں۔

¹⁰کیوں جو جِنّے شریعت دیاں کمّاں اُتّے بھروسا رکھدے نیں۔ اوہ سارے لعنت دے ہیٹھ نیں۔ ایس کر کے لِکھیا اے۔ پئی اوہ جیہڑا سارِیاں گلّاں جیہڑیاں کتاب وِچ لِکھیاں ہویاں نیں۔ کرن وِچ لگّا نئیں رہندا لعنتی اے۔

¹¹تے ایہہ گلّ ظاہر اے۔ پئی شریعت دی راہِیں کوئی بندہ خُدا اگّے راستباز نئیں ٹھہردا۔ کیوں جو راستباز اِیمان نال جِیوندا رہے گا۔

¹²تے شریعت نُوں اِیمان نال کُجھ واسطہ نئیں۔ سگوں لِکھیا ہویا اے پئی جِس ایہناں اُتّے عمل کِیتا۔ اوہ ایہناں دے سببّوں جیوندا رہے گا۔

¹³مسِیح ساڈے لئی لعنتی بن کے تے سانُوں مُل لے کے شریعت دی لعنت توں چھڈایا۔ کیوں جو لِکھیا ہویا اے پئی جیہڑا کاٹھ اُتّے ٹنگیا گیا اوہ لعنتی اے۔

¹⁴ایس کر کے پئی مسِیح یِسُوع وِچ ابرہام دی برکت غیر قوماں تِیکر وی اَپڑے۔ تے اسی اِیمان دی راہِیں اوس رُوح نُوں حاصِل کریئے جِہدا وعدہ ہویا اے۔

¹⁵بھراؤ! مَیں لوکاں وانگر آکھنا آں۔ پئی بھانویں بندیاں دا ای عہد ہوئے۔ جدوں اوہ پَکّا ہوگیا۔ تدوں کوئی اوہنوں جُھوٹھا نئیں کر دا۔ تے نا اوہدے اُتّے کُجھ وَدھاندا ای اے۔

¹⁶ہُن ابرہام تے اوہدی نسل نال وعدے کِیتے گئے اوہ ایہہ نئیں آکھدا پئی تیریاں نسلاں نال جِیکن چوکھیاں نیں۔ سگوں تیری نسل نال جیویں اِک نال تے اوہ مسِیح اے۔

¹⁷میرا ایہہ مطلب اے۔ پئی جیہڑا عہد خُدا پہلاں توں کِیتا سی۔ اوہنوں شریعت چار سَو ترِیہاں ورھیاں پِچھّوں آ کے جُھوٹھا نئیں کر سکدی۔ پئی اوہ وعدہ ایویں جائے۔

¹⁸کیوں جو جے وِرثہ شریعت دے سببّوں مِلدی اے۔ فیر وعدے دے سببّوں تے نا ہوئی۔ ابرہام نُوں خُدا وعدے دے سببّوں ای دِتّی۔

¹⁹تَد شریعت کاہدی رہی۔ اوہ قصوراں دے سببّوں اوس نسل دے آؤن تِیکر دِتّی گئی جِہدے نال وعدہ کِیتا گیا سی۔ تے اوہ فرِشتیاں دے وسیلے اِک وچولے دی راہِیں مُقرّر کِیتی گئی۔

²⁰ہُن وچولا اِک دا نئیں ہوندا پر خُدا اِکّو ای اے۔

²¹مُڑ دسو کِیہ شریعت خُدا دیاں وعدیاں دے اُلٹ اے؟ کدی نئیں! کیوں جو جے کوئی اجیہی شریعت دِتّی جاندی۔ جیہڑی زِندگی دے سکدی۔ تے راست بازی شریعت دے سببّوں ہوندی۔

²²پر پاک کتاب ساریاں نُوں گُناہ دے ہیٹھ کر دِتّا۔ ایس کر کے پئی اوہ وعدہ جیہڑا یِسُوع مسِیح نُوں مَنّن دے سببّوں اے اِیمانداراں دے حق وِچ پُورا کِیتا جاوے۔

²³اِیمان دے آؤن توں پہلاں شریعت دے ہیٹھ ساڈی رکھوالی ہوندی سی۔ تے اوس اِیمان دے آؤن تِیکر جیہڑا ظاہر ہون والا سی۔ اسی اوسے دے ڈَکے وِچ رہے۔

²⁴ایس لئی شریعت مسِیح تِیکراں اپڑان لئی ساڈا اُستاد بنی۔ ایس کر کے پئی اسی اِیمان نال راستباز ٹھہرئیے۔

²⁵پر جد اِیمان آ گیا۔ تَد اسی اُستاد دے ہیٹھ نا رہے۔

²⁶کیوں جو تُسی سارے اوس اِیمان دی راہِیں جیہڑا مسِیح یِسُوع اُتّے اے خُدا دے پُتر ہو۔

²⁷تے تُساں ساریاں بندیاں مسِیح وِچ بپتِسمہ لیا۔ مسِیح نُوں پہن لیا۔

²⁸نا کوئی یہُودی رہیا نا یُونانی۔ نا کوئی غلام نا اَزاد نا کوئی جَنا نا زنانی۔ کیوں جو تُسی سارے مسِیح یِسُوع وِچ اِک ہو۔

²⁹تے جے تُسی مسِیح دے ہو۔ تے ابرہام دی نسل یعنی وعدے دے سببّوں وارث ہو۔