Read Western Panjabi اِفسِیوں 1 Bible Online

اِفسِیوں 1 - Western Panjabi bible

اِفسِیوں 1

¹پَولُس ولّوں جیہڑا خُدا دی مرضی نال مسِیح یِسُوع دا رسُول اے۔ اِفِسُس دے پاک لوکاں دے ناں جیہڑے مسِیح یِسُوع وِچ اِیماندار نیں۔

²ساڈے باپ خُدا تے خُداوند یِسُوع مسِیح ولّوں تُہانوں فضل تے تسلّی مِلدی رہے۔

³ساڈے خُداوند یِسُوع مسِیح دے خُدا تے باپ دی وڈیائی ہوئے۔ جِس سانُوں مسِیح وِچ اسمانی تھانواں اُتّے ہر طرح دی رُوحانی برکت دِتّی۔

⁴تے اوس سانُوں دُنیا دے مُڈھ توں پہلاں اوہدے وِچ ایس لئی چُن لیا پئی اسی اوہدے سامھنے مُحبّت وِچ پاک تے بے نُقص ہوئے۔

⁵تے اوس اپنی مرضی دے نیک اِرادے نال سانُوں اپنے لئی پہلاں توں مُقرّر کِیتا۔ پئی یِسُوع مسِیح دی راہِیں اوہدے پُتریلے ہوئے۔

⁶تاں جو اوہدے اوس فضل دے جلال دی وڈیائی ہوئے جیہڑا اوس سانُوں اوس پیارے وِچ مُفت دِتّا۔

⁷اسی اوہدے وِچ اوہدے خُون دی راہِیں رہائی یعنی قصوراں دی مُعافی پانے آں۔ اوہدے اوس فضل دی دَولت دے سببّوں۔

⁸جیہڑا اوس سانُوں ساری حِکمت تے دانائی دے نال چوکھا دِتّا۔

⁹تے نالے اوہنے اپنی مرضی دے بھیت نُوں اپنے اوس نیک اِرادے دے سببّوں ساڈے اُتّے کھولیا جیہڑا اوہنے اوہدے وِچ دھاریا سی۔

¹⁰تاں جو زمانیاں دے پُورا ہون دا اِنج بندوبست ہوئے۔ پئی مسِیح وِچ سارِیاں شیواں اکٹّھیاں ہو جان۔ بھانویں اسمان دِیاں ہون بھانویں زمین دِیاں۔

¹¹اوسے وِچ اسی وی اوسے اِرادے دے سببّوں جیہڑا اپنی مرضی دی صلاح نال سبھ کُجھ کر دا اے۔ مُڈھوں ای مُقرّر ہو کے وِرثہ بنے۔

¹²ایس کر کے پئی اسی جیہڑے پہلاں توں مسِیح دی آس وِچ ساں اوہدے جلال دی وڈیائی دا سبّب ہوئے۔

¹³تے تُساں وی جدوں سچیائی دا کلام سُنیا جیہڑا تُہاڈی نجات دی خُوشخبری اے۔ نالے اوہدے اُتّے اِیمان لیاندا تے مسِیح وِچ تُہاڈے اُتّے وعدہ کِیتے ہوئے پاک رُوح دی مُہر لگّی۔

¹⁴اوہ ای خُدا دی ملکیّت دی رہائی واسطے ساڈے وِرثے دی سائی اے۔ تاں جو اوہدے جلال دی وڈیائی ہوئے۔

¹⁵ایس واسطے مَیں وی تُہاڈے اوس اِیمان دا جیہڑا خُداوند یِسُوع اُتّے اے تے اوس مُحبّت دا جیہڑی ساریاں پاک لوکاں نال اے حال سُن کے۔

¹⁶تُہاڈے واسطے ہر ویلے شُکر کر دا رہنا آں تے اپنیاں دُعاواں وِچ تُہاڈا ذِکر کرنا ہُناں آں۔

¹⁷پئی ساڈے خُداوند یِسُوع مسِیح دا خُدا جیہڑا جلال دا باپ اے۔ تُہانوں اپنی پچھان لئی حِکمت تے اِلہام دی رُوح دیوے۔

¹⁸تے تُہاڈے دِل دِیاں اَکھّیاں سوجاکھِیاں ہو جان۔ تاں جو تُہانوں پتا لگّے۔ پئی اوہدے سَدّن توں کیہو جیہی آس اے۔ تے اوہدی میراث دے جلال دی دَولت پاک لوکاں وِچ کیڈی کُو اے۔

¹⁹تے ساڈے اِیمان لیاؤن والیاں واسطے اوہدی قُدرت کیڈی وڈّی اے اوہدی اوس وڈّی قُوّت دے اثر دے سببّوں۔

²⁰جیہڑا اوس مسِیح وِچ اوس ویلے کِیتا جدوں اوہنوں مُردیاں وِچوں جوا کے اپنے سَجّے پاسے اسمانی تھانواں اُتّے بہایا۔

²¹تے ہر طرح دی حکُومت تے اختیار تے قُدرت تے ریاست تے ہر اِک ناں توں وَاہوَا اُچّا کِیتا۔ جیہڑا نِرا ایسے جہان وِچ نئیں سگوں آؤن والے جہان وِچ وی لیا جائے گا۔

²²تے سبھ کُجھ اوہدے پیراں ہیٹھ کر دِتّا۔ تے اوہنوں سارِیاں شیواں دا سردار بنا کے کلِیسیا نُوں دے دِتّا۔

²³ایہہ اوہدا بدن اے تے اوسے نال رچی ہوئی اے۔ جیہڑا سبھنیں پلِّیں سبھناں دا بھرن والا اے۔