Read Western Panjabi فِلِپّیوں 1 Bible Online

فِلِپّیوں 1 - Western Panjabi bible

فِلِپّیوں 1

¹مسِیح یِسُوع دیاں غلاماں پَولُس تے تِیمُتِھیُس ولّوں فِلپّی دیاں ساریاں پاک لوکاں دے ناں جیہڑے مسِیح یِسُوع وِچ نیں نگہباناں تے خادماں سَنے۔

²ساڈے باپ خُدا تے خُداوند یِسُوع مسِیح ولّوں تُہانوں فضل تے تسلّی مِلدی رہے۔

³مَیں جدوں تُہانوں یاد کرنا آں تَد ہرویلے اپنے خُدا دا شُکر کرنا آں۔

⁴تے ہر اِک دُعا وِچ جیہڑی تُہاڈے لئی منگنا آں سدا خُوشی نال تُہاڈے لئی مِنّت کرنا آں۔

⁵ایس لئی پئی تُسی پہلے دِن توں لگ کے اَج تِیکر خُوشخبری دے پَھیلان وِچ میرے سنگی رہے ہو۔

⁶تے مَینُوں یقِین اے پئی جِس تُہاڈے وِچ نیک کمّ شُروع کِیتا اے۔ اوہ اوہنوں یِسُوع مسِیح دے دِن تِیکر پُورا کر دے گا۔

⁷تے چاہیدا وی اے پئی مَیں تُہاڈے سبھناں دی بابت اجیہا ای خیال کراں کیوں جو تُسی میرے دِل وِچ وَسدے اوہ۔ ایس لئی میری قید تے خُوشخبری دے جواب دین تے ثابت کرن وِچ تُسی سارے میرے نال فضل وِچ سنگی ہو۔

⁸خُدا میرا گواہ اے پئی مَیں کِیویں مسِیح یِسُوع دیاں ترساں نال تُہاڈی ساریاں دی چاہ کرنا آں۔

⁹تے ایہہ دُعا کرنا آں پئی تُہاڈی مُحبّت عِلم تے ہر طرح دی پچھان نال ہور وی وَدّھدِی جاوے۔

¹⁰تاں جو چَنگیاں چَنگیاں شیواں نُوں پرکھ سکو تے مسِیح دے دِن تِیکر صاف دِل رہو۔ تے کدی ٹھیڈا نا کھاؤ۔

¹¹تے راستبازی دے پَھل نال جیہڑا مسِیح یِسُوع دے سببّوں اے بھرے رہو۔ تاں جو خُدا دا جلال تے وڈیائی ہوئے۔

¹²تے بھراؤ! مَیں تُہانوں دسنا چاہناں آں پئی جو کُجھ میرے اُتّے بِیتیا اوہ خُوشخبری دی ترقی ای دا سبّب بنیا۔

¹³ایتھوں تِیکر پئی قَیصری سپاہیاں دی ساری پلٹن تے باقی ساریاں لوکاں وِچ مشہُور ہوگیا پئی مَیں مسِیح دے واسطے قید آں۔

¹⁴تے جیہڑے خُداوند وِچ بھرا نیں کئی میرے قید ہون دے سببّوں دلیر ہو کے بے دھڑک خُدا دا کلام سُنان وِچ وَدّھ کے حَوصلہ کر دے نیں۔

¹⁵کئی تے ساڑے تے جھگڑے دے سببّوں مسِیح دی منادی کر دے نیں۔ تے کئی نیک نِیتی نال۔

¹⁶اِک تے مُحبّت دے سببّوں ایہہ جان کے مسِیح دا ہوکا دیندے نیں۔ پئی مَیں خُوشخبری دا جواب دین لئی مُقرّر آں۔

¹⁷پر دُوجے دھڑے صدقہ صاف دِل نال نئیں سگوں ایس خیال نال پئی میری قید وِچ میرے لئی دُکھ پَیدا کرن۔

¹⁸سو فیر کِیہ ہویا؟ نِرا ایہہ پئی سبھ طرح نال مسِیح دا ہوکا دِتّا جاندا اے۔ بھانویں پّج نال ہوئے بھانویں سچیائی نال تے ایس توں مَیں خُوش آں تے رہاں گا وی۔

¹⁹کیوں جو مَیں جاننا آں پئی تُہاڈی دُعا تے یِسُوع مسِیح دے رُوح دے اِنعام توں ایہدا انت میری نجات ہوئے گا۔

²⁰ایس لئی پئی میرے دِل دی تاہنگ تے آس ایہو ای اے پئی مَیں کِسے گلّ وِچ شرمندہ نا ہوواں سگوں پُوری دلیری صدقہ جیویں مسِیح دی وڈیائی میرے بدن دے سببّوں سدا ہوندی رہی اے اوسے طرح ہُن وی ہوئے گی۔ بھانویں مَیں مر جاواں تے بھانویں مَیں جِیوندا رہاں۔

²¹ایس لئی پئی جِیونا میرے بھانے مسِیح اے۔ تے مرنا کھٹّی۔

²²پر جے میرا جِسم وِچ جِیونا میری کمائی نُوں پَھل لائے۔ تے میری سمجھ وِچ نئیں آؤندا پئی مَیں کِنوں چُناں۔

²³مَیں دو وَلّیِں پھسیا ہویا آں۔ پر جی تے ایہہ چاہندا اے۔ پئی مسِیح کول کُوچ کر کے جا رہواں ایس لئی پئی ایہہ اودُوں چوکھا چَنگا اے۔

²⁴پر جِسم وِچ رہنا تُہاڈی خاطر بُہتا ضرُوری اے۔

²⁵تے ایس کر کے پئی مَینُوں ایہدا یقِین اے۔ ایس لئی مَیں جاننا آں پئی جِیوندا رہاں گا۔ سگوں تُہاڈے سبھناں دے نال رہواں گا تاں جو تُسی اِیمان وِچ وَدھو۔ تے اوہدے وِچ خُوش رہو۔

²⁶تے جیہڑا مان تُہانوں میرے اُتّے اے۔ اوہ میرے تُہاڈے کول مُڑ آؤن نال مسِیح یِسُوع وِچ وَدھیرا ہو جائے۔

²⁷نِرا ایہہ کرو پئی تُہاڈا چال چَلّن مسِیح دی خُوشخبری دے لائق ہوئے۔ تاں جو بھانویں مَیں آواں تے تُہانوں ویکھاں تے بھانویں نا آواں تُہاڈا ایہہ حال سُناں۔ پئی تُسی اِکّو رُوح وِچ پکّے اوہ۔ تے اِنجِیل دے اِیمان دے لئی تُسی رَل کے اِک جان ہو کے دِلوں محنت کر دے ہو۔

²⁸تے کِسے گلّ وِچ دُشمناں کولوں نئیں ڈردے۔ ایہہ اوہناں لئی ہلاکت دا صاف نِشان اے۔ تے تُہاڈے لئی خُدا ولّوں نجات دا۔

²⁹کیوں جو مسِیح دی خاطر تُہاڈے اُتّے ایہہ فضل ہویا۔ پئی نا نِرے اوہدے اُتّے اِیمان لیاؤ سگوں اوہدی خاطر دُکھ وی سَہندے رہو۔

³⁰تے تُسی اوسے طرح پُورے دِلوں کوشش کر دے ہو۔ جیویں مَینُوں کر دیاں ویکھیا سی۔ تے ہُن وی سُندے ہو پئی مَیں اوسے طرح کرنا آں۔