Read Western Panjabi فِلِپّیوں 3 Bible Online

فِلِپّیوں 3 - Western Panjabi bible

فِلِپّیوں 3

¹ہور بھراؤ! خُداوند وِچ خُوش رہو۔ تُہانوں اِکّو گلّ گھڑی مُڑی لِکھن وِچ مَینُوں تے کوئی اَوکھ نئیں۔ تے تُہاڈا ایہدے وِچ بچاؤ اے۔

²کُتّیاں توں خبردار رہو۔ بدکاراں توں خبردار رہو۔ ماس وَڈّھان والیاں توں خبردار رہو۔

³کیوں جو سُنت والے تے اسی آں۔ جیہڑے خُدا دے رُوح دی ہدایت نال عبادت کرنے آں۔ تے مسِیح یِسُوع اُتّے فخر کرنے آں۔ تے جِسم دا بھروسا نئیں کر دے۔

⁴پر مَیں تے جِسم دا وی بھروسا کر سکنا آں۔ جے کِسے ہور نُوں جِسم اُتّے بھروسا کرن دا خیال ہوئے۔ تے مَیں اوہدے نالوں وی وَدّھ کر سکنا آں۔

⁵اٹھویں دِن مَیں سُنتی بَیٹھا۔ مَیں اِسرائیل دی قوم تے بِنیمِین دے فِرقے دا آں۔ عِبرانِیاں دا عِبرانی تے شریعت ولّوں فریسی آں۔

⁶جوش ولّوں کلِیسیا دا ستان والا۔ شریعت دی راستی ولّوں بے عیب ساں۔

⁷پر جِنّیاں شیواں میرے نفع دِیاں سن اوہناں نُوں مَیں مسِیح دی خاطر گھاٹا سمجھیا۔

⁸سگوں مَیں اپنے خُداوند یِسُوع مسِیح دی پہچان دی بُہتی خُوبی دے سبّب سارِیاں شیواں نُوں گھاٹا سمجھنا آں۔ جِہدے لئی مَیں ساریاں شیواں دا گھاٹا جھلیا تے اوہناں نُوں کُوڑا سمجھنا آں پئی مسِیح نُوں کھٹ لَواں۔

⁹تے مَیں اوہدے وِچ لَبّھاں تے میرے کول اپنی اوہ راست بازی نا ہوئے جیہڑی شریعت ولّوں اے۔ پر اوہ جیہڑی مسِیح اُتّے اِیمان رکھن دے سببّوں اے پئی اوہ راستبازی جیہڑی خُدا ولّوں اِیمان دی راہِیں مِلدی اے۔

¹⁰تے مَیں اوہنوں تے اوہدے جِیو اُٹھن دی قُدرت نُوں تے اوہدے نال دُکھاں وِچ شریک ہون نُوں معلُوم کراں۔ تے اوہدی مَوت ورگا ہو جاواں۔

¹¹پئی کوِیں مُردیاں وِچوں جی اُٹھن دے درجے نُوں اپڑاں۔

¹²ایہہ نئیں پئی مَینُوں ہُن تِیکر لَبھّا اے یا مَیں ہُن تِیکر پُگ گیا آں پر مَیں بھجا جانا آں۔ پئی اوس گلّ نُوں ہتّھ پاں جِہدے مارِیاں مسِیح یِسُوع مَینُوں ہتّھ پایا اے۔

¹³بھراؤ! میرا ایہہ خیال نئیں۔ پئی میرے ہتّھ لگ گیا اے پر اِک گلّ کرنا آں جیہڑیاں شیواں پِچّھے رہ گِئیاں نیں اوہناں نُوں وسار کے اگلیاں شیواں ولّ وَدھدا جاناں آں۔

¹⁴نشانے ولّ بھجا جاناں آں۔ تاں جو اوس اِنعام نُوں لے لَواں جِہدے لئی خُدا نے مسِیح یِسُوع دی راہِیں مَینُوں اُتانہہ سدّیا۔

¹⁵سو جِنّے ساڈے وِچوں کامِل نیں ایسے طرح ای سمجھن۔ تے جے کِسے گلّ وِچ تُہاڈا ہور خیال ہوئے تے تاں خُدا اوہ وی تُہاڈے اُتّے ظاہر کر دے گا۔

¹⁶تَد وی جِتّھوں تِیکر اسی پُجے آں اوسے ای سیدھ اُتّے ٹُریئے۔

¹⁷بھراؤ! تُسی رَل کے میری رِیس کرو تے اوہناں نُوں سنجھانو جیہڑے اِنج ٹُردے نیں جِیکُوں تُہاڈے لئی ساڈا وی نمونہ اے۔

¹⁸ایس لئی پئی بتھیرے اِنج ٹُردے نیں جِنہاں ولّوں مَیں تُہانوں بہتیری واری دسیا اے تے ہُن وی رو رو کے دسنا آں پئی اوہ مسِیح دی صلِیب دے وَیری نیں۔

¹⁹اوہناں دا انت ہلاکت اے۔ ڈِھڈ اوہناں واسطے خُدا اے۔ اوہ اپنی شرم دِیاں گلّاں اُتّے پُھلدے نیں۔ تے دُنیا دِیاں شیواں ولّ دھیان رکھدے نیں۔

²⁰پر ساڈا وطن اسمان اے۔ تے اسی اِک نجات دین والے یعنی خُداوند یِسُوع مسِیح دے آؤن دی اُڈِیک وِچ آں۔

²¹اوہ اپنی اوس قُدرت دے اثر دے سببّوں جِہدے توں سارِیاں شیواں اپنے تابعیاں وِچ کر سکدا اے۔ ساڈے نِکھد بدن دی شکل بدل کے اپنے جلالی بدن دی صُورت اُتّے بنائے گا۔