Read Western Panjabi ۱-تھِسّلُنِیکوں 1 Bible Online

۱-تھِسّلُنِیکوں 1 - Western Panjabi bible

۱-تھِسّلُنِیکوں 1

¹پَولُس تے سِلوانُس تے تِیمُتِھیُس ولّوں تھِسّلُنِیکیاں دی کلِیسیا دے ناں جیہڑی خُدا باپ تے خُداوند یِسُوع مسِیح وِچ اے فضل تے تسلّی تُہانوں مِلدی رہے۔

²تُہاڈے سبھناں ولّوں اسی خُدا دا شُکر کرنے آں۔ تے اپنیاں دُعاواں وِچ سدا تُہانوں یاد کرنے آں۔

³تے اپنے خُدا تے باپ اگّے تُہاڈے اِیمان دے کمّ تے مُحبّت دی محنت تے اوس آس دے صبر نُوں جیہڑا ساڈے خُداوند یِسُوع مسِیح دے اُتّے اے۔ ہر ویلے یاد کرنے آں۔

⁴بھراؤ! خُدا دے پیاریو! اسی جاننے آں۔ پئی تُسی چُنے ہوئے اوہ۔

⁵ایس لئی پئی ساڈی خُوشخبری تُہاڈے کول نِریاں گلّاں نال نئیں پر زور تے پاک رُوح تے پُورے اعتقاد نال اَپڑی جیویں تُہانوں پتا اے۔ پئی اساں تُہاڈی خاطر تُہاڈے وِچ کیہو جِہیا بن وکھایا۔

⁶تے تُسی کلام نُوں بڑی مُصِیبت وِچ پاک رُوح دی خُوشی نال مَن کے ساڈے تے نالے خُداوند دے نمونے اُتّے چَلّن والے بنے۔

⁷ایتھوں تِیکر پئی مَکِدُنیہ تے اَخیہ وِچ سارے اِیمانداراں لئی نمونہ بن گئے۔

⁸کیوں جو تُہاڈے کولوں نا نِرا مَکِدُنیہ تے اَخیہ وِچ خُداوند دے کلام دی پُکار ہوئی سگوں تُہاڈا اِیمان جیہڑا خُدا اُتّے اے ہر تھاں اجیہا دُھم گیا۔ پئی ساڈے آکھن دی کوئی لوڑ نئیں۔

⁹ایس لئی پئی اوہ آپ ساڈا ذِکر کر دے نیں پئی ساڈا تُہاڈے کول آؤنا کیہو جِہیا ہویا تے تُسی کِس طرح بُتاں ولّوں خُدا ولّ مُڑے۔ تاں جو زِندہ تے سَچّے خُدا دے بندے بنو۔

¹⁰تے اوہدے پُتر دے اسمان ولّوں آؤن دی اُڈِیک وِچ رہو۔ جِہنُوں اوس مُردیاں وِچوں جوایا۔ جِہدا ناں اے یِسُوع۔ جیہڑا سانُوں آؤن والے غضبوں چھڈاؤندا اے۔