Read Western Panjabi ۱-تھِسّلُنِیکوں 3 Bible Online

۱-تھِسّلُنِیکوں 3 - Western Panjabi bible

۱-تھِسّلُنِیکوں 3

¹ایس واسطے جد اسی ہور سہار نا سکے اساں اتھینے وِچ اکلّے رہنا منظُور کِیتا۔

²تے اساں تِیمُتِھیُس نُوں جیہڑا ساڈا بھرا تے مسِیح دی خُوشخبری وِچ خُدا دا نوکر اے۔ ایسے واسطے گھلّیا پئی اوہ تُہانوں پَکیّاں کرے۔ تے تُہاڈے اِیمان ولّوں تُہانوں تسلّی دیوے۔

³پئی کوئی بندہ ایہناں مُصِیبتاں توں گھابر نا جائے۔ کیوں جو تُسی آپ جان دے اوہ۔ پئی اسی ایہناں ای لئی مُقرّر ہوئے آں۔

⁴سگوں پہلاں وی جد اسی تُہاڈے کول ساں تُہانوں آکھدے ہوندے ساں۔ پئی سانُوں مُصِیبت سہنی پَوے گی۔ فیر ایسے طرح ہویا تے تُسی جان دے وی ہو۔

⁵ایس واسطے جد مَیں ہور برداشت نا کر سکیا۔ تَد تُہاڈے اِیمان دا حال دریافت کرن لئی گھلّیا۔ پئی اجیہا نا ہوئے۔ پئی ازمان والے تُہاڈی ازمایش کِیتی ہوئے۔ تے ساڈی محنت ایویں گئی ہوئے۔

⁶پر ہُن جو تِیمُتِھیُس تُہاڈے کول آ کے تُہاڈے اِیمان تے مُحبّت دی تے نالے ایس گلّ دی خُوشخبری دِتّی پئی تُسی سدا سانُوں نیک یاد کر دے ہو۔ تے ساڈے ویکھن دی اجیہی چاہ رکھدے ہو۔ جیویں اسی تُہاڈے ویکھن دی۔

⁷ایس لئی بھراؤ! سانُوں ساری تنگی تے مُصِیبت وِچ تُہاڈے اِیمان دے سبّب تُہاڈے ولّوں تسلّی ہوئی۔

⁸کیوں جو ہُن جے تُسی خُداوند وِچ قیم ہو۔ تے اسی جیونے آں۔

⁹تُہاڈے ولّوں خُدا دے سامھنے سانُوں جِنّی خُوشی مِلی اے۔ اوہدے بدلے کِس طرح تُہاڈی بابت خُدا دا شُکر کرئیے؟

¹⁰اسی دِنے راتِیں بُہت وَدّھ کے دُعا منگنے آں۔ پئی تُہاڈی صُورت ویکھئے۔ تے تُہاڈے اِیمان دے گھاٹے نُوں پُوریاں کرئیے۔

¹¹ہُن آپ ساڈا خُدا تے باپ تے ساڈا خُداوند یِسُوع تُہاڈے ولّ ساڈا راہ بنائے۔

¹²تے خُداوند کرے پئی جیویں سانُوں تُہاڈے نال مُحبّت اے اوسے طرح تُہاڈی مُحبّت وی آپو وِچ تے ساریاں بندیاں نال بُہتی ہوئے۔ تے وَدھے۔

¹³تاں جو تُہاڈے دِلاں نُوں اجیہا تگڑیاں کرے۔ پئی جد ساڈا خُداوند یِسُوع اپنے ساریاں پاک لوکاں نال آوے۔ اوہ ساڈے خُدا تے باپ دے سامھنے پاکیزگی وِچ بے عیب ہون۔