Read Western Panjabi ۱-تھِسّلُنِیکوں 5 Bible Online

۱-تھِسّلُنِیکوں 5 - Western Panjabi bible

۱-تھِسّلُنِیکوں 5

¹پر بھراؤ! کوئی لوڑ نئیں۔ پئی ویلیاں تے مَوقعیاں ولّوں تُہانوں کُجھ لِکھیا جائے۔

²ایس لئی پئی تُسی آپ چنگی طرح جان دے ہو۔ پئی خُداوند دا دِن ایس طرح آؤن والا اے۔ جیویں رات نُوں چور آؤندا اے۔

³جِس ویلے لوک آکھدے ہون گے۔ پئی خَیر سُکھ اے۔ اوس ویلے اوہناں اُتّے ایس طرح اِک دم تباہی آوے گی۔ جیویں جمّن والی عورت نُوں پِیڑاں۔ تے اوہ کِسے طرح نا بچن گے۔

⁴پر تُسی بھراؤ ہنیرے وِچ نئیں۔ پئی اوہ دِن چور وانگر تُہاڈے اُتّے آوے۔

⁵کیوں جو تُسی سارے چانن دے پُتر تے دِن دے پُتر اوہ۔ اسی نا رات دے آں نا ہنیرے دے۔

⁶سو ہورناں وانگر سَوں نا رہئے۔ پر جاگدے تے ہوش وِچ رہئے۔

⁷کیوں جو جیہڑے سَوندے نیں اوہ راتِیں سَوندے نیں۔ تے جیہڑے نشہ پِیندے نیں سو راتِیں پِیندے نیں۔

⁸پر اسی جیہڑے دِن دے آں اِیمان تے مُحبّت دی بکتر پا کے تے نجات دی آس دا خود پا کے ہُشیار رہئے۔

⁹کیوں جو خُدا سانُوں غضب واسطے نئیں پر ایس واسطے مُقرّر کِیتا اے۔ پئی سانُوں اپنے خُداوند یِسُوع مسِیح دی راہِیں نجات مِلے۔

¹⁰اوہ ساڈی خاطر ایس لئی مویا۔ پئی اسی بھانویں جاگدے بھانویں سُتّے سارے مِل کے اوسے دے نال جِیوئیے۔

¹¹سو تُسی اِک دُوجے نُوں تسلّی دیو تے اِک دُوجے دی ترقی دا سبّب بنو جیویں تُسی کر دے وی ہو۔

¹²تے بھراؤ! اسی تُہاڈے اگّے درخواست کرنے آں پئی جیہڑے تُہاڈے وِچ محنت کر دے تے خُداوند وِچ تُہاڈے آگُو نیں تے تُہانوں نصِیحت کر دے نیں اوہناں دے آکھے وِچ رہو۔

¹³تے اوہناں دے کمّ دے سبّب مُحبّت نال اوہناں دی بُہتی عِزّت کرو۔ تے آپو وِچ میل ملاپ رکھو۔

¹⁴تے بھراؤ! اسی تُہانوں نصِیحت کرنے آں پئی بے قاعدہ ٹُرن والیاں نُوں سمجھاؤ۔ نِگھریاں ہویاں نُوں دلاسا دیو ماڑیاں نُوں سنبھالو۔ سبھناں نال صبر دا سلُوک کرو۔

¹⁵خیال رکھو پئی کوئی کِسے نال بدی دے بدلے بدی نا کرے۔ سگوں ہر ویلے آپو وِچ تے سبھناں نال نیکی کرن دے پِچّھے لگّے رو۔

¹⁶ہر ویلے خُوش رہو۔

¹⁷ہر ویلے دُعا منگو۔

¹⁸سبھناں گلّاں وِچ شُکر گُزاری کرو۔ کیوں جو مسِیح یِسُوع وِچ تُہاڈے واسطے خُدا دی ایہو مرضی اے۔

¹⁹رُوح نُوں نا بُجھاؤ۔

²⁰نبُوّتاں دی حقارت نا کرو۔

²¹سارِیاں گلّاں پرکھو جیہڑی چنگی اے اوہنوں قابُو رکھو۔

²²بدی دی ہر صُورت توں لانبھے رہو۔

²³خُدا جیہڑا تسلّی دا چشمہ اے آپ تُہانوں بالکل پاک کرے تے تُہاڈی رُوح تے جان تے بدن ساڈے خُداوند یِسُوع مسِیح دے آؤن تِیکر ثابت ثبُوت تے بے عیب بچے رہن۔

²⁴تُہاڈا سَدّن والا وفادار اے۔ اوہ ایسے طرح کرے گا۔

²⁵بھراؤ! ساڈے لئی دُعا منگو۔

²⁶پاک بوسنے نال سارے بھراواں نُوں سلام آکھو۔

²⁷مَیں تُہانوں خُدا دی سَونہہ چُکانا آں۔ پئی ایہہ خط سارے بھراواں نُوں سُنایا جاوے۔

²⁸ساڈے خُداوند یِسُوع مسِیح دا فضل تُہاڈے اُتّے رہے۔ آمِین۔