Read Western Panjabi ۲-تھِسّلُنِیکوں 1 Bible Online

۲-تھِسّلُنِیکوں 1 - Western Panjabi bible

۲-تھِسّلُنِیکوں 1

¹پَولُس تے سِلوانُس نے تِیمُتِھیُس ولّوں تھِسّلُنِیکیاں دی کلِیسیا دے ناں جیہڑی ساڈے باپ خُدا تے خُداوند یِسُوع مسِیح وِچ اے۔

²تُہانوں خُدا باپ تے خُداوند یِسُوع مسِیح ولّوں کرم تے تسلّی مِلدی رہے۔

³بھراؤ! تُہاڈے ولّوں ہر ویلے خُدا دا شُکر کرنا ساڈے اُتّے فرض اے تے چاہیدا وی اے۔ کیوں جو تُہاڈا اِیمان بُہت وَدھدا جاندا اے۔ تے تُہاڈی ساریاں دی مُحبّت آپو وِچ بُہت وَدّھدِی جاندی اے۔

⁴ایتھوں تِیکر پئی اسی آپ خُدا دی کلِیسیاواں وِچ تُہاڈے ولّوں فخر کرنے آں۔ پئی جِنّے ظُلم تے مُصِیبتاں تُسی سَہندے ہو۔ اوہناں ساریاں وِچ تُہاڈا صبر تے اِیمان ظاہر ہوندا اے۔

⁵ایہہ خُدا دی سَچّی عدالت دی صاف نشانی اے۔ تاں جو تُسی خُدا دی بادشاہی دے قابل ٹھیرو۔ جِہدے لئی تُسی دُکھ وی سَہندے ہو۔

⁶کیوں جو خُدا دے اگّے ایہہ نیاں اے۔ پئی بدلے وِچ تُہاڈے دُکھ دین والِیاں نُوں دُکھ۔

⁷تے تُہانوں دُکھ سہن والیاں نُوں ساڈے نال آرام دیوے۔ اوس ویلے جدوں خُداوند یِسُوع اپنیاں زوراور فرِشتیاں نال مُچّی ہوئی اَگ وِچ اسمانوں ظاہر ہوئے گا۔

⁸تے جیہڑے خُدا نُوں نئیں پچھاندے تے ساڈے خُداوند یِسُوع دی اِنجِیل نُوں نئیں مَن دے۔ اوہناں نُوں بدلہ دے گا۔

⁹اوہ خُداوند دے چِہرے تے اوہدی قُدرت دے جلال کولوں دُراڈے ہو کے سدا دی ہلاکت دی سزا پان گے۔

¹⁰ایہہ اوس دِن ہوئے گا۔ جدوں اوہ اپنے پاک لوکاں وِچ جلال پان تے ساریاں اِیمان لیاؤن والیاں لئی اچرج دسن لئی آوے گا۔ کیوں جو تُساں ساڈی گواہی اُتّے اِیمان لیاندا۔

¹¹ایس لئی اسی تُہاڈے لئی ہر ویلے دُعا وی منگدے رہنے آں پئی ساڈا خُدا تُہانوں ایس بُلاوے دے قابل جانے تے نیکی دی ہر خواہش تے اِیمان دے ہر کمّ نُوں قُدرت نال پُوریاں کرے۔

¹²تاں جو ساڈے خُدا تے خُداوند یِسُوع مسِیح دے فضل دے سببّوں ساڈے خُداوند یِسُوع دا ناں تُہاڈے وِچ جلال پاوے تے تُسی اوہدے وِچ۔