Read Western Panjabi ۲-تھِسّلُنِیکوں 2 Bible Online

۲-تھِسّلُنِیکوں 2 - Western Panjabi bible

۲-تھِسّلُنِیکوں 2

¹بھراؤ! اسی اپنے خُداوند یِسُوع مسِیح دے آؤن تے اوہدے کول اپنے اکٹّھے ہون دی بابت تُہاڈی مِنّت کرنے آں۔

²پئی جے کِسے رُوح دی گلّ یا کوئی کلام یا اجیہا خط آوے۔ جیہڑا ساڈے خط وانگُوں دسے اوس توں ایہہ سمجھ کے پئی خُداوند دا دِن پُج گیا اے۔ تُسی دِلوں نا ڈولو تے نا تُسی گھابر جاؤ۔

³کِسے طرح کِسے دے دھوکھے وِچ نا آ جانا کیوں جو اوہ دِن نئیں آؤنا جد تِیکر پہلاں برگشتگی نا ہوئے۔ تے اوہ گُناہ دا بندہ یعنی ہلاکت دا پُتر ظاہر نا ہوئے۔

⁴جیہڑا مخالفت کر دا اے۔ تے ہر اِک کولوں جیہڑا خُدا اکھواؤندا اے۔ یا جِہدی مَنتا ہوندی اے۔ اپنے آپ نُوں اُچّا کر دا اے۔ ایتھوں تِیکر پئی اوہ خُدا دے مَقدِس وِچ بَہہ کے اپنے آپ نُوں خُدا ظاہر کر دا اے۔

⁵تُہانوں یاد نئیں پئی جد مَیں تُہاڈے کول ساں تَد مَیں ایہہ گلّاں تُہانوں آکھدا ساں۔

⁶تے ہُن جیہڑی شے اوہنوں ڈکدی اے۔ پئی اوہ اپنے ویلے سِر ظاہر ہوئے۔ تُسی جان دے اوہ۔

⁷کیوں جو بے دِینی دا بھیت ہُن وی عمل پیا کر دا اے۔ پر ہُن اِک ڈکن والا اے۔ تے جد تِیکر اوہ ہٹایا نا جائے ڈکدا رہے گا۔

⁸تے فیر اوہ بے دِین بندہ جِہنُوں خُداوند یِسُوع اپنے مُنھ دی پُھوک نال ہلاک تے اپنے آؤن دے جَلوے نال فنا کرے گا ظاہر کِیتا جائے گا۔

⁹یعنی اوہ بندہ جِہدا آؤنا شیطان دی تاثِیر دے سببّوں ہر طرح دی طاقت تے نشانِیاں تے جُھوٹھے عجوبیاں نال۔

¹⁰تے ہلاک ہون والیاں لئی ناراستی دے ہر طرح دے دھوکھے نال ہوئے گا۔ ایس لئی پئی اوہناں سچیائی دی مُحبّت نُوں قبول نا کِیتا جِہدے نال اوہناں دی نجات ہوندی۔

¹¹ایس لئی خُدا اوہناں اُتّے بدراہی دی تاثِیر گھلّے گا۔ تاں جو اوہ جُھوٹھ نُوں سَچ جانن۔

¹²تے جِنّے سچیائی دا یقِین نئیں سن کر دے سگوں ناراستی نُوں پسند کر دے سن اوہ سارے سزا پان۔

¹³پر بھراؤ! خُدا دے پیاریو ساڈا فرض اے پئی ہرویلے تُہاڈے ولّوں خُدا دا شُکر کریئے۔ کیوں جو خُدا مُڈھوں تُہانوں چُن لیا۔ پئی رُوح دی راہِیں پاک بن کے تے سچیائی اُتّے اِیمان لیا کے نجات پاؤ۔

¹⁴جِہدے لئی اوس تُہانوں ساڈی اِنجِیل دی راہِیں سدّیا تاں جو تُسی ساڈے خُداوند یِسُوع مسِیح دا جلال حاصِل کرو۔

¹⁵سو بھراؤ تگڑے ہو کے کھلے رہو۔ تے جِنہاں روائِتاں دی بابت تُساں ساڈی زبانی یا ساڈے خط دی راہِیں تعلِیم پائی۔ اوہناں اُتّے قیم رہو۔

¹⁶ہُن ساڈا خُداوند یِسُوع مسِیح آپ تے ساڈا باپ خُدا جِس ساڈے نال مُحبّت رکھی تے فضل نال سدا دی تسلّی تے چنگی آس سانُوں بخشی۔

¹⁷تُہاڈے دِلاں نُوں تسلّی دے تے ہر نیک کمّ تے گلّ وِچ پَکیّاں کرے۔