Read Western Panjabi ۱-تِیمُتِھیُس 1 Bible Online

۱-تِیمُتِھیُس 1 - Western Panjabi bible

۱-تِیمُتِھیُس 1

¹پَولُس ولّوں جیہڑا ساڈے نجات دین والے خُدا تے ساڈی آس۔ مسِیح یِسُوع دے حُکم نال مسِیح یِسُوع دا رسُول اے۔

²تِیمُتِھیُس دے ناں جیہڑا اِیمان وِچ میرا سَچّا پُتر اے خُدا باپ تے ساڈے خُداوند مسِیح یِسُوع ولّوں فضل رَحم تے تسلّی ہوئے۔

³جیویں مَکِدُنیہ جان دے ویلے مَیں تینُوں نصِیحت دِتّی سی۔ پئی اِفِسُس وِچ رہ کے بعضیاں بندیاں نُوں حُکم دَیا کر پئی اوہ ہور طرح دی تعلِیم نا دین۔

⁴تے اوہناں کہانِیاں تے بے انت شجریاں دا خیال نا کرن۔ جیہڑے جھگڑے دا سبّب ہوندے نیں۔ تے اوس خُدائی۔ بندوبست دے سببّوں نئیں جیہڑا اِیمان اُتّے بنیا ہویا اے۔ اوسے طرح مَیں ہُن وی کرنا آں۔

⁵حُکم دا مطلب ایہہ اے پئی پاک دِلی تے نیک نِیتی تے سَچّے اِیمان نال مُحبّت ہوئے

⁶ایہناں توں کُھنج کے کُجھ بندے تھوتھے بکواس ولّ پرت گئے نیں۔

⁷تے شریعت دے اُستاد بننا چاہندے نیں بھانویں جیہڑیاں گلّاں آکھدے نیں تے جِنہاں دا پَکّ کر دے نیں اوہ اوہناں نُوں سمجھدے وی نئیں۔

⁸پر اسی جاننے آں۔ پئی شریعت چنگی اے۔ جے کوئی اوہنوں شریعت وانگُوں ورتے۔

⁹یعنی ایہہ سمجھ کے پئی شریعت راست لوکاں لئی مُقرّر نئیں ہوئی سگوں بے شریعت تے کھبّے لوکاں تے بے دِیناں۔ تے گُناہِیاں تے پِلیتاں تے بے اِیمان تے ماں پئیو دے قتل کرن والیاں تے خُونِیاں۔

¹⁰تے زناہیاں تے مُنڈے بازاں تے بردہ فروشاں تے جُھوٹھیاں تے جُھوٹھی سَونہہ کھان والیاں تے جو کُجھ وی ہور ٹھیک تعلِیم دے اُلٹ ہوئے۔

¹¹ایہہ مُبارک خُدا دے جلال دی اوس خُوشخبری دے سببّوں اے۔ جیہڑی میرے سپُرد ہوئی اے۔

¹²مَیں اپنے طاقت دِین والے مسِیح یِسُوع دا ایس لئی شُکر کرنا آں۔ پئی اوس مَینُوں دیانتدار جان کے اپنی سیوا لئی مُقرّر کِیتا۔

¹³بھانویں مَیں پہلاں کُفر آکھن والا تے ستان والا تے بے عِزّت کرن والا ساں تَد وی میرے اُتّے رَحم ہویا ایس واسطے پئی مَیں بے اِیمانی دی حالت وِچ نادانی نال ایہہ کمّ کِیتے سن۔

¹⁴تے ساڈے خُداوند دا فضل اوس اِیمان تے پیار دی راہِیں جیہڑا مسِیح یِسُوع وِچ اے بُہت وَدّھ کے ہویا۔

¹⁵ایہہ سَچّی گلّ اے تے سبھنیں پاسیں مَنّن والی اے پئی مسِیح یِسُوع گُناہِیاں نُوں نجات دین واسطے دُنیا وِچ آیا جِنہاں وِچوں مَیں موہرلا آں۔

¹⁶میرے اُتّے ایس لئی رَحم ہویا پئی یِسُوع مسِیح میرے سببّوں جیہڑا موہرلا ہاں سارا صبر وکھائے پئی جِنہاں لوکاں سدا دی زِندگی لئی اوہدے اُتّے اِیمان لیاؤنا اے اوہناں لئی مَیں نمونہ بناں۔

¹⁷ہُن جُگّاں دے بادشاہ سدا حیات۔ اَن ڈِٹھ۔ اِکّو خُدا دی عِزّت تے ٹھاٹھ باٹھ سدا دے لئی ہوئے۔ آمِین۔

¹⁸میرے پُتر تِیمُتِھیُس۔ اوہناں پیشِینگوئِیاں دے سببّوں جِنہاں تینُوں راہ پایا۔ مَیں ایہہ حُکم کرنا آں۔ پئی تُوں اوہناں دی راہِیں چنگی لڑائی لڑیں۔

¹⁹اِیمان تے نیک نِیتی نُوں پَکیّاں رکھّیں۔ جِنہاں دے چھڈن دے سببّوں بتھیریاں لوکاں دے اِیمان دا بیڑا ڈُب گیا اے۔

²⁰اوہناں وِچوں ہُمِنِیُس تے سکندر نیں۔ اوہناں نُوں مَیں شیطان دے ہتّھ وِچ دے دِتّا اے۔ پئی کُفر توں مُڑنا سِکھّن۔