Read Western Panjabi ۱-تِیمُتِھیُس 2 Bible Online

۱-تِیمُتِھیُس 2 - Western Panjabi bible

۱-تِیمُتِھیُس 2

¹مَیں ساریاں توں پہلاں ایہہ نصِیحت دینا آں۔ پئی ساریاں بندیاں لئی دُعا تے بینتی تے عرض تے شُکر کِیتے جان۔

²بادشاہاں تے اُچّے رُتبے والیاں واسطے ایس لئی کِیتے جان۔ پئی اسی پُوری دِینداری تے حلِیمی تے امن تے ارمان نال زِندگی کِٹئے۔

³ایہہ ساڈے نجات دین والے خُدا نُوں پسند تے چَنگا لگدا اے۔

⁴اوہ چاہندا اے پئی سارے لوک نجات پان۔ تے سچیائی دی پچھان تِیکر اَپڑ جان۔

⁵کیوں جو خُدا اِکّو ای اے تے خُدا تے بندیاں وِچ وچولا وی اِکّو ای اے۔ یعنی یِسُوع مسِیح جیہڑا اِنسان اے۔

⁶جِس سبھناں دی تھانویں ڈنڈ بھرن لئی اپنا آپ دے دِتّا۔ پئی ویلیاں سِر اوہدی گواہی دِتّی جاوے۔

⁷مَیں سَچ آکھناں آں تے جُھوٹھ نئیں آکھدا۔ پئی مَیں ایسے مطلب نال منادی کرن والا تے رسُول تے غیر قوماں نُوں اِیمان تے سچیائی دِیاں گلّاں سکھان والا لگّا آں۔

⁸ایس لئی مَیں چاہناں آں پئی مرد سبھنیں تھائِیں غُصیّوں تے جھگڑے بِناں پاک ہتّھ چُک کے دُعا منگیا کرن۔

⁹ایسے طرح زنانِیاں سُچجیاں کپڑیاں نال لنگھ تے سُرت نال اپنے آپ نُوں سنگارن۔ وال گُندن۔ تے سونے تے موتِیاں تے بُہتے مُل والیاں کپڑیاں نال نئیں۔

¹⁰سگوں جیویں خُدا دِیاں مَنّن والیاں نُوں پھبدا اے پئی اپنے آپ نُوں چنگے کمّاں نال سنگارن۔

¹¹زنانی چُپ چپاتیاں پُوری تابعداری نال سِکھّے۔

¹²تے مَیں ایہہ اجازت نئیں دیندا پئی زنانی سِکھائے۔ یا مرد اُتّے حُکم کرے۔ سگوں چُپ رہوے۔

¹³کیوں جو پہلاں آدم بنایا گیا سی۔ تے اودُوں پِچّھوں حوّا۔

¹⁴تے آدم فریب نئیں سی کھادا سگوں زنانی فریب کھا کے گُناہ وِچ پَے گئی۔

¹⁵پر اولاد جمّن دے سببّوں نجات پائے گی۔ جے اِیمان تے پیار تے پاکیزگی تے پرہیزگاری اُتّے قیم رہے۔