Read Western Panjabi ۱-تِیمُتِھیُس 3 Bible Online

۱-تِیمُتِھیُس 3 - Western Panjabi bible

۱-تِیمُتِھیُس 3

¹ایہہ گلّ سَچّی اے۔ پئی جیہڑا بندہ نگران ہونا چاہندا اے اوہ چنگے کمّ دی تانگہہ کر دا اے۔

²ایس لئی نگران بے نُقص تے اِک زنانی دا بندہ۔ تے پرہیزگار تے سُرت والا تے سُچجا تے مُسافراں دی سیوا کرن والا تے سکھان وِچ چَنگا ہوئے۔

³تے نا نشے وِچ ڈنڈ پان والا تے نا مارن کُٹّن والا ہوئے سگوں حلِیم ہوئے۔ تے جھگڑا کرن والا تے پَیسے دا پیارا نا ہوئے۔

⁴اپنے گھر دا چنگی طرح بندوبست کرن والا ہوئے تے اپنیاں بچّیاں نُوں پُوری سنجِیدگی نال تابعیاں رکھن والا ہوئے۔

⁵(جدوں کوئی اپنے گھر دا ای بندوبست نئیں کر سکدا تے اوہ خُدا دی کلِیسیا دی کِیویں راکھی کرے گا؟)

⁶نواں مُرید نا ہوئے متے فخر کر کے ابلیس دی سزا پائے۔

⁷تے باہر والیاں وِچ نیک نام ہونا چاہیدا اے۔ تاں جو ملامت وِچ تے ابلیس دی پھاہی وِچ پَھس نا جائے۔

⁸ایسے طرح معاونین نُوں وی سنجیدہ ہونا چاہیدا اے۔ نِگلّے تے شرابی تے ناجائز نفع لین دے لالچی نا ہون۔

⁹تے خُدا دے اِیمان دے بھیت نُوں صاف دِل وِچ حفاظت نال رکھن۔

¹⁰اوہ وی پہلاں ازمائے جان۔ پِچّھوں جے بے نُقص نِکلن۔ تے خِدمت دا کمّ کرن۔

¹¹ایسے طرح زنانِیاں وی سنجیدہ ہونیاں چاہیدیاں نیں۔ اُوج لان والِیاں نا ہون سگوں پرہیزگار تے سارِیاں گلّاں وِچ اِیمان دار ہون۔

¹²خادم اِکّو اِک زنانی دے بندے ہون تے اپنے اپنے بچّیاں تے گھراں دا چنگی طرح بندوبست کر دے ہون۔

¹³کیوں جو جیہڑے خِدمت دا کمّ چنگی طرح مُکاندے نیں اوہ اپنے لئی چَنگا رُتبہ تے اوس اِیمان وِچ جیہڑا یِسُوع مسِیح اُتّے اے۔ بڑی دلیری پاندے نیں۔

¹⁴تیرے کول چھیتی آؤن دی آس کر کے مَیں ایہہ گلّاں تینُوں لِکھنا آں۔

¹⁵تے جے مَینُوں چِر لگّے تے تُوں جان لے پئی خُدا دے گھر یعنی جِیوندے خُدا دی کلِیسیا وِچ جیہڑی سچیائی دا تھم تے نِیہہ اے۔ کِیویں وَرتنا چاہیدا اے۔

¹⁶ایہدے وِچ شک نئیں پئی دِینداری دا بھید وَڈا اے یعنی اوہ جیہڑا جِسم وِچ ظاہر ہویا۔ تے رُوح وِچ راستباز مِتھیا گیا۔ تے فرِشتیاں وِچ وکھالی دِتّا۔ غیر قوماں وِچ اوہدی منادی ہوئی دُنیا وِچ مَنّیا گیا۔ تے جلال وِچ اُتانہہ چُکیا گیا۔