Read Western Panjabi ۱-تِیمُتِھیُس 4 Bible Online

۱-تِیمُتِھیُس 4 - Western Panjabi bible

۱-تِیمُتِھیُس 4

¹پر رُوح صاف آکھدا اے۔ پئی آؤن والیاں زمانیاں وِچ کُجھ اِیمان نُوں چھڈ جان گے بُھلان والِیاں رُوحاں تے شیطان دِیاں تعلِیماں ولّ گَوہ کرن گے۔ تے اِیمان نُوں بُھل جان گئے۔

²ایہہ اوہناں جُھوٹھیاں بندیاں دے فریب دے سببّوں ہوئے گا۔ جِنہاں اپنے دِلاں نُوں گویا تّتے لوہے نال داغی کِیتا۔

³ایہہ لوک ویاہ کرن توں ٹھاکن گے تے اوہناں کھانیاں توں لانبھے رہن دا حُکم دین گے۔ جیہڑے خُدا ایسے لئی بنائے نیں۔ پئی اِیماندار تے سَچ نُوں پچھانن والے لوک اوہناں نُوں شُکر کر کے کھان۔

⁴کیوں جو خُدا دِیاں بنائِیاں ہویاں سارِیاں شیواں چَنگیاں نیں تے کوئی شے اِنکار کرن جوگی نئیں۔ ایس شرط نال پئی شُکر کر کے لئی جائے۔

⁵ایس لئی پئی خُدا دے کلام تے دُعا نال پاک ہوندی اے۔

⁶جے تُوں بھراواں نُوں ایہہ گلّ یاد کرائیں گا۔ تے مسِیح یِسُوع دا چَنگا خادم بنیں گا۔ تے اِیمان تے اوس چنگی سِکھیا نال جِنہاں نُوں تُوں مَندا آیا ایں پلدا رہیں گا۔

⁷پر بے اِیمانی دِیاں تے بُڈِّھیاں دِیاں کہانِیاں توں لانبھے رہو۔ تے دِینداری لئی مشق کریا کر۔

⁸کیوں جو جِسمانی مشق دا فائدہ تھوڑے چِر لئی اے۔ پر دِینداری سارِیاں گلّاں وِچ فائدہ دیندی اے۔ ایس لئی پئی ہُن وی تے آؤن والی زِندگی دا وعدہ وی ایہدے نال ای اے۔

⁹ایہہ سَچّی گلّ اے تے سبھنیں پاسیں مَنّن والی اے۔

¹⁰کیوں جو اسی ایسے واسطے محنت تے جتن کرنے آں۔ پئی ساڈی آس اوس جِیوندے خُدا توں اے جیہڑا سارے بندیاں نُوں نجات دین والا اے۔ تے خاص کر اِیمان والیاں نُوں۔

¹¹ایہناں گلّاں دا حُکم دے تے سِکھا۔

¹²کوئی تیری جوانی ولّوں تیری حقارت نا کرے۔ سگوں اِیمان والیاں لئی گلّاں کرن تے چال چَلّن تے پیار تے اِیمان پاکیزگی وِچ نمونہ بن۔

¹³جد تِیکر مَیں نا آواں۔ پڑھن تے نصِیحت کرن تے سکھان ولّ دھیان رکھ۔

¹⁴اوس بخشِش نُوں نا بُھل جیہڑی تیرے کول اے۔ تے نبُوّت دی راہِیں بزُرگاں دے ہتّھ رکھن نال تینُوں مِلی سی۔

¹⁵ایہناں گلّاں دا فِکر کر تے ایہناں وِچ لگّا رہو۔ تاں جو تیرے وَدھن دا ساریاں نُوں پتا لگّے۔

¹⁶اپنی تے اپنی تعلِیم دی راکھی کر۔ اوہناں گلّاں اُتّے پَکّا رہو۔ کیوں جو اجیہا کرن نال تُوں اپنی تے سُنن والیاں دی نجات دا سبّب ہوویں گا۔