Read Western Panjabi ۱-تِیمُتِھیُس 5 Bible Online

۱-تِیمُتِھیُس 5 - Western Panjabi bible

۱-تِیمُتِھیُس 5

¹کِسے بُڈّھے نُوں نا جِھڑکیں۔ سگوں پئیو سمجھ کے نصِیحت کریں۔

²تے گبھرُوآں نُوں بھرا سمجھ کے۔ تے بُڈِّھیاں زنانِیاں نُوں ماں سمجھ کے تے مُٹیاراں زنانِیاں نُوں پُوری پاکیزگی نال بھین سمجھ کے۔

³اوہناں رَنڈِیاں زنانِیاں دی جیہڑیاں سَچّی مُچّی رَنڈِیاں نیں عِزّت کریں۔

⁴تے جے کِسے رَنڈی زنانی دے پُتر پوترے ہون تے پہلاں اپنے گھرانے نال دِینداری دا ورتاؤ کرنا سِکھّن تے ماں باپ دا حق دین۔ کیوں جو ایہہ خُدا نُوں پسند اے۔

⁵جیہڑی سَچّی مُچّی رَنڈی اے۔ تے اوہدا کوئی وی نئیں۔ اوہ خُدا اُتّے آس رکھدی اے۔ تے راتِیں دِنے بینتی تے دُعا وِچ لگّی رہندی اے۔

⁶پر جیہڑی شوقِین بن گئی اے اوہ جِیوندیاں ای مر گئی اے۔

⁷ایہناں گلّاں دا وی حُکم دے۔ تاں جو اوہ بے الزام رہن۔

⁸جے کوئی اپنیاں تے خاص کر اپنے گھر والیاں دی وی خبر نا لَوے۔ تے اوہ اِیمان دا مُنکر تے بے اِیمان نالوں وی بَھیڑا اے۔

⁹اوہ ای رَنڈی کتاب وِچ لِکھی جائے۔ جیہڑی سٹّھاں ورھیاں توں گھٹ نا ہوئے تے اِکّو ای بندہ کِیتا ہوئے۔

¹⁰تے چَنگیاں کمّاں وِچ مشہُور ہوئے۔ بچّیاں نُوں پا لیا ہوئے تے پردیسیاں دی سیوا کِیتی ہوئے تے پاک لوکاں دے پَیر دھوتے ہون۔ تے خستہ حال والیاں دی مدد کِیتی ہوئے تے سارے نیک کمّ کرن وِچ لگّی رہی ہوئے۔

¹¹پر مُٹیار رَنڈِیاں دے نال نا لِکھیں۔ کیوں جو جد اوہ مسِیح دے اُلٹ جِسم دے تابعیاں ہو جاندِیاں نیں تے ویاہ کرنا چاہندیاں نیں۔

¹²تے سزا دے لائق بن جاندِیاں نیں ایس لئی پئی اوہناں اپنے پہلے اِیمان نُوں چھڈ دِتّا۔

¹³تے نالے گھر گھر پِھرکے وِھلِیاں رہناں سِکھ جاندِیاں نیں تے نِریاں وِھلِیاں ای نئیں رہندیاں سگوں بکواس کر دیاں رہندیاں نیں تے دُوجیاں دے کمّاں وِچ دخل وی دیندیاں نیں تے ناجائز گلّاں آکھدیاں نیں۔

¹⁴سو مَیں چاہناں آں۔ پئی مُٹیار رَنڈِیاں ویاہ کر لین۔ تے اولاد جمّن تے گھر دا بندوبست کرن۔ تے کوئی وَیری بھلا بُرا نا آکھ سکے۔

¹⁵کیوں جو بتھیریاں بُھل کے شیطان دِیاں ہوگِئیاں نیں۔

¹⁶جے کِسے اِیمان والی زنانی کول رَنڈِیاں زنانِیاں ہون۔ تے اوہ ای اوہناں دی مدد کرے۔ تے کلِیسیا اُتّے بھار نا پائے۔ تاں جو اوہ اصلی رَنڈِیاں دی مدد کر سکے۔

¹⁷جیہڑے بزُرگ چَنگا آگُو نیں۔ خاص کر کے اوہ جیہڑے کلام تے تعلِیم دی محنت کر دے نیں دُونی عِزّت دے قابل سمجھے جان۔

¹⁸کیوں جو پاک کتاب ایہہ آکھدی اے۔ پئی گاہ وِچ وَگدے ڈھگّے دا مُنھ نا بَنّھ تے مزدُوری مزدُور دا حق اے۔

¹⁹جیہڑا دعویٰ کِسے بزُرگ اُتّے کِیتا جائے۔ اوہنوں دو تِنّ گواہاں بِناں نا سُنیں۔

²⁰گُناہ کرن والیاں نُوں ساریاں دے سامھنے جِھڑک تاں جو دُوجیاں نُوں وی ڈر ہوئے۔

²¹خُدا تے خُداوند یِسُوع مسِیح تے چُنیاں ہویاں فرِشتیاں دے سامھنے مَیں تینُوں آکھ دینا آں پئی ایہناں گلّاں اُتّے انصاف نال عمل کریں تے کوئی کمّ رَئی نال نا کریں۔

²²کِسے بندے اُتّے چھیتی نا ہتّھ رکھّیں تے دُوجیاں دے گُناہ وِچ نا رَلیں۔ تے اپنے آپ نُوں پاک رکھّیں۔

²³اگّے نُوں نِرا پانی نا پِیویں۔ سگوں اپنے ڈِھڈ تے ویلے کویلے دی کمزوری دے سببّوں تھوڑی جیہی مَے وی ورتیا کریں۔

²⁴بُہتے بندیاں دے گُناہ ظاہر ہو جاندے نیں۔ تے پہلاں ای عدالت وِچ اَپڑ جاندے نیں۔ تے بتھیریاں دے پِچّھوں اَپڑ دے نیں۔

²⁵ایسے طرح بُہتے چنگے کمّ وی ظاہر ہو جاندے نیں تے جیہڑے ہوری طرح دے نیں اوہ وی چُھپ نئیں سکدے۔