Read Western Panjabi ۲-تِیمُتِھیُس 3 Bible Online

۲-تِیمُتِھیُس 3 - Western Panjabi bible

۲-تِیمُتِھیُس 3

¹تے ایہہ جان رکھ پئی اخِیری زمانے وِچ بَھیڑے دِن آؤن گے۔

²پئی بندے خود غرض پَیسے دے پیارے شیخی مارن والے مغرُور بُرا آکھن والے ماں پئیو دے نافرمان ناشکرے تے ناپاک۔

³اصلی پیار توں خالی پتّھر دِل تُہمت لان والے تے بے مُہّار بَھیڑی طبیعت والے نیکی دے وَیری۔

⁴دغاباز۔ ڈِھیٹھ۔ گُھمنّڈی۔ خُدا نالوں دُنیا دِیاں خُوشیاں نُوں بُہتا پسند کرن والے ہون گے۔

⁵اوہ دِینداری دی ڈول تے رکھن گے۔ پر اوہدے اثر نُوں نا مَنّن گے۔ اجیہے تُوں وکھرا ہو جا۔

⁶اوہناں ای وِچوں اوہ لوک نیں جیہڑے گھراں وِچ چُپ چاپ وڑے ہوئے نیں۔ تے اوہناں بَھیڑیاں زنانِیاں نُوں وی وَس وِچ کر لَیندے نیں۔ جیہڑیاں گُناہ وِچ پھسیاں ہویاں نیں۔ تے ہر طرح دی خواہشاں دے وِچ نیں۔

⁷تے سدا سِکھدِیاں رہندیاں نیں۔ پر سچیائی دی پچھان تِیکر کدی وی نئیں اَپڑ دِیاں۔

⁸تے جیویں ینیّس تے یمبریس نیں مُوسیٰ دی مخالفت کِیتی سی۔ ایسے طرح ایہہ لوک وی سچیائی دی مخالفت کر دے نیں۔ ایہہ اجیہے بندے نیں جِنہاں دی عقل وِگڑی ہوئی اے۔ تے اِیمان ولّوں مقبُول نئیں۔

⁹پر اوہ ایدوں وَدّھ نا کر سکن گے۔ ایس کر کے پئی اوہناں دی بے وقوفی ساریاں بندیاں اُتّے ظاہر ہو جائے گی۔ جیویں اوہناں دی وی ہوگئی سی۔

¹⁰پر تُوں تعلِیم۔ چال چَلّن۔ اِرادے۔ اِیمان۔ صبر۔ مُحبّت۔ برداشت۔ ستائے جان۔ تے دُکھ دَرد سہن وِچ میری پَیروی کِیتی۔

¹¹یعنی اجیہے دُکھاں وِچ جیہڑے انطاکیہ تے اِکُنِیُم تے لُسترہ وِچ میرے اُتّے پئے تے ہورناں دُکھاں وِچ وی جیہڑے مَیں سہے نیں۔ پر خُداوند مَینُوں اوہناں ساریاں توں بچایا۔

¹²سگوں جِنّے مسِیح یِسُوع وِچ دِینداری دے نال زِندگی کٹنی چاہندے نیں۔ اوہ سارے ستائے جان گے۔

¹³تے بُرے تے دھوکھے باز بندے فریب دیندے تے فریب کھاندے وِگڑدے لگے جان گے۔

¹⁴پر تُوں اوہناں گلّاں اُتّے جیہڑیاں تُوں سِکھیاں سن۔ تے جِنہاں دا یقِین تینُوں دوایا گیا سی ایہہ جان کے قیم رہ پئی تُوں کِنّاں لوکاں کولوں سِکھیاں سن۔

¹⁵تے ایہہ وی پئی شُروع توں اوہناں پاک کِتاباں توں تُوں واقف سَیں جیہڑیاں تینُوں مسِیح یِسُوع اُتّے اِیمان لیاؤن نال نجات حاصِل کرن دے لئی دانائی دے سکدِیاں نیں۔

¹⁶ہر اِک کتاب جیہڑی خُدا دے اِلہام توں اے۔ اوہ تعلِیم تے الزام تے صلاح تے راستبازی دی تعلِیم واسطے فائدہ مند وی اے۔

¹⁷تاں جو خُداوند دا بندہ کامِل بنے تے ہر اِک نیک کمّ دے واسطے بالکل تیار ہوئے۔