Read Western Panjabi ۲-تِیمُتِھیُس 4 Bible Online

۲-تِیمُتِھیُس 4 - Western Panjabi bible

۲-تِیمُتِھیُس 4

¹خُدا تے مسِیح یِسُوع نُوں جیہڑا جِیوندیاں تے مویاں ہویاں دی عدالت کرے گا۔ گواہ کر کے تے اوہدے ظاہر ہون توں بادشاہی نُوں یاد دوا کے مَیں تینُوں آکھنا آں۔

²پئی تُوں کلام دی منادی کر۔ ویلے کویلے تیار رہ۔ تے ہر طرح دے صبر تے تعلِیم دے نال الزام دے۔ تے ملامت تے نصِیحت کر۔

³کیوں جو اجیہا ویلا آوے گا۔ پئی لوک صحِیح تعلِیم دی برداشت نا کرن گے۔ سگوں کنّاں دی جلُون دے سببّوں اپنیاں اپنیاں خواہشاں دے سببّوں بتھیرے اُستاد کرن گے۔

⁴تے اپنے کنّاں نُوں سچیائی ولّوں فیر کے کہانِیاں اُتّے لان گے۔

⁵پر تُوں سارِیاں گلّاں وِچ ہُشیار رہ۔ دُکھ سہہ۔ اِنجِیل دا کمّ کر۔ اپنی خِدمت نُوں پُوریاں کر۔

⁶پئی مَیں ہُنے قُربان پیا ہُنا آں۔ تے میرے کُوچ دا ویلا آ پُجیا اے۔

⁷مَیں چَنگا دنگل گھلّیا اے مَیں دَوڑ مُکا چھڈی۔ مَیں اِیمان نُوں سانبھ رکھیا۔

⁸اگّے لئی میرے واسطے راستبازی دا اوہ تاج رکھیا ہویا اے۔ جیہڑا راستباز نیائِیں یعنی خُداوند مَینُوں اوس دِن دے گا۔ تے نِرا مَینُوں ای نئیں سگوں اوہناں ساریاں نُوں وی جیہڑے اوہدے ظاہر ہون دی اُڈِیک وِچ نیں۔

⁹میرے کول چھیتی آؤن دی کوشش کر۔

¹⁰کیوں جو دِیماس ایس دُنیا نُوں پیار کر کے مَینُوں چھڈ کے تھِسّلُنِیکے نُوں ٹُر گیا۔ تے کریسکینس گلِتیہ نُوں تے طِطُس دِلمتیہ نُوں۔

¹¹اِکّو لُوقا میرے نال اے۔ مرقس نُوں نال لے کے آجا کیوں جو خِدمت لئی اوہ میرے کمّ دا اے۔

¹²مَیں تُخِکس نُوں اِفِسُس وِچ گھل دِتّا اے۔

¹³جیہڑا چوغہ مَیں تروآس وِچ کرپُس دے کول چھڈ آیا آں جدوں تُوں آویں اوہ تے کِتاباں خاص کر چَمّ پتّر لَیندا آویں۔

¹⁴سکندر ٹھٹھیار میرے نال بُہت بُرائیاں کِیتیاں۔ خُداوند اوہنوں اوہدے کمّاں پِچّھے بدلہ دے گا۔

¹⁵اوہدے توں تُوں ہُشیار رہ۔ کیوں جو اوس ساڈیاں گلّاں دی بڑی مخالفت کِیتی۔

¹⁶میری پہلی پیشی میرے نال کوئی نئیں سی۔ سگوں مَینُوں ساریاں چھڈ دِتّا۔ اوہناں نُوں ایہدا حِساب نا دینا پَوے۔

¹⁷پر خُداوند میرا مددگار سی۔ تے مَینُوں ہِمّت دِتّی۔ تاں جو میری راہِیں اِنجِیل دا سنیہا مشہُور ہو جائے تے سارِیاں قوماں سُن لین۔ تے مَیں شیر دے مُنھ وِچوں چھڈایا گیا۔

¹⁸خُداوند ہر اِک بُرے کمّ توں بچاوے گا۔ تے اپنی اسمانی بادشاہی وِچ صحِیح سلامت اَپڑائے گا۔ اوہدا جلال سدا تِیکر ہوندا رہے آمِین۔

¹⁹پرسِکّلہ تے اَکوِلہ تے اُنیسِفرُس دے ٹبّر نُوں سلام آکھنا۔

²⁰اِراستُس کُرِنتِھس وِچ رہیا تے ترُفِمُس نُوں مَیں مِیلیتُس وِچ بیمار چھڈیا۔

²¹سِیال توں پہلاں میرے کول آؤن دی کوشش کر۔ یُوبُولُس تے پُودینس تے لِینُس تے کلودِیہ تے سارے بھرا تینُوں سلام آکھدے نیں۔

²²خُداوند تیری رُوح دے نال رہے۔ تُہاڈے اُتّے فضل ہوندا رہے۔