Read Western Panjabi عِبرانیوں 10 Bible Online

عِبرانیوں 10 - Western Panjabi bible

عِبرانیوں 10

¹کیوں جو شریعت جیہڑی آؤن والیاں چَنگیاں شیواں دا پرچھاواں اے تے اوہناں شیواں دی اصلی صُورت نئیں کول آؤن والیاں نُوں کدی وی کامِل نئیں کر سکدی جیہڑے ہر ورھے کُھنجایاں بِناں اِکّو طرح دِیاں قُربانِیاں چاہڑدے نیں۔

²نئیں تے بند نا ہو جاندِیاں؟ ایس لئی پئی جد بندگی کرن والے اِک وار پاک ہو جاندے تے فیر اوہناں دا دِل اوہناں نُوں الزام نا دیندا؟

³سگوں اوہ قُربانِیاں ورھے دے ورھے گُناہ یاد کراندِیاں نیں۔

⁴کیوں جو ہو نئیں سکدا پئی ڈھگّیاں تے بکرِیاں دا لہو گُناہ نُوں دُور کرے۔

⁵ایس لئی اوہ دُنیا وِچ آؤندیاں ہویاں آکھدا اے۔ تُوں قُربانی تے نذراں دی چاہ نئیں کِیتی۔ سگوں میرے لئی اِک جِسم تیار کِیتا۔

⁶پُوریاں سوختنی قُربانِیاں تے گُناہ دِیاں قُربانِیاں توں تُوں خُوش نا ہوئیوں۔

⁷تَد مَیں آکھیا پئی اَے خُدا ویکھ مَیں آیا آں۔ (کتاب دے ورقیاں وِچ میری بابت لِکھیا ہویا اے) پئی تیری مرضی پُوری کراں۔

⁸پہلے تے اوہ آکھدا اے پئی نا تُوں قُربانِیاں تے نذراں تے پُوری سوختنی قُربانِیاں تے گُناہ دِیاں قُربانِیاں دی چاہ کِیتی۔ تے نا اوہناں توں خُوش ہوئیوں بھانویں ایہو ای قُربانِیاں شریعت دے سببّوں چاہڑیاں جاندِیاں نیں۔

⁹فیر اوس آکھیا ویکھ مَیں آیا آں۔ پئی تیری مرضی پُوری کراں۔ اوہ پہلے نُوں ہٹاندا اے پئی دُوجے نُوں قیم کرے۔

¹⁰اوسے مرضی دے سبّب اسی مسِیح یِسُوع دے بدن دے اِکّو واری قُربان ہون دی راہِیں پاک کِیتے گئے آں۔

¹¹تے سارے کاہِن کھلو کے روز سیوا کر دے نیں۔ تے کِسے طرح دِیاں قُربانِیاں بڑی واری چاہڑدے نیں جیہڑیاں کدی وی گُناہ ہٹان جوگیاں نئیں۔

¹²پر ایہہ سدا لئی گُناہ دے بدلے اِکّو ای قُربانی چاہڑ کے خُدا دے سَجّے پاسے بَہہ گیا۔

¹³تے اودُوں دا اُڈِیکدا اے۔ پئی میرے وَیری میرے پیراں دی چَوکی بنن۔

¹⁴کیوں جو اوس اِکّو ای قُربانی چاہڑن نال اوہناں لوکاں نُوں سدا لئی کامِل کر دِتّا اے جیہڑے پاک کِیتے جاندے نیں۔

¹⁵تے پاک رُوح وی سانُوں گواہی دیندا اے۔ پہلے تے ایہہ آکھدا اے۔

¹⁶پئی خُداوند آکھدا اے۔ جیہڑا عہد مَیں اوہناں دِناں پِچّھوں اوہناں نال بَنّھاں گا ایہہ اے پئی مَیں اپنے قانُون اوہناں دے دِلاں اُتّے رکھاں گا۔ تے اوہناں دیاں مَناں اُتّے لِکھاں گا۔

¹⁷تے اوہناں دے گُناہ تے بدکارِیاں نُوں فیر کدی یاد نا کراں گا۔

¹⁸تے جد اوہناں دی مُعافی ہوگئی اے۔ تے فیر گُناہ دی قُربانی دا تھاں نا رہیا۔

¹⁹ایس لئی بھراؤ جد سانُوں یِسُوع دے لہو دے سبّب اوس نَوِیں تے جِیوندے راہ پاک مکان وِچ وڑن دی دلیری اے۔

²⁰جیہڑا اوہنے پردے یعنی اپنے جِسم وِچوں ہو کے ساڈے لئی پاک کِیتا اے۔

²¹تے جد ساڈا وَڈا کاہِن اے جیہڑا خُدا دے گھر دا مُختِیار اے۔

²²تے فیر اسی سَچّے دِل تے پُورے اِیمان نال تے دِل دے الزام نُوں دُور کرن لئی دِل اُتّے چھٹّے مار کے تے بدن نُوں سُتھرے پانی نال صاف کر کے خُدا دے کول چلّئے۔

²³تے اپنی آس دے اِقرار نُوں پَکّی طرح نال پَھڑی رکھیے کیوں جو جِس وعدہ کِیتا اے اوہ سَچّا اے۔

²⁴تے مُحبّت تے نیک کمّاں ولّ اُکسان لئی اِک دُوجے دا خیال رکھیے۔

²⁵تے اکٹّھے ہون توں نا مُڑیئے۔ جیویں کئیاں لوکاں دی عادت اے۔ سگوں آپو وِچ نصِیحت کریئے تے جِنّاں اوس دِن نُوں نیڑے ہوندیاں ویکھدے ہو۔ اوناں ای ایہہ گلّاں وَدّھ کریا کرو۔

²⁶ایس لئی جے سچیائی نُوں پچھانن دے پِچّھے اسی جان کے گُناہ کریئے متاں گُناہاں دے بدلے کوئی ہور قُربانی باقی نئیں رہندی۔

²⁷سگوں عدالت دی ڈران والی تے اجیہی مُچّی ہوئی اَگ دی اوڈِیک۔ جیہڑی وَیرِیاں نُوں کھا چھڈے گی۔

²⁸جیہڑا جَنا مُوسیٰ دی شریعت نُوں ککّھ نئیں جان دا۔ دُوں ترہوں بندیاں دی گواہی نال بِناں رَحم ماریا جاندا اے۔

²⁹تے خیال کرو۔ پئی اوس بندے دی سزا کیڈی کُو ہوئے گی۔ جِس خُدا دے پُتر نُوں لتاڑیا اے۔ تے عہد دے لہو نُوں جِہدے نال اوہ پاک ہویا سی ناپاک جانیا تے فضل دے رُوح دی بے عِزّتی کِیتی۔

³⁰کیوں جو اسی اوہنوں جاننے آں جِس ایہہ آکھیا۔ پئی بدلہ لینا میرا کمّ اے۔ مَیں ای بدلہ دیاں گا تے فیر ایہہ وی پئی خُداوند اپنی اُمّت دی عدالت کرے گا۔

³¹جِیوندے خُدا دے وَس وِچ پینا بڑی ڈرن والی گلّ اے۔

³²پر تُسی اوہناں پہلیاں دِناں دا چیتا کرو۔ جِنہاں وِچ تُساں لو لگّن دے پِچّھوں دُکھاں دی ڈاہڈی ٹّکر جَھلّی۔

³³تے ایس سبّب پئی طعنے مِہنے تے مُصِیبتاں دے پاروں تُہاڈا تماشہ بنیا۔ تے کُجھ ایس لئی پئی تُسی اوہناں دے ساتھی ہوئے جِنہاں دے نال ایہہ بَھیڑا سلُوک ہوندا سی۔

³⁴تے تُساں قیدِیاں دا ورد کِیتا تے اپنے مال دا لُٹیا جانا وی خُوشی نال سہہ لیا۔ ایہہ جان کے پئی ساڈے کول ایدوں چنگی ملکیّت اے جیہڑی اوڑک تِیکر رہے گی۔

³⁵ایس لئی اپنی دلیری نُوں نا چھڈو جِہدا بڑا اَجر اے۔

³⁶کیوں جو تُہانوں صبر کرن دی لوڑ اے۔ تاں جو خُدا دی مرضی پُوری کر کے وعدہ کِیتی ہوئی شے لے لوؤ۔

³⁷تے ہُن بُہت ای تھوڑا چِر باقی اے۔ پئی آؤن والا آوے گا تے چِر نا لائے گا۔

³⁸پر میرا سَچّا بندہ اِیمان نال جِیوندا رہے گا تے جے اوہ پِچھّاں ہٹے تے میرا دِل اوہدے نال راضی نئیں رہندا۔

³⁹پر اسی ناس ہون لئی پِچھّاں کھِسکن والے نئیں سگوں اوہناں وِچوں آں جیہڑے جان بچان لئی اِیمان لیاؤندے نیں۔