Read Western Panjabi عِبرانیوں 13 Bible Online

عِبرانیوں 13 - Western Panjabi bible

عِبرانیوں 13

¹بھراواں نال مُحبّت قیم رکھو۔

²مُسافراں دی خاطر تواضع کرنا نا بُھلو کیوں جو اینج کئیاں پچھانے بِناں فرِشتیاں نُوں اپنے گھر رکھیا۔

³قیدِیاں نُوں ایس طرح یاد کرو جیویں اوہناں دے نال قید ہو۔ تے جِنہاں نال بَھیڑا سلُوک ہوندا اے۔ اوہناں نُوں وی ایہہ سمجھ کے یاد کرو۔ پئی اسی وی جِسم والے آں۔

⁴ویاہ کرناں ساریاں وِچ عِزّت دی گلّ سمجھی جائے تے کوئی زنا نا ہوئے۔ ایس لئی پئی خُدا زناکاراں تے حرامکاراں دا نیاں کرے گا۔

⁵رُپئے دی مُحبّت تُہاڈے وِچ نا ہوئے۔ جو کُجھ تُہاڈے کول اے اوہدے اُتّے صبر کرو۔ کیوں جو اوس آپ آکھیا اے۔ پئی مَیں تُہانوں نا کدی وساراں گا۔ تے نا کدی تُہانوں چھڈاں گا۔

⁶ایس لئی اسی دلیری نال آکھنے آں۔ پئی خُداوند میرا مددگار اے۔ مَیں خَوف نا کراں گا بندہ میرا کِیہ وگاڑے گا؟

⁷جیہڑے تُہاڈے رہبر سن تے جِنہاں تُہانوں خُدا دا کلام سُنایا اوہناں نُوں یاد رکھو اوہناں دی زِندگی دے نتیجے اُتّے دھیان کر کے اوہناں جیہے اِیماندار ہو جاؤ۔

⁸یِسُوع مسِیح کل تے اَج سگوں سدا تِیکر اِکّو جِہیا اے۔

⁹وَکھو وَکھ تے اوپریاں تعلِیماں پِچّھے بُھلّے نا پِھرو۔ کیوں جو ایہہ چَنگا اے۔ پئی فضل نال دِل تگڑا رہے اوہناں خُوراکاں نال نئیں جِنہاں دے ورتن والیاں نُوں کُجھ فائدہ نئیں ہویا۔

¹⁰ساڈی اِک اجیہی قُربان گاہ اے جِہدے توں تبنُو دی سیوا کرن والیاں نُوں کھان دا اختیار نئیں۔

¹¹کیوں جو جِنہاں جنَوراں دا لہو سردار کاہِن پاک مکان وِچ گُناہ دے بدلے واسطے لے جاندا اے۔ اوہناں دے بدن ڈیریوں باہر ساڑے جاندے نیں۔

¹²ایس لئی یِسُوع وی لوکاں نُوں آپ اپنے لہو نال پاک کرن لئی دروازے دے باہر دُکھ سہیا۔

¹³ایس لئی آؤ اسی اوہدی بے عِزّتی سہہ کے ڈیریوں باہر اوہدے کول چلّئے۔

¹⁴کیوں جو ایتھے ساڈا کوئی قیم رہن والا شہر نئیں۔ سگوں اسی آؤن والے شہر نُوں لَبّھنے آں۔

¹⁵سو اسی اوہدی راہِیں شُکر دی قُربانی یعنی اجیہے ہونٹھاں دا پَھل جیہڑے اوہدے ناں دا اِقرار کر دے نیں خُدا دے لئی ہر ویلے چاہڑیا کریئے۔

¹⁶تے بھلا کرنا تے سخی ہونا ہونا نا بُھلو۔ ایس لئی پئی خُدا اجیہاں قُربانِیاں توں خُوش ہوندا اے۔

¹⁷اپنے راہبراں دے آکھے لگو تے تابعیاں رہو کیوں جو اوہ تُہاڈیاں جاناں دے فائدے لئی اوہناں وانگر جاگدے رہندے نیں۔ جِنہاں نُوں حِساب دینا پَوے گا تاں جو اوہ خُوشی نال ایہہ کمّ کرن نا دُکھ نال کیوں جو ایس گلّ توں تُہانوں کُجھ فائدہ نئیں۔

¹⁸ساڈے لئی دُعا کرو۔ کیوں جو سانُوں یقِین اے پئی ساڈا دِل صاف اے۔ تے اسی سبھنیں گلِّیں نیکی نال جِیوندیاں رہنا چاہنے آں۔

¹⁹مَیں تُہانوں ایہہ کمّ کرن دی ایس لئی ہور وی نصِیحت کرنا آں۔ پئی مَیں چھتی تُہاڈے کول فیر آ سَکاں۔

²⁰ہُن تسلّی دا خُدا جِس بھیڈاں دے وڈّے ایّالی یعنی ساڈے خُداوند یِسُوع نُوں ہمیشہ دے عہد دے لہو دے سبّب مُردیاں وِچوں جوال کے آندا۔

²¹تُہانوں ساریاں نیک کمّاں وِچ پُوریاں کرے تاں جو اوہدی مرضی پُوری کرو۔ تاں جو کُجھ اوہنوں پسند آؤندا اے۔ یِسُوع مسِیح دی راہِیں ساڈے سبھناں وِچ پَیدا کرے۔ جِہدی وڈیائی سدا تِیکر ہوئے۔ آمِین۔

²²بھراؤ مَیں تُہاڈی مِنّت کرنا آں۔ پئی تُسی ایس نصِیحت دے کلام دی برداشت کرو۔ کیوں جو مَیں تُہانوں تھوڑیاں گلّاں وِچ لِکھیا اے۔

²³تُہانوں پتا ہوئے پئی ساڈا بھرا تِیمُتِھیُس چُھٹ گیا اے۔ جے اوہ چھتی آگیا۔ تے مَیں اوہدے نال تُہانوں مِلاں گا۔

²⁴اپنے سارے رہبراں تے سارے پاک لوکاں نُوں سلام آکھو۔ اِطالِیہ والے تُہانوں سلام آکھدے نیں۔

²⁵تُہاڈے سبھناں اُتّے فضل ہوندا رہے۔ آمِین۔