Read Western Panjabi عِبرانیوں 3 Bible Online

عِبرانیوں 3 - Western Panjabi bible

عِبرانیوں 3

¹سو پاک بھراؤ! تُسی جیہڑے اسمانی بُلاوے وِچ شریک ہو۔ اوس رسُول تے سردار کاہِن یِسُوع اُتّے دھیان کرو۔ جِہنُوں اسی مَنّنے آں۔

²اوہ اپنے مُقرّر کرن والے نال دیانتدار سی۔ جیویں مُوسیٰ وی اوہدے سارے گھر وِچ سی۔

³کیوں جو مُوسیٰ نالوں اوہدی عِزّت اینی وَدّھ سمجھی گئی جِنّی گھر بنان والے دی گھر نالوں عِزّت وَدّھ ہوندی اے۔

⁴تے ہر اِک گھر دا کوئی نا کوئی بنان والا ہوندا اے۔ پر جِس سارِیاں شیواں بنائِیاں اوہ خُدا اے۔

⁵مُوسیٰ تے اوہدے گھر وِچ نوکر وانگر دیانتدار رہیا۔ تاں جو اگّے نُوں بیان ہون والیاں گلّاں دی گواہی دے۔

⁶پر مسِیح پُتر وانگر اوہدے سارے گھر دا مُختِیار اے۔ تے اوہدا گھر اسی آں۔ پر ایہہ شرط اے۔ پئی اپنی دلیری تے آس دا فخر اوڑک تِیکر قیم رکھیے۔

⁷جیویں پاک رُوح آکھدا اے۔ جے اَج تُسی اوہدی اواز سُنو۔

⁸تے تُسی اپنے دِلاں نُوں ڈاھڈیاں نا کرو۔ جیویں غُصّہ دوان دے ویلے ازمایش دے دِن بیابان وِچ ہویا سی۔

⁹جِتّھے تُہاڈیاں پئیو دادیاں مَینُوں جاچیا تے پرکھیا۔ تے چالی ورھے میرے کمّ ویکھے۔

¹⁰ایسے لئی مَیں اوس پِیڑھی نال ناراض ہویا تے آکھیا پئی اوہناں دے دِل سدا بدراہ ہوندے رہندے نیں تے اوہناں میرِیاں راہاں نُوں نئیں پِچھانیا۔

¹¹تے مَیں وی اپنے غُصّے وِچ سَونہہ کھادِی۔ پئی ایہہ میرے آرام وِچ داخل نا ہو سکن گے۔

¹²بھراؤ! خبردار تُہاڈے وِچوں کِسے دا اجیہا بَھیڑا تے بے اِیمان دِل نا ہوئے۔ جیہڑا جِیوندے خُدا توں پھر جاوے۔

¹³سگوں تُسی روز دِہاڑی جد تِیکر اَج دا دِن ای اکھواؤندا اے۔ آپو وِچ اِک دُوجے نُوں نصِیحت کریا کرو۔ تاں جو تُہاڈے وِچوں کوئی گُناہ دے فریب نال سخت دِل نا ہو جائے۔

¹⁴کیوں جو اسی مسِیح وِچ شریک ہوئے آں جے اسی اپنے شُروع دے بھروسے وِچ اوڑک تِیکر مضبُوطی نال قیم رہئے۔

¹⁵جیویں آکھیا جاندا اے۔ پئی جے اَج اوہدی اواز سُنو تے غُصّہ دوان دے ویلے وانگر اپنے دِلاں نُوں ڈاھڈیاں نا کرو۔

¹⁶کِنّاں لوکاں اواز سُن کے غُصّہ دوایا؟ اوہناں ساریاں نئیں دوایا؟ جیہڑے مُوسیٰ دی راہِیں مِصروں نِکلے سن؟

¹⁷تے اوہ کِنّاں نال چالی ورھے ناراض رہیا؟ اوہناں نال نئیں جِنہاں گُناہ کِیتا؟ تے اوہناں دِیاں مَیتّاں بیابان وِچ پیّاں رہیاں؟

¹⁸تے کِنّاں دی بابت اوس سَونہہ کھادِی پئی اوہ میرے آرام وِچ نا وڑن گے۔ بِناں اوہناں دے جِنہاں نافرمانی کِیتی؟

¹⁹تے اسی ویکھنے آں۔ پئی اوہ بے اِیمانی دے سبّب داخل نا ہوسکے۔