Read Western Panjabi عِبرانیوں 6 Bible Online

عِبرانیوں 6 - Western Panjabi bible

عِبرانیوں 6

¹سو مسِیح دی تعلِیم دِیاں مُڈھ والِیاں گلّاں چھڈ کے تے کمال ولّ وَدِھیئے۔ تے مُردہ کمّاں توں تَوبہ کرن تے خُداوند اُتّے اِیمان لے آؤن۔

²تے بَپتسِمیاں تے ہتّھ رکھن تے مُردیاں دے جی اُٹھن تے سدا دی عدالت دی تعلِیم دی نِینّھ دُوجی واری نا دھریئے۔

³تے خُدا چاہے اسی ایہو ای کراں گے۔

⁴ایس لئی پئی جِنہاں نُوں اِک واری لو لگ گئی تے اوہناں اسمانی بخشِش دا سواد لے لیا۔ تے پاک رُوح دے سنگی ہوئے۔

⁵تے خُدا دے چنگے کلام تے اگلے جہان دِیاں قُدرتاں دا سواد لیا۔

⁶جے اوہ بَھوں جان تے اوہناں نُوں تَوبہ دے لئی فیر نواں بنانا اَنہونی گلّ اے۔ ایس لئی پئی اوہ خُدا دے پُتر نُوں اپنے ولّوں دُوجی وار صلِیب دیندے نیں تے اوہدی کُھلی بے عِزّتی کر دے نیں۔

⁷کیوں جو جیہڑی زمین اوس مینہ دا پانی پی لَیندی اے۔ جیہڑا اوہدے اُتّے بڑی واری وَسدا اے تے اوہناں دے ورتن لئی سبزیاں اُگاندی اے جِنہاں ولّوں واہی جاندی اے۔ اوہ خُدا ولّوں برکت پاندی اے۔

⁸تے جے مَلہے تے پوہلیاں اُگاندی اے۔ تے ردّی جاندی اے۔ تے لعنت دے نیڑے آگئی اے۔ تے جِہدا انت سَڑنا اے۔

⁹پر پیاریو! بھانویں اسی ایہہ گلّاں آکھنے آں پر تَد وی اسی تُہاڈے کولوں اوہناں توں چَنگیاں تے نجات والیاں گلّاں دا یقِین کرنے آں۔

¹⁰ایس لئی خُدا بے نیاں نئیں پئی تُہاڈے کمّ تے اوس پیار نُوں بُھل جائے۔ جیہڑا تُساں اوہدے ناں لئی ایس طرح ظاہر کِیتا پئی پاک لوکاں دی سیوا کِیتی تے اجے پئے کر دے ہو۔

¹¹اسی ایس گلّ دی چاہ کرنے آں۔ پئی تُہاڈے وِچوں ہر کوئی پُوری آس دے لئی اوڑک تِیکر ہر طرح کوشش ظاہر کر دا رہے۔

¹²تاں جو تُسی ڈِھلّے نا ہو جاؤ۔ سگوں اوہناں وانگر ہو۔ جیہڑے اِیمان تے صبر دی راہِیں وعدے دے وارث بن دے نیں۔

¹³کیوں جو جد خُدا ابرہام نال وعدہ کِیتا۔ تے سَونہہ کھان لئی کِسے نُوں اپنے نالوں وَڈا نا ویکھیا۔ تے اپنی سَونہہ کھا کے۔

¹⁴آکھیا ضرُور مَیں تینُوں برکتاں اُتّے برکتاں دیاں گا تے تیری نسل نُوں بُہت وَدھاواں گا۔

¹⁵تے اوس ایسے طرح صبر کر کے اوس وعدہ کِیتی ہوئی شے نُوں لے گیا۔

¹⁶ہُن بندے تے اپنے نالوں وڈّے دی سَونہہ کھاندے نیں تے اوہناں دے ہر اِک جھگڑے دا اخِیری ثبُوت سَونہہ ہوندی اے۔

¹⁷جِس مارِیاں جد خُدا چاہندا سی پئی وعدے دے وارثاں اُتّے ہور وی صفائی نال ظاہر کرے۔ پئی میرا اِرادہ بدل نئیں سکدا اوس وِچکار سَونہہ رکھی۔

¹⁸تاں جو دو نا بدلن والِیاں شیواں دے سبّب جِنہاں دی بابت خُدا دا جُھوٹھ بولنا مُمکِن نئیں۔ ساڈی چنگی طرح دِل دی تسلّی ہو جائے۔ جیہڑے پناہ لین نُوں ایس لئی دَوڑنے آں۔ پئی اوس آس کِیتی ہوئی شے نُوں جیہڑی اگّے رکھی ہوئی اے۔ ہتّھ وِچ لے لَئے۔

¹⁹اوس شے دی آس ساڈی جان دا اجیہا لنگر اے۔ جیہڑا ثابت تے قیم رہندا اے۔ تے پردے دے اندر تِیکر اَپڑ جاندا اے۔

²⁰جِتّھے یِسُوع مَلکِ صدق دے طریقے اُتّے سدا لئی سردار کاہِن بن کے ساڈی خاطر آگُو ہو کے اندر وڑیا اے۔