Read Western Panjabi عِبرانیوں 9 Bible Online

عِبرانیوں 9 - Western Panjabi bible

عِبرانیوں 9

¹ہُن پہلے عہد وِچ وی عبادت دے حُکم سن تے پاک مکان جیہڑا دُنیا دا سی۔

²پئی اِک تنبُو بنایا گیا سی اگلے ولّ جِہدے وِچ دیوڑی تے میز تے نذر دِیاں روٹِیاں سن تے اوہنوں پاک مکان آکھدے نیں۔

³تے دُوجے پردے دے پِچّھے اوہ تنبُو سی جِہنُوں سبھناں نالوں پاک آکھدے نیں۔

⁴جِہدا سونے دا دُھوف دان تے عہد دا صندُوق سبھنیں پاسیں سونے دا مَڑھیا ہویا سی اوہدے وِچ مَن نال بھریا ہویا اِک سونے دا مرتبان تے ہارُون دا پُنگریا ہویا ڈنڈا تے عہد دِیاں تختِیاں سن۔

⁵تے اوہدے اُتّے جلالی کروبی سن جیہڑے کفّارہ دے تھاں اُتّے چھاں کر دے سن۔ ایہناں گلّاں دا وَکھو وکھرا بیان کرن دا ایہہ تھاں نئیں۔

⁶جد ایہہ شیواں ایس طرح بن گِئیاں سن تے پہلے تنبُو وِچ کاہِن ہر ویلے جاندے سن تے بندگی دے کمّ پُورے کر دے نیں۔

⁷پر دُوجے وِچ وَڈا سردار کاہِن ای ورھے پِچّھوں اِکّو وار جاندا اے تے خُون بِناں نئیں جاندا۔ جِہنُوں اپنی تے اُمّت دی بُھل چُک دے لئی نذر چاہڑدا اے۔

⁸ایس توں پاک رُوح دا ایہہ اشارہ اے پئی جد تِیکر پہلا تنبُو کھلوتا ہویا اے۔ پاک مکان دا راہ ظاہر نا ہویا۔

⁹اوہ تنبُو ایس ویلے لئی اِک مِثال اے تے اوہدے سببّوں اجیہاں نذراں تے قُربانِیاں چاہڑیاں جاندِیاں نیں جیہڑیاں بندگی کرن والیاں نُوں دِلوں کامِل نئیں کر سکدِیاں۔

¹⁰ایس لئی پئی اوہ نِریاں کھان پِین تے نہاؤن دھون دِیاں جِسمانی رسماں نیں جیہڑیاں سُدھارن دے ویلے تِیکر مُقرّر ہویاں۔

¹¹پر جد مسِیح آؤن والِیاں چَنگیاں شیواں دا سردار کاہِن ہو کے آیا یعنی ایدوں وڈّے تے کامِل تنبُو دے راہ آیا جیہڑا ہتّھاں دا یعنی ایس دُنیا دا بنایا ہویا نئیں۔

¹²تے بکرِیاں تے وَچّھیاں دا لہو نئیں سگوں اپنا ای لہو لے کے آیا تے پاک مکان وِچ اِکّووار وڑ گیا تے سدا دی وی خلاصی کرائی۔

¹³کیوں جو جد بکرِیاں تے ڈھگّیاں دے لہو تے وَہڑی دی سواہ ناپاکاں اُتّے ترونکن نال جِسمانی پاکیزگی مِلدی اے۔

¹⁴تے مسِیح دا لہو جِس اپنے آپ نُوں سدا دی رُوح دی راہِیں خُدا دے اگّے بے عیب قُربان کِیتا۔ تُہاڈے دِلاں نُوں مُردہ کمّاں توں کِنّاں کُو چوکھا پاک کرے گا۔ تاں جو تُسی جِیوندے خُدا دی بندگی کرو۔

¹⁵تے ایسے سبّب اوہ نَوِیں عہد دا وچولا اے۔ تاں جو اوس مَوت دی راہِیں جو پہلے عہد دے قصوراں دی مُعافی لئی ہوئی اے۔ سَدّے ہوئے لوک وعدے دے سببّوں سدا دی وِرثہ پا لین۔

¹⁶کیوں جو جِتّھے وصیّت اے اوتھے وصیّت کرن والے دی مَوت دا ثبُوت وی چاہیدا اے۔

¹⁷ایس لئی پئی وصیّت مرن دے پِچّھوں ای کمّ دیندی اے۔ تے جد تِیکر وصیّت کرن والا جِیوندا اے۔ اوہ کِسے کمّ دی نئیں۔

¹⁸ایس لئی پہلا عہد وی خُون بِناں نئیں بَجھّیا۔

¹⁹کیوں جو جد مُوسیٰ ساری اُمّت نُوں شریعت دے سارے حُکم سُنا بَیٹھا۔ فیر وَچّھیاں تے بکرِیاں دا لہو لے کے پانی تے لال پشم تے زُوفے دے نال اوس کتاب تے ساری اُمّت اُتّے چھڑک دِتّا۔

²⁰تے آکھیا پئی ایہہ اوس عہد دا لہو اے جِہدا حُکم خُدا تُہانوں دِتّا اے۔

²¹ایس طرح اوس تنبُو تے سیوا دِیاں سارِیاں شیواں اُتّے رَت ترونکی۔

²²تے قریبن سارِیاں شیواں شریعت دے سببّوں لہو نال پاک کِیتیاں جاندِیاں نیں تے لہو وَگیاں بِناں مُعافی نئیں ہوندی۔

²³ایس لئی ضرُوری سی پئی اسمانی شیواں دِیاں نقلاں ایہناں دی راہِیں پاک کِیتیاں جاندِیاں پر آپ اسمانی شیواں ایہناں نالوں چَنگیاں قُربانِیاں دی راہِیں۔

²⁴کیوں جو مسِیح اوس ہتّھاں نال بنائے ہوئے پاک مکان وِچ نئیں وڑیا۔ جیہڑا اصلی مکان دی نقل اے پر اصلی اسمان وِچ وڑیا تاں جو خُدا دے اگّے ساڈے لئی حاضر ہوئے۔

²⁵ایہہ نئیں پئی اوہ اپنے آپ نُوں بڑی واری قُربان کرے۔ جیویں سردار کاہِن پاک مکان وِچ ورھے دے ورھے دُوجے دا لہو لے کے جاندا اے۔

²⁶نئیں تے دُنیا دے شُروع توں لے کے اوہنوں بڑی واری دُکھ جھلنا پَیندا۔ پر ہُن اخِیری زمانے وِچ اِکّو وار ظاہر ہویا۔ تاں جو اپنے آپ نُوں قُربان کرن نال گُناہ نُوں دفع کر دے۔

²⁷تے جیویں بندیاں نُوں اِک وار مرنا ہوندا اے تے مگروں عدالت ہوندی اے۔

²⁸ایسے طرح مسِیح وی جیہڑا اِک وار بتھیریاں لوکاں دے گُناہ چُکن لئی قُربان ہویا دُوجی وار گُناہ دے بِناں نجات لئی اوہناں نُوں وکھالی دے گا۔ جیہڑے اوہنوں اوڈِیک دے نیں۔