Read Western Panjabi ۱-پطرس 1 Bible Online

۱-پطرس 1 - Western Panjabi bible

۱-پطرس 1

¹یِسُوع مسِیح دے رسُول پطرس ولّوں اوہناں کھِلّرے ہوئے پردیسیاں نُوں جیہڑے پُنطُس۔ گلِتیہ۔ کَپّدُکیہ۔ آسِیہ تے بتُھنیہ وِچ نیں۔

²خُدا باپ دے اگیترے عِلم دے سببّوں رُوح دے پاک کرن نال تابعدار ہون تے یِسُوع مسِیح دا لہو چِھڑکے جان واسطے چُنے ہوئے نیں۔ فضل تے تسلّی تُہانوں مِلدی رہے۔

³ساڈے خُداوند یِسُوع مسِیح دے خُدا تے باپ دی وڈیائی ہوئے۔ جِس یِسُوع مسِیح دے مُردیاں وِچوں جی اُٹھن دا سبّب اپنی بڑی رحمت نال سانُوں زِندہ آس دین لئی نَوِیں سِریوں پَیدا کِیتا۔

⁴پئی اِک وِرثہ جیہڑی نا ناس ہون والی نا نُقص والی تے نا کُملان والی اے۔

⁵سگوں اسمان اُتّے تُہاڈے لئی رکھی ہوئی اے۔ تُہانوں مِل جائے۔ (جِنہاں دی راکھی خُدا دی قُدرت نال اِیمان دی راہِیں اوس نجات واسطے ہوندی اے جیہڑی چھیکڑلے ویلے ظاہر ہون والی اے۔)

⁶ایہدے سبّب تُسی بڑی خُوشی کر دے ہو۔ بھانویں ہُن تھوڑے چِر لوڑاں توں کِیتے وَن سَووَنِیاں ازمایشاں دے سببّوں تُہانوں تکلیف ہوئی اے۔

⁷تے ایہہ ایس واسطے ہویا اے۔ پئی تُہاڈا پرکھیا ہویا اِیمان جیہڑا اَگ نال پرکھے ہوئے فانی سونے نالوں بُہتے مُل دا اے یِسُوع مسِیح دے ظاہر ہون دے ویلے وڈیائی تے جلال تے عِزّت دا سبّب ہوئے۔

⁸اوہدے نال تُسی بِن ویکھیاں مُحبّت رکھدے ہو تے بھانویں اوہنوں ایس ویلے نئیں ویکھدے فیر وی اوہدے اُتّے اِیمان لیا کے اجیہی خُوشی کر دے ہو۔ تے جِہدا بیان نئیں ہو سکدا تے جیہڑی جلال نال بھری ہوئی اے۔

⁹تے اپنے اِیمان دا مطلب یعنی رُوحاں دی نجات پاندے ہو۔

¹⁰ایسے نجات دی بابت اوہناں نبیاں بڑی بھال تے چھان بِین کِیتی جِنہاں اوس فضل دی نبُوّت کِیتی جیہڑا تُہاڈے اُتّے ہون والا سی۔

¹¹اوہ ایس گلّ دی چھان بِین کر دے سن پئی مسِیح دا رُوح جیہڑا اوہناں وِچ سی۔ اوہنے اگیتریاں مسِیح دی تکلیفاں دی خبر دِتّی تے اوس جلال دی وی جیہڑا اوہناں توں پِچّھے آؤن والا سی۔ کیہڑے یا کہیو جِہے ویلے دی گلّ دا ذِکر کر دا سی۔

¹²اوہناں اُتّے ایہہ اِلہام اُگھیڑیا گیا پئی اوہناں گلّاں وِچ اپنی نئیں سگوں تُہاڈی سیوا کر دے سن تے ایہناں گلّاں دی خبر تُہانوں ہُن اوہناں دی راہِیں ہوئی اے۔ جِنہاں پاک رُوح دی راہِیں جیہڑا اسمانوں گھلّیا گیا تُہانوں خُوشخبری سُنائی۔ ایہناں گلّاں اُتّے فرِشتے وی دھیان کرنا چاہندے نیں۔

¹³ایس واسطے اپنی عقل دا لکّ بَنّھ کے تے ہُشیار ہو کے اوس فضل دی پُوری آس رکھو جیہڑا یِسُوع مسِیح دے وکھالی دین دے ویلے تُہاڈے اُتّے ہون والا اے۔

¹⁴تے تابعدار بچّیاں وانگر اپنے آپ نُوں اپنی بیواقوفی دِیاں پرانیاں خواہشاں اُتّے نا ڈولو۔

¹⁵سگوں جیویں تُہاڈا سَدّن والا پاک اے اوسے طرح تُسی وی اپنے چال چَلّن وِچ پاک بنو۔

¹⁶کیوں جو لِکھیا اے۔ پئی پاک بنو۔ ایس لئی جو مَیں پاک آں۔

¹⁷تے جد تُسی باپ کر کے اوہدے کولوں دُعا منگدے ہو۔ جیہڑا ہر اِک دے کمّ دے سببّوں رَئی بِناں عدالت کر دا اے۔ تے اپنی مُسافری دا ویلا خَوف نال کٹّو۔

¹⁸کیوں جو تُسی جان دے ہو پئی تُہاڈا نکمّا چال چَلّن جیہڑا پئیو دادیاں توں لگا آؤندا سی۔ اوہدے توں تُہاڈی خلاصی ناس ہون والِیاں شیواں یعنی سونے چاندی نال نئیں ہوئی۔

¹⁹سگوں اِک بے نُقص تے بے داغ لیلے دے قِیمتی لہو نال یعنی مسِیح دے لہو نال۔

²⁰تے خُدا نُوں دُنیا دے بنن توں پہلاں اوہدا عِلم سی پر تُہاڈی خاطر چھیکڑے ویلے ظاہر کِیتا گیا۔

²¹تے تُساں اوہدی راہِیں خُدا اُتّے اِیمان لیاندا اے۔ جِس اوہنوں مُردیاں وِچوں جوایا اے۔ تے جلال وی دِتّا۔ تاں جو تُہاڈا اِیمان تے آس خُدا اُتّے ہوئے۔

²²ایس کر کے پئی تُساں سچیائی نُوں مَن کے بھراواں نال سَچّی مُحبّت کرن لئی اپنیاں دِلاں نُوں پاک کِیتا اے۔ دِلوں جانوں آپو وِچ مُحبّت کرو۔

²³کیوں جو تُسی جِسمانی تُخم توں نئیں۔ سگوں رُوحانی توں۔ خُدا دے کلام دی راہِیں جیہڑا جِیوندا تے قیم اے نَوِیں سِریوں جمّے ہو۔

²⁴فیر ایہہ آیا اے۔ پئی اِنسان گھاہ وانگر اے تے اوہدی ساری شان و شوکت گھاہ دے پُھل وانگر اے گھاہ تے کُرما جاندا اے تے پُھل ڈِگّ پَیندا اے۔

²⁵پر خُداوند دا کلام سدا تِیکر قیم رہے گا۔ ایہہ اوہ ای خُوشخبری دا کلام اے۔ جیہڑا تُہانوں سُنایا گیا سی۔