Read Western Panjabi ۱-پطرس 4 Bible Online

۱-پطرس 4 - Western Panjabi bible

۱-پطرس 4

¹جد مسِیح ساڈے واسطے جِسم دا دُکھ چُکیا۔ تے تُسی وی اوسے طبیعت دے ہتّھیار بنو۔ کیوں جو جِس جِسم دا دُکھ چُکیا اوس گُناہ توں خلاصی پائی اے۔

²تاں جو تُسی اگّے نُوں باقی عُمر جِسم دِیاں خواہشاں وِچ نئیں سگوں خُدا دی مرضی نال کٹّو۔

³ایس لئی پئی جِنّاں چِر تُساں غیر قوماں دی مرضی دے سببّوں کمّ کِیتا تے جِنّاں چِر پہلاں تُساں لُچ پُنے تے بُریاں خواہشاں شراب پِین وِچ ناچ رنگ تے نشے بازیاں تے مکرُوہ بُت پرستی وِچ لایا اوناں ای بُہت اے۔

⁴ایہدے اُتّے اوہ اچرج ہوندے نیں۔ پئی تُسی اوہناں دے نال ایڈی بدچلنی نئیں کر دے تے طعنے مِہنے دیندے نیں۔

⁵اوہ اوسے نُوں لیکھا دین گے۔ جیہڑا جِیوندیاں تے مُردیاں دی عدالت کرن نُوں تیار اے۔

⁶کیوں جو مُردیاں نُوں وی خُوشخبری ایسے لئی سُنائی گئی سی۔ پئی جِسم ولّوں بندیاں وانگر اوہناں دی عدالت ہوئے۔ پر رُوح ولّوں اوہ خُدا دے سببّوں جِیوندے رہن۔

⁷سارِیاں شیواں ہُن مُک چلیاں نیں ایس لئی سُرت والے ہوؤ تے دُعاواں لئی تیار رہو۔

⁸ساریاں نالوں پہلاں ایہہ چنگی گلّ اے پئی آپو وِچ بڑی مُحبّت کرو۔ کیوں جو مُحبّت بُہتے گُناہاں اُتّے پردہ پا چھڈ دی اے۔

⁹بُڑبُڑ کِیتیاں بِناں آپو وِچ مُسافراں دی خاطر تواضع کرو۔

¹⁰جِنّی نِعمت کِسے نُوں مِلی اے اوہ اوہنوں خُدا دِیاں سارِیاں نِعمتاں دے چنگے نَوکراں وانگر دُوجے دی سیوا واسطے ورتیا کرے۔

¹¹جے کوئی کُجھ آکھے تے اجیہا آکھے جیویں خُدا دا کلام اے۔ جے کوئی سیوا کرے تے اونہی طاقت نال کرے۔ جِنّی خُدا دیندا اے۔ تاں جو سارِیاں گلّاں وِچ یِسُوع مسِیح دی راہِیں خُدا دا جلال ظاہر ہوئے۔ جلال تے سلطنت ہمیشہ تِیکر اوہدی ای اے۔ آمِین۔

¹²پیاریو! جیہڑی مُصِیبت دی اَگ تُہاڈی ازمایش دے لئی تُہاڈے وِچ بھکھی ہوئی اے۔ ایہہ سمجھ کے اچرج نا ہوؤ پئی ایہہ کوئی انوکھی گلّ ساڈے اُتّے ہوئی اے۔

¹³سگوں تُسی خُوشی کرو۔ پئی تُسی مسِیح دیاں دُکھاں وِچ سنگی اوہ۔ تاں جو اوہدے جلال دے ظاہر ہون دے ویلے بے انت خُوشی کرو۔

¹⁴جے مسِیح دے ناں دے سببّوں تُہانوں طعنے مِہنے مِلدے نیں تے تُسی مُبارک ہو۔ کیوں جو جلال دا یعنی خُدا دا رُوح تُہاڈے اُتّے رہندا اے۔

¹⁵تُہاڈے وِچوں کوئی جَنا خُونی یا چور یا بدکار یا ہورناں دے کمّ وِچ دخل دین والا ہو کے دُکھ نا پائے۔

¹⁶پر جے مسِیحی ہون دے سببّوں کوئی بندہ دُکھ پائے۔ تے نا شرمائے۔ سگوں ایس ناں دے سببّوں خُدا دی وڈیائی کرے۔

¹⁷کیوں جو اوہ ویلا آ پُجیا اے پئی خُدا دے گھروں عدالت شُروع ہوئے۔ تے جد ساتھوں ای شُروع ہوئے گی تے اوہناں دا کِیہ اوڑک ہوئے گا جیہڑے خُدا دی خُوشخبری نُوں نئیں مَن دے۔

¹⁸جے راستباز بندے مَساں نجات پان گے تے بے دین تے گُنہگار کِتّھے کھلون گے۔

¹⁹سو جیہڑے خُدا دی مرضی دے سببّوں دُکھ پاندے نیں اوہ راستبازی نال اپنیاں جاناں وفادار خالق نُوں سونپ دین۔