Read Western Panjabi ۲-پطرس 3 Bible Online

۲-پطرس 3 - Western Panjabi bible

۲-پطرس 3

¹پیاریو! ہُن مَیں ایہہ دُوجا خط تُہانوں لِکھنا آں تے یاد دوان لئی دوہاں خطاں توں تُہاڈے صاف دِلاں نُوں جوش دوانا آں۔

²پئی تُسی اوہناں گلّاں نُوں جیہڑیاں پاک نبیاں پہلاں آکھیاں نیں تے خُداوند تے نجات دین والے دے اوس حُکم نُوں یاد رکھو۔ جیہڑا تُہاڈے رسُولاں دی راہِیں آیا سی۔

³تے ایہہ پہلاں جان لوؤ پئی اخِیری دِناں وِچ اجیہے مخَولئے آؤن گے۔ جیہڑے اپنیاں خواہشاں دے سببّوں ٹُرن گے۔

⁴تے آکھن گے پئی اوہدے آؤن دا وعدہ کِتّھے گیا؟ کیوں جو جدوں توں پئیو دادے سَوں گئے نیں اوس ویلے توں ہُن تِیکر سبھ کُجھ اوسے طرح ای اے۔ جیویں خلقت دے شُروع توں سی۔

⁵اوہ تے جان بُجھ کے بُھل جاندے نیں پئی خُدا دے کلام دی راہِیں اسمان پرانیاں زمانیاں توں نیں۔ تے زمین پانی وِچ بنی تے پانی وِچ قیم اے۔

⁶ایہناں دے سبّب اوس ویلے دی دُنیا ڈُب کے ہلاک ہوئی۔

⁷سگوں ایس ویلے دے اسمان تے زمین اوسے کلام دی راہِیں ایس لئی رکھّے ہوئے نیں پئی ساڑے جان تے اوہ بے دِین بندیاں دی عدالت تے ہلاکت دے دِن تِیکر سانبھے رہن گے۔

⁸پیاریو! ایہہ گلّ نا بُھلو۔ پئی خُداوند دے اگّے اِک دِن ہزار ورھے جِہیا اے۔ تے ہزار وَرھا اِک دِن جِہیا اے۔

⁹خُداوند اپنے وعدے وِچ چِر نئیں لاندا جیویں بعضے سمجھدے نیں۔ سگوں تُہاڈی بابت صبر کر دا اے۔ ایس لئی پئی اوہ کِسے دی ہلاکت نئیں چاہندا۔ سگوں ایہہ چاہندا اے۔ پئی سارے تَوبہ کرن۔

¹⁰پر خُداوند دا دِن چور وانگر آوے گا۔ اوس دِن اسمان بڑے شور نال برباد ہو جان گے۔ تے عناصر ڈاہڈی گرمی نال پِگھر جان گے۔ تے زمین تے اوہدے کمّ سڑ جان گے۔

¹¹جد ایہہ سارِیاں شیواں ایس طرح پگھرن والِیاں نیں تے تُہانوں پاک چال چَلّن تے دِینداری وِچ کیہو جِہیا ہونا چاہیدا اے۔

¹²تے خُدا دے اوس دِن دے آؤن دی چاہ تے اوڈِیک کِنی چاہیدی اے۔ جِہدے سبّب اسمان اَگ نال پِگھر جان گے تے عناصر ڈاہڈی گرمی نال گلّ جان گے۔

¹³پر اوہدے وعدے دے سببّوں اسی نَوِیں اسمان تے نَوِیں زمین دی اوڈِیک وِچ آں جِہدے وِچ راستبازی وَسدی اے۔

¹⁴سو پیاریو! ایس کر کے پئی تُسی ایہناں گلّاں دی اوڈِیک وِچ ہو اوہدے اگّے تسلّی دی حالت وِچ بِناں داغ تے بے عیب ہون دی کوشش کرو۔

¹⁵تے ساڈے خُداوند دے صبر نُوں نجات سمجھو جیویں ساڈے پیارے بھرا پَولُس وی اوس حِکمت دے سببّوں جیہڑی اوہنوں مِلی تُہانوں لِکھیا اے۔

¹⁶تے اپنے ساریاں خطاں وِچ ایہناں گلّاں دا ذِکر کِیتا اے۔ جِنہاں وِچ کئی گلّاں اجیہاں نیں جِنہاں دا سمجھنا مُشکل اے تے جاہل تے ڈانواں ڈول لوک اوہناں دے مطلب نُوں وی ہورناں صحِیفیاں وانگر کھِچّ کھِچّ کے اپنے لئی ہلاکت پَیدا کر دے نیں۔

¹⁷سو پیاریو! ایس کر کے پئی تُسی ایہناں گلّاں نُوں اگیترے جان دے ہو۔ خبردار ہو تاں جو بے دِیناں وی بد راہی ولّ کھِچّے جا کے اپنی پُختیائی چھڈ نا دیو۔

¹⁸سگوں ساڈے خُداوند تے نجات دین والے یِسُوع مسِیح دے فضل تے پہچان وِچ وَدھدے جاؤ۔ اوسے دا جلال ہُن وی ہوئے۔ تے سدا تِیکر رہے۔ آمِین۔