Read Western Panjabi ۳-یُوحنّا 1 Bible Online

۳-یُوحنّا 1 - Western Panjabi bible

۳-یُوحنّا 1

¹میرے ولّوں جیہڑا بزُرگ آں پیارے گَیُس دے ناں۔ جِہدے نال مَیں سَچّی مُحبّت کرنا آں۔

²پیارے۔ مَیں ایہہ دُعا کرنا آں پئی جیویں تُوں رُوحانی ترقی کرنا ایں اوسے طرح تُوں سارِیاں گلّاں وِچ ترقی کریں تے تگڑا رہَیں۔

³کیوں جو جدوں بھراواں آ کے تیری اوس سچیائی دی گواہی دِتّی جِہدے اُتّے تُوں ٹھیک ٹھیک چلنا ایں تے مَیں بُہت ای خُوش ہویا۔

⁴میرے لئی ایس توں وَدّھ کے ہور کوئی خُوشی نئیں۔ پئی مَیں اپنے بچّیاں نُوں سچیائی اُتّے چلدیاں سُناں۔

⁵پیارے۔ جیہڑا سلُوک تُوں اوہناں بھراواں نال کرنا ایں۔ جیہڑے پردیسی نیں اوہ نیک نِیتی نال کرنا ایں۔

⁶اوہناں کلِیسیا دے اگّے تیری مُحبّت دی گواہی دِتّی سی۔ جے تُوں اوہناں نُوں ایس طرح وِداع کریں گا۔ جیویں خُدا دے لوکاں نُوں چاہیدا اے تے چَنگا کریں گا۔

⁷کیوں جو اوہ اوس ناں دے لئی نِکلے نیں۔ تے غیر قوماں کولوں کُجھ نئیں لَیندے۔

⁸سو سانُوں چاہیدا اے۔ پئی ایہو جِہیاں دی حمایت کریئے۔ تاں جو اسی وی سچیائی دے نال کمّ کرن والے ہویئے۔

⁹مَیں کلِیسیا نُوں کُجھ لِکھیا سی پر دِیُترِفِیس جیہڑا اوہناں وِچوں وَڈا ہونا چاہندا اے۔ سانُوں قبول نئیں کر دا۔

¹⁰سو جدوں مَیں آواں گا تے اوہدیاں کمّاں نُوں جیہڑے اوہ کر دا اے یاد دواواں گا پئی ساڈی بابت بُریاں گلّاں بَکدا اے تے فیر وی بس نئیں کر دا سگوں آپ وی بھراواں نُوں قبول نئیں کر دا تے جیہڑے قبول کرنا چاہندے نیں اوہناں نُوں وی ڈکدا اے۔ تے کلِیسیا وِچوں کڈھ دیندا اے۔

¹¹پیارے! بُرائی دے پِچّھے نا جا سگوں نیکی پِچّھے جا۔ کیوں جو نیکی کرن والا خُدا ولّوں اے تے بُریائی کرن والے خُدا نُوں نئیں ویکھیا۔

¹²دیمتیِریُس دی بابت ساریاں بندیاں نیں تے سچیائی نے آپ وی گواہی دِتّی اے۔ تے اسی وی گواہی دینے آں تے تُوں جان دا ایں پئی ساڈی گواہی سَچّی اے۔

¹³مَیں لِکھنا تے بتھیرا کُجھ سی پر سیاہی تے قلم نال لِکھنا نئیں چاہندا۔

¹⁴سگوں تینُوں چھیتی مِلن دی آس رکھنا آں تے اوس ویلے آمھنے سامھنے گلّ بات کراں گے۔

¹⁵تینُوں تسلّی مِلدی رہے۔ ایس تھاں دے دوست تینُوں سلام آکھدے نیں توں اوس تھاں دیاں دوستاں نُوں اِک اِک کر کے سلام آکھیں۔