Read Western Panjabi مُکاشفہ 13 Bible Online

مُکاشفہ 13 - Western Panjabi bible

مُکاشفہ 13

¹تے سمُندر دی ریت اُتّے جا کھلوتا۔ فیر مَیں اِک پشُو نُوں سمُندر وِچوں نِکلدیاں ویکھیا اوہدے دَس سِنگ تے سَتّ سِر سن تے اوہدیاں سِنگاں اُتّے دَس تاج تے اوہدیاں سِراں اُتّے کُفر دے ناں لِکھے ہوئے سن۔

²تے جیہڑا پشُو مَیں ویکھیا سی اوہدی شکل چِیتے وانگر سی تے پَیر رِچھ وانگر تے مُنھ شیرببر وانگر۔ تے اوس ناگ اپنی قُدرت تے اپنا تخت تے بڑا اختیار اوہنوں دے دِتّا۔

³تے مَیں اوہدے سِراں وِچوں اِک نُوں جیویں مَوت دا چمرس لگّا ہویا ویکھیا پر اوہدا مَوت دا چمرس ولّ ہوگیا۔ تے ساری دُنیا تعجُّب کر کے اوس پشُو دے پِچّھے پِچّھے ٹُر پئی۔

⁴تے ایس واسطے پئی اوس ناگ اپنا اختیار اوس بیابانی نُوں دے دِتّا سی ایس لئی اوہناں لوکاں ناگ دی پُوجا کِیتی تے اوس پشُو دی وی ایہہ آکھ کے پُوجا کِیتی۔ پئی ایس پشُو وانگر کون اے؟ تے کون اوہدے نال بِھڑ سکدا اے؟

⁵تے اوہنوں اِک مُنھ دِتّا گیا۔ جیہڑا بڑے بول بولدا سی تے کُفر آکھدا سی۔ تے اوہنوں بتالی مہینے تِیکر کمّ کرن دا اختیار دِتّا گیا۔

⁶تے اوس خُدا دے بارے کُفر بکن لئی مُنھ کھولیا پئی اوہدے ناں تے اوہدے خیمے دے بارے یعنی اسمان دے رہن والیاں دے بارے کُفر بکے۔

⁷تے اوہنوں ایہہ اختیار دِتّا گیا پئی پاک لوکاں نال لڑے تے اوہناں نُوں جِت لَئے تے اوہنوں ہر اِک گھرانے تے اُمّت تے قوم اُتّے اختیار دِتّا گیا۔

⁸تے زمین دے اوہ سارے رہن والے اوہدی پُوجا کرن گے جِنہاں دے ناں اوس لیلے دی حیاتی دی کتاب وِچ لِکھے نئیں سن گئے جیہڑا دُنیا دے مُڈھ توں پہلاں ہلال ہویا ہویا اے۔

⁹جِہدے کنّ ہون اوہ سُنے۔

¹⁰جِہنُوں قید ہون والی اے اوہ قید وِچ پَوے گا۔ جیہڑا تلوار نال قتل کرے گا اوہ ضرُور تلوار نال قتل کِیتا جائے گا۔ پاک لوکاں دے صبر تے اِیمان دا ایہو ویلا اے۔

¹¹فیر مَیں اِک ہور پشُو نُوں زمین وِچوں نِکلدیاں ویکھیا اوہدے لیلے وانگُوں دو سِنگ سن تے ناگ وانگر بولدا سی۔

¹²تے ایہہ پہلے پشُو دا سارا اختیار اوہدے سامھنے کمّ وِچ لیاؤندا سی تے زمین تے اوہدے رہن والیاں توں اوس پہلے جنَور دی پُوجا کراندا سی جِہدا مَوت دا چمرس ولّ ہوگیا سی۔

¹³تے اوہ وڈّے وڈّے نِشان وکھاؤندا سی ایتھوں تِیکر پئی بندیاں دے سامھنے اسمان توں اَگ وَرھاندا سی۔

¹⁴تے زمین دے رہن والیاں نُوں اوہناں نشاناں دے نال جیہڑے اوس پشُو دے سامھنے وکھان دا اوہنوں اختیار دِتّا گیا سی ایس طرح بدراہ کر دیندا سی پئی زمین دے رہن والیاں نُوں آکھدا سی پئی جِس پشُو نُوں تلوار لگّی سی تے اوہ جِیوپیا اے اوہدا بُت بناؤ۔

¹⁵تے اوہنوں اوس پشُو دے بُت وِچ رُوح پُھوکن دا اختیار دِتّا گیا۔ تاں جو اوس پشُو دا بُت بولے وی۔ تے جِنّے لوک اوس پشُو دے بُت دی پُوجا نا کرن قتل کِیتے جان۔

¹⁶تے اوس ساریاں نِکّیاں وڈّیاں دَولت منداں تے غرِیباں اَزاداں تے غلاماں دے سَجّے ہتّھ یا اوہناں دیاں متّھیاں اُتّے ٹھپّہ لوایا۔

¹⁷پئی اوہدے بِناں جِہدے اُتّے ٹھپّہ یعنی اوس پشُو دا ناں یا اوہدے ناں دی گنتری ہوئے ہور کوئی بیوپار نا کر سکے۔

¹⁸ایہہ حِکمت دی گلّ اے جِہدے وِچ سمجھ اے اوہ پشُو دی گنتری جوڑ لَئے۔ کیوں جو اوہ بندے دی گنتری اے تے اوہدی گنتری چھ سَو چھیاٹھ اے۔